Nicolas mo Céline i fesem wan defren problem. Tufala i agri blong muv i go long wan niu kongregesen olsem we branj ofis blong Franis i askem long tufala. Tufala i talem se: “Long stat, mitufala i glad tumas, be i no longtaem afta, mitufala i stat blong misim ol fren blong mitufala. Mitufala i no fren gud yet wetem ol brata mo sista long niu kongregesen blong mitufala.” a Yes, i no isi. ?Taswe, yu save mekem wanem blong stap glad taem yu muv i go long wan niu kongregesen? ?Ol narafala oli save mekem wanem blong givhan? ?Wanem ol blesing we yu save kasem? ?Mo olsem wanem yu save givhan long niu kongregesen blong yu?

FO STAMBA TRUTOK WE I SAVE HALPEM YU BLONG STAP GLAD

1. Dipen Long Jehova. (Sam 37:5) Kazumi we i stap long Japan, i muvaot long kongregesen we hem i bin stap long hem blong 20 yia, taem i folem hasban blong hem we i muv i go wok long wan narafala ples. ?Olsem wanem Kazumi i “putum ol samting long laef blong [hem] long han blong Jehova”? Hem i talem se: “Taem mi fraet, mi harem se mi stap mi wan, mo mi wari, plante taem mi talemaot long Jehova. Mo evritaem we mi talemaot filing blong mi long hem, mi haremsave se hem i givim paoa long mi.”

?Be olsem wanem yu save trastem moa Jehova? Traem tingbaot, wan plant i nidim wota mo gudfala samting long graon, blong i save gru gud. Long sem fasin, yumi mas fidim bilif blong yumi blong i save gru gud o i kam strong. Nicolas we yumi tokbaot hem finis, i luk se taem hem i tingting dip long eksampol blong Ebraham, Jisas, mo Pol, we oli mekem plante sakrefaes blong oli save mekem wok blong God, hemia i halpem hem blong trastem moa se Jehova i naf blong sapotem hem tu. Sipos yu gat wan gudfala program blong stadi Baebol, hemia bambae i halpem yu blong dil wetem eni jenis we i hapen long laef blong yu, be tu,  yu save yusum ol save we yu lanem, blong leftemap tingting blong olgeta long niufala kongregesen blong yu.

2. No skelem kongregesen blong yu bifo wetem niuwan. (Pri. 7:10) Taem Jules i aot long Benin i go long Yunaeted Stet, hem i mas lanem wan niufala kalja we i defren olgeta. Hem i talem se: “Mi harem olsem se mi mas tokbaot ful laef blong mi long evri man we mi mitim olgeta.” Hem i no lan long fasin ya from we i defren olgeta long ples blong hem, taswe hem i stat blong no moa joen wetem ol brata mo sista. Be biaen, taem hem i stat blong save gud moa ol brata mo sista, hem i jenisim tingting blong hem. Hem i talem se: “Mi luksave se nomata weples long wol yumi go long hem, ol man oli sem mak nomo, be fasin mo tingting blong olgeta nao i defren. Taswe i impoten blong akseptem se oli olsem.” I nogud yu skelem niufala kongregesen ya wetem hemia we yu stap long hem bifo. Wan paenia sista we nem blong hem Anne-Lise, i talem se: “Mi no muv i kam blong faenem sem samting we mi lego, be mi kam blong faenemaot sam niufala samting.”

Ol elda tu oli no mas skelem kongregesen blong olgeta bifo wetem niuwan. Sipos olgeta long niufala kongregesen oli mekem samting long fasin we i defren smol, hemia i no min se oltaem i rong. I gud yu traem kasemsave fastaem long situesen blong ol lokol brata mo sista, bifo we yu talem wan tingting. (Pri. 3:​1, 7b) I moa gud we ol brata oli lanem samting tru long eksampol blong yu, i bitim we yu traem fosem olgeta blong oli folem tingting blong yu nomo.—2 Kor. 1:24.

3. Joen wetem kongregesen. (Fil. 1:27) Taem yu muv i go long wan niufala ples, hemia i nidim plante taem mo paoa, be i impoten tumas we yu go long olgeta miting sipos yu naf, mo yu no mas tekem longtaem blong go. From we sipos olgeta long niufala kongregesen blong yu oli neva luk yu, o oli luk yu wanwan taem nomo, ?olsem wanem nao oli save givhan long yu? Lucinda, we i muv i go long wan bigfala taon blong Saot Afrika wetem tufala gel blong hem, i talem se: “Mi kasem advaes se mifala i mas joen fulwan wetem kongregesen, prij wetem ol narafala, mo givim ansa long ol miting. Mo tu, mifala i letem ol brata oli yusum haos blong mifala blong mekem miting blong prij.”

Taem yu wok “olsem wan tim” wetem ol brata mo sista long niufala kongregesen blong yu blong mekem ol tiokratik wok, yu stap mekem bilif blong yu mo blong ol narafala i kam strong. Anne-Lise, we yumi tokbaot hem finis, i talem se hem i glad tumas taem ol elda oli traem mekem se hem i prij wetem evriwan long kongregesen. ?Wanem i kamaot from? Hem i talem se: “Kwiktaem nomo mi luksave se hemia nao beswan rod blong mekem mi harem se mi pat blong kongregesen.” Mo tu, taem yu volontia blong joen long wok blong klinim mo mentenem Haos Kingdom, yu soemaot se naoia yu tingbaot niufala kongregesen ya olsem kongregesen blong yu. Taem yu joen fulwan long ol samting olsem, bambae kongregesen i glad long yu, mo kwiktaem nomo yu tu bambae yu harem se kongregesen ya i olsem famle blong yu.

