Iyayi Nọ Ma Gba: Avbe Osẹe Jehova ma yayi wẹẹ, avbe ọbo ebo gha sẹtin ru iyobọ ne iran, rhunmwuda ọni, iran i gualọ iyobọ vbe obọ avbe ọbo ebo.

Ẹmwata nọ rrọọ: Ma keghi hoo ne ima gbaroghe egbe ima kevbe ẹgbẹe ọghe ima vbe odẹ nọ ghi maan sẹ. Ma ghaa khuọnmwi, ma ghi bu avbe ọbo ebo ni guẹ iwinna, ni gha sẹtin gbaroghe ima, ni gha vbe sẹtin mwaan ima egbe vbe ne ima i na si esagiẹn ye egbe. Ma wa gbọyẹmwẹ ye alaghodaro ne avbe ọbo ebo mwẹ vbe odẹ ne iran ya gbaroghe emwa. Uhiẹn, obẹlẹ eso na loo ya gbaroghe Avbe Osẹe Jehova vbe ne iran i na si esagiẹn ye egbe, ẹre a ghi vbe loo ya ru iyobọ ne emwa nibun nia. Vbe ẹvbo nibun, emwa eso ni khuọnmwi sẹtin kha wẹẹ, iran ma hoo ne iran si esagiẹn ye egbe, rhunmwuda ọlọghọmwa eso ni lelẹe khian. Usun avbe ọlọghọmwa na ọre, emianmwẹ ne ọmwa gha sẹtin mu rhunmwuda esagiẹn nọ si ye egbe, ọlọghọmwa nọ lae rre deghẹ esagiẹn ne ọmwa si ye egbe ma gua re egbe ro, kevbe abakuru eso ne avbe ọbo ebo ru vbe iran ghaa si esagiẹn ye ọmwa egbe.

Iyayi nọ ma gba: Avbe Osẹe Jehova yayi wẹẹ, amuẹtinyan ne ọmwa mwẹ gha sẹtin mu ẹre egbe rran.

Ẹmwata nọ rrọọ: Ma i kha wẹẹ, amuẹtinyan ne ọmwa mwẹ ẹre ọ mu ẹre egbe rran.

Iyayi Nọ Ma Gba: Igho ọrhẹnrhẹn ẹre ọmwa khian ya gbaroghe egbe ẹre, deghẹ ọ ma na hoo nọ si esagiẹn ye egbe.

Ẹmwata Nọ Rrọọ: Ọmwa ghaa hoo nọ loo obẹlẹ ọvbehe ya gbaroghe egbe ẹre vbe nọ ma na si esagiẹn ye egbe, ẹi khian vbe gbe ẹre igho gbe *

Iyayi Nọ Ma gba: Avbe Osẹe Jehova nibun keghi wulo vbe ukpo ukpo rhunmwuda, iran ma hoo ne iran si esagiẹn ye egbe, uhiẹn ya sẹ egbe ibiẹka ni rrọọ.

Ẹmwata Nọ Rrọọ: Ẹmwẹ na ma gba hiehie. Ẹghẹ nibun, avbe ọbo ebo keghi winna yan ẹkokoudu kevbe ugboloko ọghe ọmwa, ugbẹnso iran ghi vbe fi abọ eso vbe egbe ọmwa werriẹ vbe ne iran i na si esagiẹn ye ọmwa nii egbe. * Vbene egbe rran emwa ni khuọnmwi ni si esagiẹn ye egbe, erriọ egbe vbe rran iran ni ma si esagiẹn ye egbe. Uhiẹn, ugbẹnso, egbe emwa ni ma si esagiẹn ye egbe kue maan sẹ ọghe emwa ni si esagiẹn ye egbe. * Vbọrhirhighayehẹ, ọmwa rhọkpa i khian sẹtin kha wẹẹ, ọmwa gha wu deghẹ ọ ma si esagiẹn ye egbe ra ọmwa gha fe deghẹ ọ na si esagiẹn ye egbe.

Emwi ne Baibol tae, ẹre ọ si ẹre ne ima i na si esagiẹn ye egbe, ẹi re rhunmwuda emwi ne avbe ọbo ebo tae. Vbe Baibol, ẹmwẹ na gbẹn ye ile nẹdẹ kevbe ile ọgbọn ne ọre New Testaments kevbe Old Testaments rhiẹre ma wẹẹ, ọ ma khẹke ne ima gha rri esagiẹn. (Gẹnẹsis 9:4; Lẹvitikọs 17:10; Diuteronomy 12:23; Iwinna 15:28, 29) Deba ọni, te esagiẹn mudia ye ihe arroọ vbe odaro Osanobua. (Lẹvitikọs 17:14) Ẹi wa re ne ima na hoo ne ima họn ẹmwẹ ne Osanobua ọkpa, ẹre ọ si ẹre ne ima i na si esagiẹn ye egbe, emwi ọvbehe nọ si ẹre ne ima i na si esagiẹn ye egbe, ọre ne ima na rhie ọghọ ne Osanobua zẹvbe Ayi nọ rhie arrọọ ne ima.

Vbe ẹghẹ eso nọ gberra, avbe ọbo ebo kegha ghee ẹre wẹẹ, deghẹ a na wẹẹ na loo obẹlẹ ọvbehe ya gbaroghe ọmwa rhunmwuda wẹẹ, a ma hoo na si esagiẹn ye ọre egbe, ọ sẹtin zẹ ẹbe, uhiẹn, ọ yevbe na miẹn wẹẹ, te ọmwa nii hoo nọ tobọre gbe egbe ẹre rua, sokpan ke ukpo eso nọ lae gha dee, iziro na keghi fiwerriẹ. Vbe igiemwi, vbe ukpo 2004, ebe ọkpa na gbẹn nọ guan kaẹn iwinna ọghe avbe ọbo ebo keghi kha wẹẹ, “obẹlẹ nibun na loo na ya gbaroghe Avbe Osẹe Jehova ni khuọnmwi, ẹre a khian ghi gha loo ya gbaroghe emwa nibun vbe ukpo eso nọ dee.” * Vbe ukpo 2010, emwi na gbẹn ye ebe ọkpa na tiẹre Heart, Lung and Circulation keghi kha wẹẹ, “‘ẹi re Avbe Osẹe Jehova ọkpa ẹre ọ khẹke na gha mwaan re egbe vbe na i na si esagiẹn ye iran egbe, ọ khẹke ne avbe ọbo ebo vbe gha loo obẹlẹ na ne emwa ọvbehe nẹi re Osẹe Jehova.”

Nia, avbe ọbo ebo nibun vbe uhunmwu otagbọn hia gha khian mwaan ọmwa egbe, iran keghi loo obẹle ughughan vbe ne iran i na si esagiẹn ye ọmwa nii egbe. Uhiẹn, vbe avbe ẹvbo ni ma he rhan aro, a vbe loo avbe obẹlẹ ughughan na guan kaẹn na ya gbaroghe emwa vbe nai na si esagiẹn ye iran egbe. Deba ọni, te emwa eso nẹi re Osẹe Jehova ghi vbe hoo na loo obẹlẹ na ya gbaroghe iran vbe iran ghaa khuọnmwi.