Dahil sa teknolohiya, tibaad asahan kan saimong boss, mga katrabaho, o mga kliyente na available kang magtrabaho ano man na oras, kaya nagigin dipisil na lugod na balansehon an panahon na itinatao mo sa trabaho asin sa iba pang mga aspekto nin buhay, kaiba na an buhay may agom.

•  An dapat mong maaraman

•  An puwede mong gibuhon

•  An sinasabi nin mga mag-agom

•  Giya sa pag-uulay

•   Dahil sa teknolohiya, tibaad masakitan kang pagsuwayon an panahon mo para sa trabaho asin para sa agom mo. Huli kaiyan, sa kada makaresibi ka nin apod, e-mail, o text sa panahon na mayo ka na sa trabaho, pagmati mo garo baga emergency iyan na kaipuhan mo tulos asikasuhon.

   “Inaasahan ta na pagpuli sa harong haling trabaho, makakaibanan ta na an pamilya ta. Pero garo imposible na iyan ngunyan, dahil may nag-aarabot na e-mail saka apod haling trabaho kaya napapabayaan mo na lugod an agom mo.”—Jeanette.

•   Para mabalanse an itinatao mong panahon sa saimong trabaho asin sa pamilya, kaipuhan na may gibuhon ka. Kun dai ka magibo nin plano, posibleng marhay na makaapektar an trabaho mo sa pag-ibanan nindong mag-agom.

   “Sa parati an agom mo an napapabayaan mo ta iniisip mo, ‘Ah, maiintindihan niya man ako. Mapapatawad niya man ako. Mabawi na lang ako saiya sa sunod.’”—Holly.

•   Gibuhon na priyoridad an saindong pag-aguman. Sinasabi kan Bibliya: ‘Dai dapat pagsuhayon nin tawo an pinagsaro nin Diyos.’ (Mateo 19:6, An Marahay na Bareta Biblia) Kun dai mo ngani tutugutan an siisay man na tawo na ‘isuhay’ ka sa agom mo, taano ta tutugutan mo an saimong trabaho na gibuhon iyan?

   “Iniisip kan nagkapirang kliyente na dahil binabayadan ka ninda, dapat na makontak ka ninda ano man na oras na kaipuhanon ka ninda. Pero dahil priyoridad ko an agom ko, sinasabi ko sainda na dai ako available sa mga day off ko, pero kokontakon ko man sinda tulos.”—Mark.

   Haputon an sadiri, ‘Ipinaparisa daw kan mga ginigibo ko na ibinibilang kong mas mahalaga an agom ko kisa sa trabaho ko?’

•   Sayumahan an trabaho kun kaipuhan. Sinasabi kan Bibliya: “An kadunungan yaon sa mga hababa an buot.” (Talinhaga 11:2) An kababaan nin buot puwedeng makatabang saimo na marealisar na madunong kun sasayumahan o ipapasa mo sa iba an pira sa trabaho mo.

   “Tubero ako, kaya kun may saro na emerhensiyang nangaipo kan serbisyo ko, natural lang na ma-stress siya. Kun dai ko iyan kayang gibuhon sa oras na gusto niya, pigpapaapod ko na lang siya sa ibang tuberong bisto ko.”—Christopher.

   Haputon an sadiri: ‘Andam daw akong sayumahan an dagdag na mga trabaho tanganing dai mamati kan agom ko na pinapabayaan ko siya? Iniisip daw kan agom ko na andam akong gibuhon iyan?’

•   Mag-iskedyul nin panahon na makaibanan an saimong agom. Sinasabi kan Bibliya: “May itinalaan na panahon para sa gabos na bagay.” (Eclesiastes 3:1) Pag dakulon an trabaho mo, iyan man an panahon na mas kaipuhan mong mag-iskedyul o magtalaan nin panahon para sa saimong agom.

   “Sa parati pag nagkakasarabay-sabay an trabaho, nag-iiskedyul kami nin oras—dawa kun pamanggihan lang ’yan o paglakaw-lakaw sa may baybayon—na diyan magkakaibanan kami na mayong makakadisturbo.”—Deborah.

   Haputon an sadiri: ‘Nag-iiskedyul daw ako nin mga panahon na diyan matatawan ko nin bilog na atensiyon an agom ko? Ano an masasabi ni agom manungod sako dapit digdi?’

•   I-off an mga gadyet. Sinasabi kan Bibliya: “[Siyertuhon] nindo kun ano an mas importanteng mga bagay.” (Filipos 1:10) Puwede mo daw i-off paminsan-minsan an mga gadyet mo para dai ka madisturbo nin mga mensahe o apod sa trabaho?

   “Hinihinguwa ko talagang ipundo an ano man na trabaho sa sarong espesipikong oras. Puon sa oras na iyan, pig-o-off ko an mga notification sa cellphone ko.”—Jeremy.

   Haputon an sadiri: ‘Naoobligar daw ako na siguraduhon na naka-on pirmi an gadyet ko engkaso kontakon ako ni boss o kan kliyente ko? Ano an masasabi ni agom manungod sako dapit digdi?’

•   Magin rasonable. Sinasabi kan Bibliya: “Mahayag lugod sa gabos na tawo an saindong pagigin rasonable.” (Filipos 4:5) Totoo na an trabaho tibaad paminsan-minsan nakakasingit sa panahon na dapat kuta para sa agom mo. Halimbawa, tibaad an trabaho kan agom mo nangangaipo na makontak siya maski tapos na an oras nin trabaho. Dai mo hagadan an agom mo nin labi sa rasonable niyang maitatao.

   “May sadit na negosyo si agom, asin parating may dai inaasahan na mga bagay na kaipuhan niyang asikasuhon maski tapos na an oras nin trabaho. Kun minsan, nasusuya ako, pero dakul pa man giraray an panahon niya sako, kaya okey lang.”—Beverly.

   Haputon an sadiri: ‘Ipinapahiling ko daw ki agom na nasasabutan ko kun gurano kadakul an trabahong kaipuhan niyang gibuhon paagi sa dai sobra-sobrang paghagad saiya nin panahon o atensiyon? Ano an masasabi ni agom manungod sako dapit digdi?’

 Inot, puwedeng pag-isipan kan kada saro sa saindo an minasunod na hapot. Dangan, pag-ulayan nindo an saindong simbag.

•   Nagreklamo na daw saimo an agom mo na dinadara mo sa harong an trabaho mo? Kun iyo, uyon ka daw saiya?

•   Ano pang espesipikong mga bagay an sa hiling mo mapapauswag mo pa tanganing magin balanse an panahon na itinatao mo sa trabaho asin sa iba pang mga bagay?

•   Minsan daw naisip mong garo baga dai magibo kan saimong agom na pagdanayon lang an trabaho “sa lugar nin trabaho”? Kun iyo, may nagigirumduman ka daw na espesipikong mga pangyayari?

•   Anong mga pagbabago, kun igwa man, an gusto mong mahiling sa agom mo pag-abot sa panahon na itinatao niya sa trabaho saka sa iba pang mga bagay?