?Wanem Ya Heven?
Ansa we Baebol i givim
Long Baebol, i gat tri mining blong tok ya “heven”: (1) skae, (2) ples we ol spirit oli laef long hem, mo (3) pijatok we i minim haenem o hae posisen. Ol vas raonabaot long tok ya oli soemaot stret mining. a
Skae. Tok ya “heven” i save minim ples antap long wol ya we win i blu, pijin i flae, klaod i mekem ren mo sno i foldaon, mo laetning i faerap. (Ol Sam 78:26; Ol Proveb 30:19; Aesea 55:10; Luk 17:24) Hem i save minim tu, spes raon long wol blong yumi we “san mo mun mo ol sta” oli stap long hem.—Dutronome 4:19; Jenesis 1:1.
Ples we ol spirit oli stap long hem. Tok ya “heven” i save minim ples blong ol spirit, wan laef we i hae moa mo i afsaed long yunives blong yumi. (1 King 8:27; Jon 6:38) Long heven ya, i gat Jehova God i stap, we hem i “Spirit,” wetem ol enjel we hem i krietem. (Jon 4:24; Matiu 24:36) Samtaem, “heven” i olsem pijatok we i minim ol gudfala enjel, “kongregesen blong ol tabu man.”—Ol Sam 89:5-7.
Mo tu, Baebol i yusum tok ya “heven” blong tokbaot ples we Jehova i stap long hem, ‘ples blong hem long heven.’ (1 King 8:43, 49; Hibru 9:24; Revelesen 13:6) Baebol i talem se oli sakemaot Setan mo ol rabis enjel long heven, nao oli no moa save go long ples we Jehova i stap long hem. Nating se i olsem, oli stap yet long ples blong ol spirit.—Revelesen 12:7-9, 12.
Pijatok blong haenem o hae posisen. Taem Baebol i yusum tok ya “heven” blong minim hae posisen, klosap oltaem i joen wetem paoa blong rul. Long hae posisen ya i gat olgeta olsem:
Jehova God, King we i gat olgeta paoa.—2 Kronikel 32:20; Luk 15:21, futnot.
Kingdom blong God, hemia gavman we bambae i tekem ples blong ol gavman blong man. Baebol i tokbaot Kingdom ya se “niufala heven.”—Aesea 65:17; 66:22; 2 Pita 3:13. b
Ol Kristin we taem oli stap long wol, oli gat hop blong go long heven.—Efesas 2:6.
Ol gavman blong wol we oli leftemap olgeta antap long ol man we gavman i rulum.—Aesea 14:12-14; Daniel 4:20-22; 2 Pita 3:7.
Ol rabis spirit we oli rulum wol naoia.—Efesas 6:12; 1 Jon 5:19.
?Heven i olsem wanem?
Long ples blong ol spirit, oli bisi gud long wok blong olgeta. I gat plante handred milian spirit we oli “stap mekem samting we [Jehova] i wantem.”—Ol Sam 103:20, 21; Daniel 7:10.
Baebol i talem se long heven, laet i saen we i saen. (1 Timoti 6:15, 16) Long vison we profet Esikel i luk, i gat “bigfala laet we i saenaot” long heven, mo long vison blong heven we Daniel i luk, i gat “wan faea i kamaot.” (Esikel 1:26-28; Daniel 7:9, 10) Heven i wan ples we i tabu, i klin, mo i naes tumas.—Ol Sam 96:6; Aesea 63:15; Revelesen 4:2, 3.
Bigfala tingting we Baebol i givim long saed blong heven, se hem i wan ples we i fulap long glori blong God mo i mekem ol man oli fraet. (Esikel 43:2, 3) I no posibol blong ol man oli kasem save fulwan long heven, yumi no naf blong kasem save long ples we ol spirit oli stap long hem.
a Hibru tok ya we yumi transletem i kam “heven,” i kamaot long wan tok we i minim “hae” o “antap.” (Ol Proveb 25:3) Luk The New Brown, Driver, and Briggs Hebrew and English Lexicon of the Old Testament, pej 1029.
b Cyclopedia blong McClintock mo Strong i talem se niufala heven long Aesea 65:17 i minim “wan niufala gavman, o wan niufala kingdom.”—Volium 4, pej 122.
Maet Yu Laekem Hemia Tu
ANSA WE BAEBOL I GIVIM
?Yu Ting Se God i Gat Wan Prapa Ples Blong Hem?
?Baebol i talem se God i stap wea? ?Jisas tu i stap long sem ples ya?
ESSENTIAL BIBLE TEACHINGS
?Wanem Ya Kingdom Blong God?
Taem Jisas i stap prij long wol ya, hem i tokbaot Kingdom blong God moa i bitim ol narafala samting. Blong plante yia, ol man blong hem oli prea blong Kingdom ya i kam.
ANSA WE BAEBOL I GIVIM
?Hu i Go Long Heven?
Hem i wan rong tingting se evri gudfala man bambae oli go long heven. ?Baebol i tijim wanem?
