PASCAL i gruap long wan pua famle long Côte d’Ivoire. Hem i wantem tumas blong gat wan gudfala laef. Hem i laekem boksing, ale hem i stap tingting se: “?Bambae mi go wea blong mi save kam wan jampion mo kam rijman?” Taem hem i gat samwe 25 yia, hem i mekemap tingting blong hem se bambae hem i go long Yurop. Be hem i no gat paspot blong go long Yurop. Ale, hem i plan se bambae hem i haed nomo blong go.

Long 1998, Pascal i lego ples blong hem blong go long Yurop. Long taem ya, hem i gat 27 yia. Hem i krosem boda i go long Gana, mo i go long Togo mo i gokros long Benin. Biaen hem i kasem taon ya, Birni Nkonni long Naeja. Be naoia, rod blong hem i kam had moa. Hem i wantem go long not, be blong mekem olsem, hem i mas jam long wan trak mo krosem bigfala draeples blong Sahara. Mo taem hem i kasem Mediteranian Si, hem i mas tekem wan bot blong go long Yurop. Hemia nao plan blong hem. Be i gat tu samting we i hapen long hem long Naeja.

Faswan samting se hem i no moa gat mane. Mo seken samting se hem i mitim wan paenia we nem blong hem Noé, mo Noé i stadi Baebol wetem hem. Samting we Pascal i lanem long Baebol i pulum tingting blong hem bigwan, mo i jenisim tingting blong hem tu long saed blong laef. Hem i no moa wantem kam wan jampion mo wan rijman, be hem i wantem fren gud wetem Jehova. Long Disemba 1999, Pascal i baptaes. Hem i wantem tumas blong talem tangkiu long Jehova, ale long 2001, hem i stat blong mekem wok blong paenia long Naeja. Hemia ples we hem i bin save trutok long hem. ?Wanem tingting blong hem long wok blong paenia? Hem i talem se: “!Mi mi harem gud tumas from we hemia beswan taem long laef blong mi!”

Plante pablisa oli olsem Pascal. Oli luksave se oli save harem gud moa sipos oli yusum laef blong olgeta blong mekem wok blong Jehova. Samfala oli lego ples blong olgeta long Yurop blong go long Afrika, from we i nidim moa man blong talemaot gud nius blong Kingdom long ples ya. Samwe long 65 Witnes we oli gat bitwin 17 mo 70 yia, oli aot long Yurop, blong go long ol kantri blong Wes Afrika olsem Benin, Bukina Faso, Naeja, mo Togo. * ?Wanem i pusum olgeta blong oli mekem ol bigfala jenis ya long laef blong olgeta? ?Mo wanem gudfala samting i kamaot from?

Anne-Rakel i blong Denmak. Hem i talem se: “Papa mo mama blong mi, tufala i bin mekem wok blong misinari long Senegal. Oltaem tufala i tokbaot glad we tufala i kasem from wok blong misinari, mo samting ya i mekem se mi tu mi wantem gat wan laef olsem.” Taem Anne-Rakel i gat bitim 20 yia blong hem, hem i go long Togo, mo i joen long wan kongregesen blong saen lanwis. Hemia samwe 15 yia i pas finis. ?Desisen blong hem i givhan long ol narafala olsem wanem? Hem i talem se: “Smoltaem biaen, smol sista blong mi mo brata blong mi tu, tufala i kam long Togo.”

 Aurele i wan brata long Franis we i gat 70 yia blong hem mo i mared. Hem i talem se: “Faef yia bifo, mi mi ritae. Long taem ya, mi mas mekem wan desisen: Mi save stap long Franis mo harem gud long laef, mo mi wet se Paradaes i kam, no mi save mekem moa long wok blong Jehova.” Aurele i jusum blong mekem moa long wok blong Jehova. Klosap tri yia i pas, hem mo woman blong hem, Albert-Fayette, tufala i go long Benin. Aurele i talem se: “Beswan samting we mitufala i mekem long laef blong mitufala, hemia se mitufala i givim taem mo paoa blong mitufala, blong kam mekem wok blong Jehova long ples ya.” Hem i smael mo i gohed i se: “Gudfala samting we i kamaot se, haf blong teritori blong mifala we i stap klosap long solwota, i olsem Paradaes.”

