E Baibol ẹre ima khian na miẹn adia nọ ghi maan sẹ, nọ gha ru iyobọ ne ima vbe arrọọ ọghe ima. U ghaa tie Baibol vbe ẹghẹ hia, u na gha ru erria yan emwi ne u tie, u na vbe gha rhiẹre ye uyinmwẹ, “agbọn gha ma ruẹn.” (Jọsua 1:8; Psalm 1:1-3) U ghi do rẹn Osanobua kevbe Ovbi ẹre ighẹ Jesu, irẹnmwi na gha ya ruẹ gha mwẹ arrọọ ọghe etẹbitẹ.—Jọn 17:3.

De emwamwa ne u mwẹ ne u ya tie Baibol? Emwamwa nibun wa rrọọ. Ọ mwẹ ebe emwamwa na ya tie Baibol, nọ gha ru iyobọ nuẹ ya tie ebe ni rre Baibol ọsegbe ọsegbe zẹ vbe na yae hae ye ugan, ra zẹ vbene a ya mwamwa uhunmwuta ẹre. Vbe igiemwi, u sẹtin tie ako eso, nọ dekaan okha ọghe Ivbi Izrẹl nẹdẹ kevbe obọ ne Osanobua ya mu iran. Ako ọvbehe vbe rrọọ ni vbe dekaan vbene a ya mu iko ọghe Ivbiotu e Kristi gbọọ hẹ vbe orre nokaro, kevbe vbene ọ ya suẹn gha muan yọ hẹ. U na sẹtin gha tie uhunmwu ebe ọkpọkpa ọghe Baibol ẹdẹgbegbe, u gha sẹtin tie Baibol ohoho fo vbe ukpo ọkpa.

Ebe emwamwa na, gha ru iyobọ nuẹ deghẹ u gualọ emwamwa na ya tie Baibol ẹdegbegbe, deghẹ u hoo ne u tie Baibol hia fo vbe ukpo ọkpa, ra deghẹ ẹghẹ okaro ne u khian ya suẹn Baibol na tie na khin. Danlod ebe Emwamwa na ya tie Baibol na gha sẹtin print, nọ rre ako na, ne u suẹn gha loo ẹre.