?Tok Blong God Hem i Hu No Hem i Wanem?
Ansa we Baebol i givim
Plante taem “tok blong God” i minim wan mesej we i kam long God o plante mesej. (Luk 11:28) Be long sam ples long Baebol, “Tok Blong God” o “Tok” i wan taetel.—Revelesen 19:13; Jon 1:14.
Wan mesej we i kamaot long God. Plante taem ol profet oli talemaot se mesej blong olgeta i kamaot long God. Long stat blong profet tok blong Jeremaea, hem i talem se: “Tok blong Jehova i kamtru long mi.” (Jeremaea 1:4, 11, 13; 2:1) Taem profet Samuel i toktok wetem Sol blong talem se God i jusumaot hem olsem king, hem i talem se: “Yu yu wet fastaem, bambae mi talemaot tok blong God long yu.”—1 Samuel 9:27.
Wan taetel. Mo tu, long Baebol, “Tok” i wan taetel blong Jisas Kraes, taem hem i wan spirit long heven, mo taem hem i wan man long wol. Tingbaot sam risen from wanem yumi talem olsem:
Tok i laef i stap bifo long ol narafala kriesen. Baebol i talem se: “Bifo olgeta, long stat, i gat wan man i stap finis we nem blong hem Tok . . . Tok ya i stap wetem God long stat olgeta.” (Jon 1:1, 2) Jisas i “fasbon blong olgeta samting we God i mekem . . . hem i stap fastaem long olgeta narafala samting.”—Kolosi 1:13-15, 17.
Tok i kamdaon long wol olsem wan man. Baebol i talem se: “Tok ya i kam man mo i stap wetem mifala.” (Jon 1:14) Kraes Jisas i “lego olgeta samting ya, mo i kam olsem wan slef nomo, i kam man.”—Filipae 2:5-7.
Tok hem i Pikinini blong God. Olsem we yumi tokbaot antap, aposol Jon i talem se “Tok ya i kam man,” mo i gohed i se: “Mifala i luk glori blong hem we i olsem glori we wan papa i givim long stret pikinini blong hem, wan nomo we hem i gat.” (Jon 1:14) Mo tu, Jon i raetem se: “Jisas i Pikinini blong God.”—1 Jon 4:15.
Tok i gat ol fasin olsem God. Baebol i talem se: “Tok ya i wan god,” o “i gat fasin olsem God.” (Jon 1:1; An American Translation) Jisas i “stret pija blong God, i stap soemaot prapa fasin blong hem.”—Hibru 1:2, 3.
Tok i rul olsem wan king. Baebol i talem se long hed blong Tok Blong God, i gat plante “samting we oli putum long hed blong king.” (Revelesen 19:12, 13; futnot) Mo tu, Tok hem i “King blong ol king, mo Masta blong ol masta.” (Revelesen 19:16) Baebol i talem tu se Jisas i “King blong olgeta we oli king, mo i Masta blong olgeta we oli masta.”—1 Timoti 6:14, 15.
Tok i talemaot ol samting we God i talem long hem. I luk olsem se taetel ya “Tok” i soemaot se God i yusum hem blong talemaot ol save mo ol tok blong hem. Jisas i talem se hem i mekem wok ya, i se: “Papa we i sanem mi mi kam, hem nao i talem long mi samting we mi mas tokbaot mo tok we mi mas talem. . . . Taswe ol tok we mi stap talem, hemia ol tok we Papa i talem long mi blong mi talemaot.”—Jon 12:49, 50.