Naoia i mekem 16 yia finis we Clodomir mo woman blong hem, Lysiane, tufala i aot long Franis blong go long Benin. Fastaem, tufala i harem nogud blong lego ol famle mo ol fren blong tufala long Franis. Mo tufala i wari tu se maet tufala i no save lan long niufala ples ya. Be taem tufala i stap long Benin, tufala i no wari nating. Tufala i glad we tufala i glad. Clodomir i talem se: “Long ol 16 yia ya, mitufala i givhan long 16 man blong oli save trutok.”

Sébastien mo woman blong hem Johanna, tufala i blong Franis mo tufala i go long Benin long 2010. Sebastien i talem se: “I gat plante wok blong mekem long kongregesen. Mo from we i gat plante wok blong mekem long teritori tu, mitufala i lan kwiktaem long laef mo lanwis blong ol manples, i olsem we mitufala i bin tekem wan sot trening blong lanem plante wok blong ogenaesesen.” ?Olsem wanem long ol man we oli prij long olgeta? Johanna i talem se: “Ol man oli hanggri from trutok. Nating sipos mifala i no prij, be ol man oli stopem mifala long rod blong askem kwestin long mifala, mo oli askem ol buk tu.” ?Desisen blong tufala i givhan long mared blong tufala olsem wanem? Sébastien i talem se: “Desisen blong mitufala i mekem mared blong mitufala i kam strong moa. Mi mi glad tumas taem mi spenem wan fuldei wetem woman blong mi long wok blong prij.”

Eric mo woman blong hem Katy, tufala i mekem wok blong spesel paenia long wan ples long not blong Benin, we i no gat tumas man long hem. Samwe 10 yia bifo, taem tufala i stap long Franis, tufala i stap ridim ol buk blong yumi we oli tokbaot ol ples we i nidim moa man blong talemaot gud nius. Mo tu, tufala i toktok wetem ol brata mo sista we oli mekem wok blong Jehova fultaem. From samting ya, tufala tu i wantem go long wan narafala ples blong prij. Mo hemia nao samting we tufala i mekem long 2005. Taem tufala i stap long Benin, tufala i luk we namba blong ol man we oli kam long trutok i kam antap bigwan. Eric i talem se: “Tu yia bifo, grup blong mifala long Tanguiéta i gat 9 pablisa nomo, be naoia i gat 30. Long Sande, i gat bitwin 50 mo 80 man oli kam long miting. !Taem mitufala i luk samting ya, mitufala i glad we i glad!”

?Wanem sam hadtaem we ol brata we oli go prij long narafala ples oli kasem? Benjamin i gat 33 yia, mo hem i brata blong Anne-Rakel. Long yia 2000, taem hem i stap long Denmak, hem i mitim wan brata we i mekem wok blong misinari long Togo. Benjamin i talem se: “Taem mi talem long misinari ya se mi wantem mekem wok blong paenia, hem i talem long mi se: ‘!I gud yu go mekem wok blong paenia long Togo!’” Benjamin i stap tingting long toktok blong brata ya. Hem i talem se: “Long taem ya, mi no gat 20 yia yet, be tufala sista blong mi tufala i stap mekem wok blong Jehova long Togo finis. Hemia i mekem i moa isi long mi blong go longwe.” Ale hem i go. Be i gat wan samting we i mekem i had long hem. Benjamin i talem se: “Mi no save toktok Franis nating. Ol fas sikis manis oli rili had from we mi no save storian gud wetem ol man.” Sloslo Benjamin i kam gud moa. Naoia, hem i wok long Betel long Benin. Wok blong hem i blong sanem ol buk i go long ol defren kongregesen, mo hem i givhan tu long ol brata we oli wok long dipatmen blong kompiuta.

Bifo, Eric mo Katy i stap long wan kongregesen long Franis we ol pablisa oli toktok narafala lanwis. ?Laef blong Wes Afrika i defren olsem wanem? Katy i talem se: “I no isi blong faenem wan ples we i stret blong stap long hem. Mitufala i stap plante manis long wan haos we i no gat lektrik mo wota long hem.” Eric i talem se: “Ol man raonabaot long mifala oli plei miusik i laod gogo kasem let long naet. Yu mas gat longfala tingting long ol samting olsem, mo yu mas rere blong lan long olgeta.” Tufala tugeta i talem se: “Mitufala i glad tumas blong prij long wan ples we i no gat plante Witnes i prij long hem bifo. Mo glad ya i bigwan i bitim ol trabol we mitufala i fesem.”

