Ima bẹghe ẹre nẹ wẹẹ, emwa nibun ni mwẹ ugamwẹ ne iran ye, wa gbọyẹmwẹ ye iziro ọghe Baibol. Vbe ne ẹmwata, ma i gbodan ye asẹ ọghe ọmwa rhọkpa vbe nọ dekaan emwi nọ yayi uhiẹn deghẹ ọ na lughaẹn ne ọghomwa, kevbe wẹẹ, ma i vbe gbagba igiuhun ọghomwa ye emwa ọvbehe egbe.

Vbe ima ghaa gu ọmwa ziro vbe nọ dekaan ugamwẹ, ima keghi lele ibude ọghe Baibol, nọ khare wẹẹ ne ima ru vberriọ vbe odẹ ọghe ‘ọmẹhẹ’ kevbe a ghi vbe rhie ‘ọghọ nọ dinmwi’ ne ọmwa ne ima gu guan. (1 Pita 3:15) Ima rẹn wẹẹ, emwa eso i khian danmwehọ ikporhu ne ima kpee. (Matiu 10:14) Vbọrhirhighayehẹ, vbẹ re te ima gu emwa guan nẹ, ma i khian rẹn deghẹ iran mwẹ ẹkorhiẹnrhiẹnmwẹ da ikporhu ne ima kpee ra iran i mwẹ. Ma vbe rẹn wẹẹ, te ẹmwẹ agbọn na mu yo mu rre.

Vbe igiemwi, ẹdẹ eso rrọọ ne ọmwa ma na miobọ ya danmwehọ, sokpan vbe ẹdẹ ọvbehe, ọ ghi ye ẹkorhiẹnrhiẹnmwẹ rhie ehọ ne ima ta yi. Emwa sẹtin werrie aro da ẹghẹ nọ wegbe na gu loo, ọni ghi do gua iran kpa niran gha mwẹ ẹkorhiẹnrhiẹn da igiuhun ọghe Baibol. Ọni ẹre ọ siẹre ne ma na hia, nima gha gu emwa guan vbe ẹghẹ hia.