Emwa eso rrọọ ni dinmwiamẹ zẹvbe Osẹe Jehova, sokpan iran i ghi kporhu ma emwa ọvbehe, uhiẹn iran fẹko sie obọ vbọ, na gha gu emwa ne iran gba rrọọ vbe iyayi muobọ. Ma i wa gbaẹngbe ne emwa vberriọ. Vbe ne ẹmwata ma keghi sẹ ehe ne iran ye kevbe ima ghi vbe gha hia na werriegbe guae kpa ẹkorhiẹnrhiẹnmwẹ ọghe iran ne iran ya ga Osanobua.

Ma i wa gheghe kan ọmwa fua deghẹ ọ na ru orukhọ nọ wegbe. Sokpan deghẹ Osẹe Jehova nọ dinmwiamẹ nẹ na gha rra uhi ọghe Baibol vbe ẹghẹ hia, vbene ọ ma na fiwerriẹ, a ghi gbaẹngbe nẹ ra a ghi kaẹn fua. E Baibol tae vbe odẹ nọ dewuarorua wẹẹ: “Wa yuo ọmwa dan ni hin uwu ẹbu uwa rre”—1 Kọrinti 5:13.

Vbọ vbe ye hẹ ne okpia na kan fua sokpan amwẹ ọnrẹn vbe ivbiẹre ye rẹ ọkpa vbe Osẹe Jehova? Adeghẹ ọ na gha yerriọ, irẹn vbe ẹgbẹe ọre i khian ghi gha ru emwi kugbe vbe nọ dekaan ugamwẹ, sokpan, a sikẹ egbe ọghe ẹgbẹe nii ye gha rre evba. Nọ rhiema wẹẹ, irẹn vbe amwẹ ọnrẹn ye gha loo kugbe zẹvbe ọdọ vbe amwẹ, kevbe wẹẹ agiẹngiẹn kevbe agbalo kugbe zẹvbe ẹgbẹe ye gha rrọọ vbene ọ ka ye dee yi.

Emwa na kan fua sẹtin ye gha rrie iko ọghomwa. Adeghẹ iran hoo, ediọn ni rre iko sẹtin ye Baibol rrie ibude ne iran. Evba gu ru ọna ọre, na ya ru iyobọ ne ọmwa na kan fua na, ya werriegbe gbegba zẹvbe ọkpa vbe Osẹe Jehova. Adeghẹ ọmwa na kan fua na wiobọ vbe uyinmwẹ nọ ma gba, kevbe wẹẹ, ọ na gele gha yin vbe odẹ nọ gu ilele ọghe Baibol ro, a ghi rhiẹre werriegbe zẹvbe ọkpa vbe ẹten vbuwe iko, kevbe a vbe gbọbokhian nẹ.