 4. Traem faenem ol niu fren. (2 Kor. 6:​11-13) Beswan rod blong faenem ol niu fren, hemia blong soem intres long olgeta. Taswe, i gud yu go eli long ol miting mo stap smoltaem afta blong storian wetem ol brata mo sista, mo traem save gud olgeta, mo antap moa nem blong olgeta. Sipos yu tingbaot nem blong olgeta, yu kaen, mo yu fren gud wetem olgeta, i sua se bambae yu faenem plante niufala fren.

I nogud yu traem blong jenisim ol fasin blong yu blong mekem ol man oli laekem yu, be i gud yu letem ol brata mo sista oli save ol prapa fasin blong yu. Yu save mekem olsem Lucinda we i talem se: “Mifala i kam ol gudfala fren naoia, from we mifala i tekem faswan step blong singaot olgeta oli kam long haos blong mifala.”

“YUFALA I MAS WELKAMEM YUFALA”

Sam man oli fraet blong kam insaed long Haos Kingdom, sipos oli no save eni man. ?Taswe, yumi mas mekem wanem long ol niuwan we oli kam long kongregesen blong yumi? Aposol Pol i talem se: “Yufala i mas welkamem yufala olsem we Kraes tu i stap welkamem yufala.” (Rom 15:7) Ol elda oli save folem fasin blong Kraes, taem oli welkamem gud ol niuwan we oli kam. (Yu luk bokis ya “ ?Wanem i Save Halpem Yu Blong Evri Samting i Ron Gud Taem Yu Muv?”) Be evriwan long kongregesen wetem ol pikinini tu oli save mekem ol niuwan oli harem gud.

Welkamem gud ol narafala, i minim tu se yu singaot olgeta oli kam long haos blong yu, mo yu mekem samting blong givhan long olgeta. Hemia nao samting we wan sista i mekem, hem i yusum taem blong hem blong tekem wan sista i go long taon mo soem ol ples long hem, mo tu i eksplenem long hem olsem wanem blong tekem ol pablik transpot. Samting we sista ya i mekem, i rili tajem hat blong sista ya we i jes kam, mo hemia i halpem hem blong i lan kwiktaem.

WAN JANIS BLONG GRU

Taem wan lokis i stap kam bigwan, hem i jenisim skin blong hem plante taem bifo we ol wing blong hem oli naf blong flae. Long sem fasin, taem yu muv i go long wan niu kongregesen, yu mas sakemaot eni nogud tingting we i save blokem yu  blong mekem moa long wok blong Jehova. Nicolas mo Céline i talem se: “Taem yu muv i go long wan niu kongregesen, hemia i wan nambawan trening. Taem yumi stap lan long wan niufala ples, mo dil wetem ol man we fasin mo tingting blong olgeta i defren, yumi stap wokem sam niufala fasin.” Jean-Charles, we yumi tokbaot hem finis, i tokbaot olsem wanem hemia i givhan long famle blong hem, i se: “Taem mifala i muv i go long wan niu kongregesen, hemia i halpem tufala pikinini blong oli gohed gud. Afta long sam manis nomo, gel blong mitufala i stat blong mekem sam tok long miting blong medel wik, mo boe blong mitufala i kam wan pablisa we i no baptaes.”

?Olsem wanem sipos yu no naf blong muv i go long ples we i gat moa nid? Sipos i olsem, i gud yu traem folem sam long ol advaes we yumi tokbaot antap, long kongregesen blong yu. Taem yu trastem Jehova, bambae yu joen fulwan wetem kongregesen. Yu mekem olsem taem yu mekem plan blong prij wetem ol defdefren brata mo sista, yu traem blong gat ol niufala fren o mekem bilif blong ol brata mo sista i kam strong. ?Olsem wanem? ?Yu yu naf blong halpem ol niuwan o olgeta we oli nidim help? Lav nao i makemaot ol tru Kristin, taswe sipos yu tekem taem blong halpem ol narafala, yu stap givhan long yu wan tu blong yu kam bigman long ol Kristin fasin. (Jon 13:35) Mo yu save sua se “God i glad long ol kaen sakrefaes olsem.”—Hib. 13:16.

!I no isi blong muv i go long narafala ples, be nating se i olsem, plante Kristin oli muv i go long wan niufala kongregesen! Taswe, yu tu yu naf blong mekem olsem. Anne-Lise i talem se: “Taem mi jenisim kongregesen, hemia i halpem mi blong faenem ol niufala fren.” Naoia we Kazumi i muvaot, hem i talem se: “Bambae yu luk we Jehova i halpem yu long sam rod we yu neva tingbaot bifo.” ?Mo olsem wanem long Jules? Hem i talem se: “Ol fren we mi gat, oli mekem mi harem gud. Naoia mi harem olsem se mi pat blong niufala kongregesen ya, mo bambae i had blong mi lego olgeta.”