Ke ẹghẹ gha dee, Avbe Osẹe Jehova wa loo e Baibol ughughan na zedu ẹre vbe iruẹmwi e Baibol ọghe iran. Sokpan, e Baibol na tiẹre New World Translation of the Holy Scriptures ẹre ima mobọ loo vbe urhuẹvbo ughughan na re zedu ẹre ghee rhunmwuda, ọ loo eni ọghe Osanobua, odẹ na ya zedu ẹre gbae, ẹi vbe lọghọ na rẹn otọre.

• Ọ loo eni ọghe Osanobua. Emwa eso ni zedu e Baibol ma rhie uyi gie ọmwa nọ yan ẹmwẹ nọ rre uwu e Baibol. Vbe igiemwi, ọ mwẹ e Baibol ọkpa na zedu ẹre, a na gbẹnnẹ eni orhumwu 70 ye uwu ẹre, eni emwa na gbẹnnẹ yọ na keghi re emwa ni vbe gha mwẹ iyobọ ne iran ru, na ya sẹtin print ẹre ladian. Vbọrhirhighayehẹ, iran ma gbẹn eni Jehova ye uwu e Baibol na hiehie agharhemiẹn wẹẹ, irẹn ọre Osanobua nọ yan ẹmwẹ nọ rre uwu e Baibol!

  Sokpan eni Osanobua rhiegbe ma igba arriaisẹn nibun vbe New World Translation. Ehe nọ na rhiegbe ma vbe ẹghẹ na ya gbẹn e Baibol, ẹre ọ wa ye ye vbe New World Translation. Vbọrhirhighayehẹ, a ma sunu yi eni emwa ni zedu e Baibol na.

• Ẹmwẹ nọ rre uwu ẹre gbae. Ẹi re Baibol hia ẹre a zedu ẹre vbe odẹ nọ gbae. Vbe igiemwi, vbe Baibol ọkpa na zedu ẹre, ebe Matiu 7:13 keghi kha wẹẹ: “la onurho ne wẹnrẹn, rhunmwuda, te onurho nọ rhie ẹrinmwi erhẹn ye gbodoo, odẹ na la yo i vbe lọghọ.” Sokpan, ẹmwẹ na loo ro vbe ako na vbe ẹghẹ na ya gbẹn e Baibol, ọre “ọfuan,” ẹi re “ẹrinmwi erhẹn.” Ọ gha kẹ, emwi nọ si ẹre ne emwa ni zedu e Baibol na, na loo “erinmwi erhẹn,” ọre ne iran na yayi wẹẹ, te emwa dan khian gha giẹn vbe ẹrinmwi erhẹn vbe etẹbitẹ. Sokpan, e Baibol ma kha vberriọ. Rhunmwuda ọni, e New World Translation keghi zedu ẹre vbe odẹ nọ gbae, ọ keghi kha wẹẹ: “Odẹ nọ vbẹẹ gbodoo ẹre ọ su rhie ọfuan, emwa nibun ẹre ọ bi lae.”

• Ẹi lọghọ na rẹn otọre. Deghẹ emwi na zedu ẹre na gba, ọ na gha khuẹrhẹ na tie, ẹi vbe lọghọ na rẹn otọre, ọ rhiema wẹẹ, a gele zedu ẹre vbe odẹ nọ khẹke. Gia ghee igiemwi ọkpa ghee. Ọ mwẹ ẹmwẹ ọkpa ne ukọ e Pọl loo ro vbe ebe Rom 12:11, a gha wẹẹ na zedu ẹre vbe nọ wa ye, emwi nọ khian rhiema ọre, “orhiọn nọ tin zẹvbe amẹ erhẹn.” Ugbẹnvbe a miẹn wẹẹ, ẹmwẹ nii i ghi mwẹ emwi nọ demu zẹ vbene a ghi ya guan vbe ẹghẹ ne ima ye na, a keghi zedu ẹre vbe New World Translation vbe odẹ nẹi lọghọ na rẹn otọre. Ọ keghi kha wẹẹ, ọ khẹke ne Ivbiotu e Kristi “gi orhiọn nọhuanrẹn gha ya iran fi wainwain.”

Gberra wẹẹ e New World Translation loo eni ọghe Osanobua, a zedu ẹre vbe odẹ nọ gbae kevbe wẹẹ, ẹi lọghọ na rẹn otọre, emwi ọvbehe vbe rrọọ nọ yae lughaen: Te a rhie ẹre ne emwa ọghe ọhẹ, ai fian ive yọ. Rhunmwuda ọni, te emwa nibun ghi sẹtin tie Baibol vbe urhuẹvbo ọghe iran, uhiẹn ya sẹ egbe emwa nẹi ghẹ te miẹn igho ya dẹ e Baibol.