Leta i go long Kolosi 2:1-23
2 Mi mi wantem blong yufala i savegud se mi mi stap wok had blong givhan long yufala, mo long olgeta we oli stap long Laodisia,+ mo long olgeta narafala man we oli neva luk mi.*
2 Mi mi mekem olsem blong tingting blong olgeta evriwan i harem gud,+ mo blong lav i joenem gud olgeta,+ nao bambae oli kasem ol gudgudfala samting we i kamaot from fasin ya blong kasem savegud mining blong ol tok, wetem fasin ya blong kasem stret save long tabu tokhaed blong God, we hemia Kraes.+
3 God i haedem gud ol gudgudfala waes mo save insaed long hem.+
4 Mi mi talem olsem blong i no gat man i trikim yufala long ol swit tok blong hem.
5 Nating se mi mi no stap wetem yufala, be tingting blong mi i stap wetem yufala, mo mi glad blong luk we yufala i stap wok long fasin we i gat oda,+ mo blong luk we bilif blong yufala long Kraes i strong.+
6 From samting ya, olsem we yufala i agri finis long Masta Kraes Jisas, ale yufala i mas gohed blong wokbaot wetem hem.
7 Olsem we yufala i lanem finis, bilif blong yufala long hem i mas mekem yufala i strong,+ mo yufala i stanap strong olsem wan tri we rus blong hem i stap dip insaed long graon,+ mo bilif blong yufala i mas kam strong moa oltaem, taem yufala i stap talem tangkiu long God.+
8 Yufala i mas lukaot se i no gat man i mekem yufala i fas long trap. Man olsem i save yusum waes blong wol mo ol giaman tok we i blong nating nomo.+ Ol samting olsem oli stanap long kastom blong ol man mo long ol tingting blong wol, be i no folem Kraes,
9 from we fulwan fasin blong God i stap long hem.+
10 Hem i mekem se yufala i no sot long wan samting, mo hem nao i hed blong olgeta gavman mo blong olgeta we oli gat paoa.+
11 Yufala i joen long hem, taswe yufala i sakomsaes tu, be i no prapa sakomsaes we han blong man i wokem, nogat. Yufala i kasem sakomsaes ya taem hem i tekemaot bodi blong yufala we i gat sin,+ mo hemia wan sakomsaes we i blong Kraes.+
12 God i berem yufala wetem Kraes long baptaes blong hem.+ Mo from we yufala i joen wetem hem, God i mekem yufala i laef bakegen wetem hem+ from we yufala i bilif long ol wok blong God ya we i mekem hem i laef bakegen.+
13 Mo tu, nating se yufala i ded finis from ol rong blong yufala mo from we yufala i no sakomsaes, be God i mekem yufala i laef wetem hem.+ Long kaen fasin, hem i fogivim evri rong blong yumi.+
14 Mo hem i ravemaot* finis loa we oli raetem+ we i gat ol oda long hem,+ mo we oli agensem yumi.+ Hem i tekemaot loa ya taem hem i nilim long pos.*+
15 Hem i yusum pos ya* blong mekem olgeta gavman mo olgeta we oli gat paoa oli neked,+ mo hem i lidim olgeta oli goraon long fes blong ol man blong soemaot se hem i winim olgeta.
16 Taswe yufala i no mas letem man i jajem yufala from samting we yufala i kakae o yufala i dring.+ Mo yufala i no mas letem man i jajem yufala sipos yufala i folem o yufala i no folem ol lafet, mo lafet blong niu mun+ o blong wan sabat.+
17 Ol samting ya oli olsem sado nomo blong ol samting we oli stap kam,+ be Kraes nao hem i samting we i tru.+
18 I gat sam man oli giaman se tingting blong olgeta i stap daon mo oli harem gud long fasin ya, mo oli stap wosipim ol enjel.* Yufala i no letem ol man olsem oli tekemaot praes ya long yufala.+ Olgeta oli stanap strong long samting we oli luk. Mo oli kam praod from ol samting we oli blong nating nomo, from we tingting blong olgeta i stap long ol samting blong wol nomo.
19 Olgeta ya oli no joen long hed.+ Hed ya i stap yusum ol joen blong bodi mo ol waet string we i stap joenem ol bun, blong givim evri samting we bodi i nidim, mo i mekem ful bodi ya i joen gud. Mo hed ya i mekem bodi i gru long wei we God i wantem.+
20 Yufala i lego finis olgeta samting blong wol ya we i blong nating nomo taem yufala i ded wetem Kraes,+ ?be from wanem yufala i stap gohed yet blong folem wol, taem yufala i obei long ol oda blong hem we i talem se:+
21 “Yufala i no mas holem, yufala i no mas testem, mo yufala i no mas tajem”?
22 Ol oda ya oli stap tokbaot ol samting we oli lus taem man i kakae mo i dring olgeta. Ol oda ya, ol man nomo oli putumap mo oli stap tijim ol narafala man long hem.+
23 I luk olsem se ol oda ya oli waes gud, be oli no givhan long ol man blong oli agensem ol samting we bodi blong olgeta i wantem. Hemia i olsem from we ol man nomo oli jusum prapa rod blong olgeta blong wosipim God, mo oli giaman se tingting blong olgeta i stap daon, mo oli stap mekem bodi blong olgeta i safa.+
Ol futnot
^ PT: “we oli no luk fes blong mi.”
^ NT: “waepemaot.”
^ MNT: “hem.”
^ NT: “mo oli folem fasin blong wosip blong ol enjel.”
