E Joseph F. Rutherford, nọ ghaa re ọkaolotu ọghe Watch Tower Society vbe ẹghẹ nii, wa gha rre vba, vba suẹn gha bọ Ọgua Arriọba na nọ rre 1228 Pensacola Street, Honolulu, Hawaii. Ukpo na bọ Ọgua Arriọba na kegha re ukpo 1935. Ọgua Arriọba na, ẹre ọ vbe re owa ugamwẹ nokaro na ka suẹn gha tie ẹre “Kingdom Hall” vbe uhunmwu otọ agbọn hia. Ọ gberra ukpo 80 nẹ, ne etẹn ke loo Ọgua Arriọba na vbe ugamwẹ. Sokpan vbe na guan na, iko enẹ nọ zẹ urhuẹvbo isẹn ẹre ọ ghi loo ẹre, uhiẹn ya sẹ egbe urhuẹvbo Hawaii Pidgin. *

A ghi dọlọ bọ Ọgua Arriọba na nẹ, a keghi gie na tie emwa ni rre ẹdogbo nii, avbe ukọ arriọba kevbe avbe ọmamwaemwi, ne iran do mu okhian lẹga ẹre. Uki e February 11 kpa ya sẹ February 15, 2020 ẹre emwa ya mu okhian lẹga Ọgua Arriọba na, vbe ẹghẹ na kha na, COVID-19 ma he suẹn gha vẹwa. Vbe etẹn ima rhie emwa ni rre lẹga Ọgua Arriọba na, iran na kpee vidio nọ guan kaẹn vbene a ya suẹn gha bọ ne Ọgua Arriọba hẹ ma iran, iran na vbe danmwẹhọ ọta ne etẹn ima nikpia ya guan, nọ dekaẹn iwinna ọghe Avbe Osẹe Jehova. Vbọ ghi rre uki e February 16, 2020, a keghi ya Ọgua Arriọba na fi ohan ne Jehova, ọtẹn nokpia David H. Splane, nọ re ọkpa vbe Ebu Nọ Su ọghe Avbe Osẹe Jehova ẹre ọ ya ọta guan vbe ẹdẹrriọ.

Ọtẹn nokhuo ọkpa nọ ghaa mwẹ obọ vbe emwamwa ẹdẹrriọ keghi kha wẹẹ: “Agharhemiẹn wẹẹ, ẹre te ima gie na tie emwa gha dee ne ima kporhu maa iran, I rẹnrẹn wẹẹ emwi ughughan ne iran miẹn vbe ẹdẹrriọ, gha ya iran rẹn aro ọmwa ne Osanobua gele khin.”

Ọgua Arriọba nii na ya fi ohan ne Jehova, wa gele ya etẹn ima do rẹn otọ ẹre sayọ, vbene otu ọghomwa ya suẹn hẹ vbe Hawaiian Islands. Aro iran na vbe sẹ ọre vbene ẹmwẹ akhasẹ ọghe Aizaia ya sẹ hẹ, ọ wẹẹ, “Iran ni rre odẹ ahọ gha rho ẹre. Avbe emwa ni yiin lele ọkpẹn olokun gha rho e Nọyaẹnmwa ne Osanobua Izrẹl.”​—Aizaia 24:15.