Gannet i wan bigfala pijin blong solwota we i save sut i kamdaon long solwota long spid blong 190 kilometa long wan aoa. Pijin ya i sperem solwota wetem paoa we i 20 taem moa strong, i bitim paoa blong graviti blong pulum samting i kamdaon. ?Olsem wanem ol pijin ya oli naf blong mekem olsem bakegen mo bakegen, we oli no ded?

 Tingbaot: Bifo we pijin ya i sperem solwota, hem i stretem tufala wing blong hem i gobak biaen, mekem se hem i kam olsem wan ara. Mo tu, hem i mekem wan skin i kavremap ae blong hem blong protektem, mo i mekem nek mo jes blong hem i kam fulap long win, olsem pilo we i blokem hem blong i no kasem kil.

 Taem pijin ya i sperem solwota, maot, hed, mo nek blong hem i wokem wan sep olsem kon blong aeskrim. Olsem nao, presa blong wota i no kasem wan masel nomo long nek blong pijin ya, be i kasem olgeta masel long nek. Mo long semtaem ya, hem i ajastem ae blong hem blong i save lukluk aninit long wota.

 ?Pijin ya i save go dip olsem wanem? Spid blong pijin ya i save tekem hem i godaon kasem klosap 11 meta, be sipos hem i muvmuvum tufala wing blong hem we i open smol mo tufala leg blong hem we i olsem leg blong dakdak, hem i save go dip moa. Blong talem stret, sam long ol pijin ya oli bin godaon bitim 25 meta. Afta we oli kasem daon, oli flot i kambak antap isi nomo, mo oli rere blong flae bakegen.

 Wajem pijin ya gannet taem hem i daeva

 Ol man blong stadi oli disaenem wan robot we i olsem pijin ya, blong lukaotem mo sevem ol man long solwota. Oli wokem ol robot ya blong oli save flae, daeva i godaon long wota, mo flae bakegen. Be taem oli stap traem ol robot ya, wan long olgeta i brok plante taem, from i stap bangem nogud hem long wota. Hemia i mekem ol man blong stadi ya oli luksave se robot ya we oli mekem, “i no save sut i godaon long wota olsem pijin ya gannet.”

 ?Wanem tingting blong yu? ?Fasin blong pijin ya blong sut i godaon long wota, i kamaot olsem nomo, o i gat wan Man we i wokem?