Michel mo woman blong hem Marie-Agnès, tufala i blong Franis, mo tufala i gat samwe 55 yia. Klosap faef yia i pas, tufala i go long Benin. Fastaem tufala i wari. Michel i talem se: “Samfala oli talem se samting we mitufala i wantem mekem i no sef. I olsem se wan man i pusum wan wilbara, mo i wokbaot antap long wan wud blong krosem wan reva. !Mo mitufala i sidaon insaed long wilbara ya! Sipos yu no save se Jehova nao i pusum wilbara ya, bambae yu fraet. Taswe mitufala i no fraet, be mitufala i muv i go wetem Jehova, blong mekem wok blong hem.”

Olgeta brata mo sista we oli bin go prij finis long wan narafala ples, oli talem se i impoten tumas blong rere gud mo tingbaot ol samting ya: Yu mas mekem gud plan blong yu plante manis bifo we yu go. Yu mas rere blong lan long wan niufala ples. Yu no mas spenem moa mane i bitim mane we yu kasem. Mo yu mas trastem Jehova.—Luk 14:28-30.

Sebastien we yumi tokbaot hem finis, i talem se: “Bifo we mitufala i muv, mi mo Johanna i sevem mane blong tu yia. Mitufala i no spenem tumas mane long ol pleplei mo mitufala i no pem ol samting we mitufala i no nidim.” Evri yia,  tufala i wok long Yurop blong sam manis. Mo long ol narafala manis blong yia, tufala i save gohed blong mekem wok blong Jehova long Benin.

Marie-Thérèse i no mared. Hem i wan long ol 20 singel sista we oli go long Wes Afrika blong prij. Taem hem i stap long Franis, wok blong hem i blong draevem bas. Be long 2006, hem i askem blong i spel wan yia, blong hem i save go mekem wok blong paenia long Naeja. I no longtaem afta, hem i luksave se hemia nao samting we hem i wantem mekem long laef blong hem. Marie-Thérèse i talem se: “Taem mi gobak long Franis, mi talem long bos blong mi se mi wantem jenisim program blong wok blong mi, mo bos i glad nomo blong mekem olsem. Naoia, long manis Mei kasem Ogis, mi wok olsem bas draeva long Franis, mo long Septemba kasem Eprel, mi mekem wok blong paenia long Naeja.”

Olgeta we oli ‘lukaot Kingdom fastaem,’ oli save trastem Jehova se hem bambae i givim ol samting we oli nidim blong laef. (Mat. 6:33, NW) Yu traem tingbaot Saphira. Hem i wan sista we i no mared, mo hem i stap long Franis. Hem i gat samwe 25 yia, mo hem i mekem wok blong paenia long Benin. Long 2011, hemia namba faef yia we hem i stap long Afrika. Long yia ya, hem i gobak long Franis blong wok blong winim inaf mane blong givhan long hem, blong stap wan yia bakegen long Benin. Saphira i talem se: “Laswan dei blong wok blong mi, hem i wan Fraede. Be mi nidim blong wok tu moa wik blong mi save kasem inaf mane blong nekis yia. Mi gat tu wik nomo blong stap long Franis. Ale mi prea long Jehova, mi talemaot tingting blong mi long hem. Smoltaem biaen, wan kampani i ring long mi blong askem sipos mi save tekem ples blong wan woman, blong tu wik nomo.” Long Mande, Saphira i go long kampani ya, blong woman ya we bambae i spel i trenem hem. Saphira i talem se: “Mi mi sapraes tumas taem mi faenemaot se woman ya we bambae mi tekem ples blong hem, i wan Kristin sista. Hem i wantem spel tu wik blong i save joen long Skul Blong Paenia. Bos blong hem i wantem faenem wan man we i save tekem ples blong sista ya, bifo we hem i letem sista ya i spel. Ale, sista ya i mekem olsem we mi mi mekem. Hem tu i askem strong long Jehova blong i givhan long hem.”

Sam brata mo sista blong ol narafala ples tu oli go long Wes Afrika blong prij, mo oli stap long Afrika blong plante yia. Afrika i kam hom blong olgeta. Sam narafala oli stap sam yia, mo biaen oli gobak long ples blong olgeta. Be nating se i olsem, ol brata ya oli glad tumas long ol yia we oli bin spenem blong prij long wan narafala ples. Oli luksave se stamba samting we i givim glad, hemia blong mekem wok blong Jehova.