Ol si kukamba oli ol animol we oli laef long botom blong solwota mo long ol rif. Aotsaed blong bodi blong olgeta, maet i luk olsem se i gat ol lam, i solsolap, o i gat ol nil. Bodi blong olgeta i fleksibol, long sam minit o seken nomo, i save benben olsem waks, o i save kam strong olsem wan plang. From samting ya, oli save benbenem olgeta i go insaed long ol smosmol hol mo kam strong, nao i had blong narafala animol i pulumaot olgeta. Si kukamba i save mekem olsem from skin blong hem we i nambawan tumas.

 Tingbaot: Skin blong si kukamba i save mekem tri samting: i save kam strong, i save kam nomol, mo i save kam sofsof. Blong si kukamba i mekem ol jenis ya, hem i joenem ol pis mit blong skin blong hem o i seraotem olgeta. Oli mekem olsem taem oli yusum ol protin we oli strong o oli sofsof.

 Ol protin we oli strong, oli fomem ol smosmol brij o jen, bitwin ol mit blong skin, nao skin ya i kam strong. Be ol protin we oli sofsof, oli karemaot ol jen ya, nao skin i kam sofsof. Skin blong si kukamba i save kam sofsof olsem se bae i melt.

 Ol saentis oli wokem sam samting we i save jenis olsem skin blong si kukamba. Wan long ol mak we oli wantem kasem, hemia blong wokem wan samting we oli kolem electrode, blong yusum taem oli operetem bren blong man. Electrode ya i mas strong blong oli save putum long stret ples blong hem, be i mas kam sofsof tu afta long hem. Electrode olsem we i save jenis, bambae i mekem se bodi i akseptem o no sakemaot.

 ?Wanem tingting blong yu? ?Skin blong si kukamba i kamaot olsem nomo? ?O i gat wan man we i wokem?