SAMTING WE I TRU

Long wol tede, plante samting oli stap jenis, mo hemia i save mekem yumi wari. Ol wari blong laef, oli save mekem man i harem nogud mo i fraet.

?BAEBOL I TALEM WANEM?

King Deved i talem se: “?Bambae mi mi stap long trabol gogo kasem wetaem? ?Bambae mi stap harem nogud long tingting blong mi long dei mo long naet gogo kasem wetaem?” (Ol Sam 13:2) ?Wanem i givhan long Deved blong i no moa wari? Hem i prea mo i talemaot tingting blong hem long God, mo i trastem God blong i givhan long hem. (Ol Sam 13:5; 62:8) Long sem fasin, God i wantem se yumi talemaot ol wari blong yumi long hem. 1 Pita 5:7 i talem se: “Yufala we i stap wari tumas, yufala i mas putum ol trabol blong yufala long han blong [God], from we oltaem hem i stap tingbaot yufala.”

Samtaem yumi save winim ol wari blong yumi, taem yumi traehad blong mekem wan gudfala samting. Eksampol, Pol i traehad blong leftemap tingting blong ol man long jos, we hem i “stap tingting tumas” long olgeta. (2 Korin 11:28) Long rod ya, Pol i soemaot se hem i wari long wan gudfala samting, from we hem i wantem tumas blong givhan long narafala. Hemia wan gudfala fasin we yumi tu, yumi wantem mekem. Sipos yumi no tingbaot blong givhan long narafala, hemia i soemaot se yumi no lavem olgeta.​—Ol Proveb 17:17.

“Yufala evriwan i mas givgivhan long yufala long laef blong yufala. I nogud wan man i stap lukaot long laef blong hem nomo.”​—Filipae 2:4.

SAMTING WE I TRU

Plante man, maet oli wari tumas from ol nogud fasin we oli mekem bifo, oli wari long ol samting we bambae i hapen long fiuja, no oli wari from mane. *

?BAEBOL I TALEM WANEM?

Yu no mas wari tumas from ol nogud fasin we yu mekem bifo: Long taem blong ol aposol, sam man oli bin mekem ol nogud fasin bifo we oli kam Kristin. Oli stap dring bitim mak, oli mekem bisnes blong stilim mane, oli mekem rabis fasin blong man wetem woman, mo oli stap stil. (1 Korin 6:9-11) Be biaen, oli jenisim fasin blong olgeta, mo oli gat strong tingting se God i fogivim olgeta finis. Ol Sam 130:4 i talem se: “Yu yu stap fogivim mifala, yu stap tekemaot ol sin blong mifala, nao mifala i stap bodaon long yu, mifala i stap ona long yu.”

Yu no mas wari tumas from fiuja: Jisas i talem se: “I nogud yufala i stap tingting tumas from ol samting blong tumora. Ol bisnes blong tumora i blong tumora.” (Matiu 6:25, 34) Jisas i wantem soemaot se, i gud we yumi tingbaot blong winim ol problem blong tede, i bitim we yumi stap wari tumas from ol samting blong fiuja. Hemia i save mekem se yumi gat wan gudfala tingting mo yumi save mekem ol gudfala desisen. Mo tu, yumi mas tingbaot se, plante samting we yumi stap wari tumas long hem, oli no impoten.

Yu no mas wari tumas from mane: Wan man long Baebol i prea long God se: ‘Plis yu mekem we mi no save kam puaman, mo mi no save kam rijman tu.’ (Ol Proveb 30:8) Man ya i soemaot se hem i glad nomo long ol samting we hem i gat long laef, mo fasin ya i mekem God i glad long hem. Hibrus 13:5 i talem se: “I nogud yufala i laekem mane tumas. Sipos yufala i gat wanem samting, be yufala i mas harem gud long hem, from we God i talem se: ‘Bambae mi mi no save livim yu yu stap yu wan. Bambae mi mi no save lego yu samtaem.’” Mane i wan samting we i no save givhan long yumi oltaem. Be God, oltaem nomo hem i stap lukaotgud long olgeta we oli trastem hem, mo oli glad long samting we oli gat.

“Neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.”​—Ol Sam 37:25.

?OL MAN OLI TALEM WANEM?

Long niuspepa ya, The Guardian, we Harriet Green i raetem long 2008, i talem se: “Yumi laef long wan taem we plante man oli wari tumas from ol samting blong laef.” Long 2014, Patrick O’Connor, i raetem long magasin ya Wall Street Journal, i se: “Tede, ol man Amerika oli stap wari moa from ol samting blong laef, i bitim ol yia bifo.”

?BAEBOL I TALEM WANEM?

Baebol i talem se: “Taem man i stap wari, fasin ya i stap mekem tingting blong hem i hevi, be gudfala tok blong fren blong hem i save leftemap tingting blong hem bakegen.” (Ol Proveb 12:25) Ol “gudfala tok” we oli save leftemap tingting blong man, oli kamaot long ‘gud nius blong Kingdom blong God.’ (Matiu 24:14) Kingdom ya, hem i gavman blong God. Mo i no longtaem Kingdom ya bambae i tekemaot sik mo ded, mo ol narafala rabis samting we oli stap mekem man i wari tumas. Baebol i talem se: “[God] bambae i ravemaot wota blong ae blong [yumi]. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.”​—Revelesen 21:4.

“God nomo i save mekem we yumi putum tingting blong yumi i stap strong long hem. Mo . . . we hem bambae i mekem yufala i glad tumas, nao oltaem, bambae yufala i gat pis long tingting blong yufala from we yufala i bilif long hem.”​—Rom 15:13.