Aotsaed long laef blong taon we i bisi tumas mo we i gat plante noes, i gat ol man blong ol defren traeb, lanwis mo nesen we oli laef long forest blong Amason long Saot Amerika. So long Julae 2017, wan grup blong 13 Witnes blong Jehova oli mekem wan trip folem Maroni Reva mo ol smosmol branj blong hem long saed i go long is, long Franis Guyana. ?Wanem mak blong olgeta? Hemia blong tekem mesej blong Baebol we i givim hop i go long ol man we oli laef long saed blong reva ya.

 Wan manis bifo we oli statem 12 dei trip ya, evriwan we bambae oli go long trip ya, oli gat wan miting. Winsley i tingtingbak mo i talem se: “Mifala i lanem sam samting long saed blong eria we bambae mifala i go long hem mo histri blong hem, mo mifala i tokbaot tu olsem wanem mifala i save rerem mifala from trip ya.” Wanwan man i kasem wan wota pruf kontena blong i save putum wan hamok mo wan moskito net insaed long hem. Long trip ya oli flae tu taem long plen mo oli go long ol kenu blong plante aoa.

 ?Wanem filing blong olgeta we oli kasem invetesen blong go long trip ya? Claude mo Lisette, we tufala i gat samwe long 60 yia, tufala i kwik blong akseptem invetesen ya. Claude i talem se: “Mi mi glad we mi glad, be mi fraet smol. Mi bin harem plante stori long saed blong reva ya taem i ron strong.” Lisette i gat prapa tingting blong hem i se: “Mi stap tingting se olsem wanem mi save toktok long lanwis Amerindian.”

 Wan long olgeta we nem blong hem Mickaël i gat sem tingting olsem. Hem i se: “Mifala i no save plante samting long saed blong traeb ya Wayana, taswe mi mekem sam risej long intenet, blong lanem sam toktok mo olsem wanem blong talem halo long lanwis blong olgeta.”

 Shirley, we i go wetem hasban blong hem, Johan, i mekem wan lis blong ol lanwis we ol man long saed blong reva ya oli toktok long hem. Hem i talem se: “Mifala i daonlodem sam video long ol lanwis ya long jw.org mo mifala i kasem wan buk we i gat ol men toktok blong lanwis Wayana.”

 Long Tusde 4 Julae, grup ya i tekem plen long Saint-Laurent du Maroni mo oli flae i go long Maripasoula, wan smol taon we i stap insaed olgeta long French Guyana.

 Fo dei afta, grup ya i kasem ol man long ol vilej we oli stap long saed blong ol branj blong Maroni Reva. Oli yusum ol kenu we i gat enjin long olgeta, we oli singaot se piroke. Roland we i stap tu long grup ya i talem se: “Mifala i luk se ol Amerindian ya oli rili intres long ol topik blong Baebol. Oli gat plante kwestin mo sam long olgeta oli wantem we mifala i stadi Baebol wetem olgeta.”

 Long wan vilej, Johan mo Shirley i mitim wan yang kapol we woman ya, kasen sista blong hem i kilim hem wan i ded. Johan i talem se: “Mitufala i soem video ya A Native American Finds His Creator,” we i stap long JW Brodkasting. “Video ya i tajem hat blong tufala. Ale tufala i givim imel adres blong tufala from we tufala i wantem se mifala i gohed blong storian wetem tufala.”

 Ples we mifala i visitim we i longwe moa, hemia Antécume Pata. Long ples ya, jif blong vilej i letem ol Witnes we oli taed oli hangem ol hamok blong olgeta long pablik ples. Mo tu, oli swim long reva olsem we ol man ples oli mekem.

 Nao long ples ya, grup ya i go long vilej ya Twenké, mo oli luk ol man oli stap krae from oli lusum wan we oli lavem hem tumas long ded. Éric, wan long olgeta we i mekem plan blong trip ya, i talem se: “Wan ‛Bigman,’ hemia bigfala jif, i letem mifala i go olbaot blong leftemap tingting blong olgeta we oli stap harem nogud. Jif mo famle blong hem oli laekem tumas ol vas we mifala i ridim long olgeta, long Wayana Baebol. Mo mifala i soem tu ol video we oli tokbaot ol promes blong Baebol long saed blong laef bakegen.”

 Nekis haf blong trip blong mifala, mifala i tekem plen daon long Maripasoula mo flae haf aoa blong go long wan smol taon blong Grand-Santi. Long Tusde mo Wenesde, olgeta long grup ya oli talemaot ol mesej blong Baebol long ol man long ples ya. Long tasde, oli mekemrere from wan narafala trip—we i tekem faef mo haf aoa blong go daon long Maroni Reva, mo go long vilej ya Apatou.

 Nao klosap long laswan dei blong trip ya, grup ya i visitim wan vilej long fores blong Maroons. Vilej ya i blong olgeta we oli kamaot biaen long ol man Afrika we oli bin tekem olgeta oli go long Saot Amerika olsem slef, long taem we Surinam i rul. Ol Witnes oli invaetem evri man blong oli kam long wan miting we oli mekem long fores ya, insaed long wan bigfala tent we oli stanemap blong spesel taem ya. Claude i talem se: “Hat blong mifala i fulap long glad, taem mifala i luk we plante man oli kam. !Mifala i jes invaetem olgeta long moning ya nomo!” Karsten we fastaem blong hem blong go long wan trip olsem, i givim wan pablik tok long lanwis Aukan we stamba tok blong hem se “?Laef We Yu Gat Naoia, Hemia Nomo No i Gat Narawan Yet?” Naenti wan man we oli kamaot long ol defdefren vilej oli kam long miting ya.

 Biaen olgeta long grup ya oli gobak long Saint-Laurent du Maroni. Olgeta evriwan oli harem gud tumas from ol man long ples ya oli lesin gud, mo oli karem plante buk mo oli wajem plante video we ol Witnes blong Jehova oli wokem.

Lisette i talem se: “I no gat wan tok we mi save talem blong eksplenem glad we mi kasem taem mi joen long trip ya.” Cindy tu i agri, i talem se: “Sipos mi save go long trip ya bakegen, bae mi plis long olgeta blong mi save go. !Yu mas ekspiriensem glad ya blong yu kasem save!”

 Trip ya i mekem se sam brata mo sista oli wantem gobak bakegen. Mickaël i talem se: “!Mifala i rere blong mekem bakegen!” Winsley i muv i go stap long Saint-Laurent du Maroni. Claude mo Lisette, we tufala i gat samwe 60 yia, tufala i mekem desisen blong muv i go long Apatou.