Hed Kampani i wan smol grup blong ol Kristin we bilif blong olgeta i strong. Olgeta ya oli lidim ol Witnes blong Jehova long olgeta ples long wol. Oli lukaot long tu samting:

•   Oli lukaot long wok ya blong rerem ol save we oli stanap long Baebol we bambae oli kamaot long ol buk, ol miting, mo ol skul blong ol Witnes blong Jehova.—Luk 12:42.

•   Oli lukaot long wok blong ol Witnes blong Jehova long fulwol, taem oli lidim wok blong prij mo oli lukaot long ol samting we ol man oli givim olsem presen.

 Hed Kampani i folem eksampol blong “ol aposol mo ol elda” long Jerusalem long taem blong ol fas Kristin. Olgeta ya oli mekem ol bigfala desisen blong givhan long olgeta Kristin kongregesen. (Ol Wok 15:2) Olsem ol gudfala man ya bifo, ol memba blong Hed Kampani oli no ol lida blong ogenaesesen blong mifala. Olgeta oli lukaotem advaes blong Baebol blong lidim olgeta, mo oli luksave se Jehova God i putumap Jisas Kraes blong i Hed blong kongregesen.—1 Korin 11:3; Efesas 5:23.

 Stat long Jenuware 2018, olgeta we oli memba blong Hed Kampani, hemia: Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, mo Jeffrey Winder. Olgeta oli wok long hedkwota blong mifala long Brooklyn, New York, Yunaeted Stet.

 Hed Kampani i stanemap sikis komiti blong i lukaot long ol defdefren wok blong mifala, mo ol memba ya wanwan oli wok long wan komiti o moa.

•   Komiti Blong Ol Kodineta: Hem i lukaot long ol kot kes mo long ol narafala samting we i joen wetem loa. Mo taem i gat disasta long wan kantri, o ol man oli agensem ol Witnes, o ol brata oli kasem wan narafala trabol, komiti ya i lukluk long samting ya tu.

•   Komiti We i Lukaot Long Olgeta Long Betel: Hem i lukaot long evri samting we i joen wetem olgeta we oli slip mo oli wok long Betel.

•   Komiti We i Lukaot Long Wok Blong Printim Ol Buk: Hem i lukaot long wok blong pritim mo sanemaot ol buk i go long olgeta ples, mo i lukaot long wok blong bildim ol haos blong wosip, ol ofis blong translesen, mo ol branj ofis.

•   Komiti We i Lukaot Long Wok Blong Prij: Hem i lukaot long wok we mifala i mekem blong talemaot “gud nius” blong Kingdom.—Matiu 24:14.

•   Komiti We i Lukaot Long Wok Blong Tij: Hem i lukaot long wok blong rerem ol save blong God we bambae i kamaot long ol miting, long ol skul, mo long ol program blong odio mo video.

•   Komiti Blong Raetem Ol Buk: Hem i lidim wok ya blong rerem ol save blong God we ol man oli save ridim long buk mo long websaet blong mifala. Mo hem i lukaot long wok blong translesen.

 Antap long ol wok ya, Hed Kampani i mas mekem miting evri wik blong tokbaot ol nid blong ogenaesesen. Long ol miting ya, ol memba oli tokbaot ol samting we Baebol i talem mo oli letem tabu spirit blong God i lidim olgeta, mo oli traehad blong mekem se olgeta evriwan oli agri long wan tingting nomo taem oli mekem desisen.—Ol Wok 15:25.

 Hemia ol Kristin we man i save trastem olgeta, we oli stap givhan long ol komiti blong Hed Kampani. (1 Korin 4:2) Oli gat save mo oli naf blong wok aninit long komiti ya we oli stap long hem, mo olgeta tu oli joen long miting we Hed Kampani i stap mekem evri wik. Oli no joen blong mekem ol desisen, be oli givim ol gudfala advaes mo ol save we i givhan long Hed Kampani blong mekem ol desisen, mo oli lukaot long ol wok we i kamaot from ol desisen ya. Mo tu, Hed Kampani i save jusum olgeta blong oli go visitim ol brata long ol narafala ples long wol, mo blong givim sam tok long sam spesel miting olsem hemia we Hed Kampani i mekem evri yia, mo hemia blong Skul blong Gilead.