Pasova hem i lafet we ol man Jiu oli mekem blong tingbaot taem ya we God i mekem ol man Isrel we oli stap wok slef long Ijip, oli fri long yia 1513 Bifo Kraes. God i talem long ol man Isrel blong oli tingbaot taem ya evri yia, long namba 14 dei blong manis ya we ol man Jiu oli singaot se Abib, we biaen oli kolem se Nisan.​—Eksodas 12:42; Levitikas 23:5.

?From wanem oli kolem Pasova?

 Tok ya “Pasova” i joen wetem taem ya we God i panisim mo kilim evri fasbon blong ol man Ijip oli ded, be i sevem ol man Isrel. (Eksodas 12:27; 13:15) Bifo we God i mekem trabol ya long ol man Ijip, hem i talem long ol man Isrel blong oli ravem blad blong smol sipsip o nani long doa blong olgeta. (Eksodas 12:21, 22) Nao sipos God i luk blad ya long doa blong haos blong olgeta, bambae hem i “pasova” long haos mo i no kilim fasbon blong olgeta.​—Eksodas 12:​7, 13.

?Olsem wanem oli mekem Pasova long taem bifo?

 God i talem long ol man Isrel olsem wanem blong mekem Pasova. a Hemia sam samting we oli mas mekem:

•   Sakrefaes: Long namba ten dei blong manis ya Abib, wanwan famle i mas jusum wan sipsip (o nani) we i gat wan yia, mo long namba 14 dei, oli kilim hem. Long Pasova we ol man Jiu oli mekem fastaem, oli ravem blad blong anamol ya long ol pos blong doa blong haos, biaen oli rusum anamol ya fulwan, mo oli kakae.​—Eksodas 12:​3-9.

•   Kakae: Ol man Isrel oli kakae sipsip ya (o nani) wetem bred we i no gat is long hem mo lif we i konkon.​—Eksodas 12:8.

•   Lafet: Afta long lafet blong Pasova, ol man Isrel oli mekem Lafet Blong Bred We i No Gat Is long hem. Long ol seven dei blong lafet ya, oli no kakae bred we i gat is long hem.​—Eksodas 12:17-​20; 2 Kronikel 30:21.

•   Tijim ol pikinini: Long taem blong Pasova, ol papa mo mama oli tijim ol pikinini long saed blong Jehova God.​—Eksodas 12:25-27.

•   Wokbaot: Plante yia biaen, ol man Isrel oli wokbaot i go long Jerusalem blong mekem lafet blong Pasova.​—Dutronome 16:​5-7; Luk 2:​41.

•   Sam narafala kastom: Long taem blong Jisas, oli singsing mo oli dring waen tu long lafet blong Pasova.​—Matiu 26:19, 30; Luk 22:15-​18.

Giaman toktok long saed blong Pasova

 Giaman: Ol Kristin oli mas mekem lafet blong Pasova.

 Trutok: Afta we Jisas i mekem lafet blong Pasova long Nisan 14 long yia 33, hem i stanemap wan niufala lafet: hemia Kakae Blong Masta. (Luk 22:19, 20; 1 Korin 11:20) Kakae ya i tekem ples blong Pasova, from we i mekem yumi tingbaot sakrefaes blong “Kraes we i smol sipsip.” (1 Korin 5:7) Ransom sakrefaes blong Jisas i moa gud long hemia blong Pasova, from we i mekem se ol man oli no moa slef blong sin mo ded.​—Matiu 20:28; Hibrus 9:​15.