Sarong beses lang sinambit sa Bibliya an tatu, sa Levitico 19:28, na an sabi: “Dai nindo pagtatuan an saindong sadiri.” Dahil sa pagbuot na ini nin Diyos sa nasyon nin Israel, napapalain sinda sa kataraid nindang banwaan na naglalaag sa hawak ninda nin marka kan mga pangaran o simbolo kan saindang mga diyos. (Deuteronomio 14:2) Bagaman bako nang sakop kan Katugunan na itinao sa Israel an mga Kristiyano, dapat na pag-isipan na marhay an prinsipyo na binasaran kan katugunan na iyan.

Puwede daw na magpatatu an sarong Kristiyano?

 Makakatabang saimo an minasunod na mga teksto sa Bibliya sa bagay na iyan:

•   “An mga babae magin desente.” (1 Timoteo 2:9, An Marahay na Bareta Biblia) Aplikado an prinsipyong iyan sa mga babayi asin mga lalaki. Dapat tang igalang an mga namamatian kan iba asin likayan na makua an sobrang atensiyon kan iba.

•   May mga nagpapatatu para patunayan kun siisay sinda o an pagigin independiyente ninda. An iba man nagpapatatu para ipahiling na puwede nindang gibuhon an ano man sa hawak ninda. Pero dinadagka kan Bibliya an mga Kristiyano: “Ipresentar nindo an saindong mga hawak bilang atang na buhay, banal asin akseptable sa Diyos, na sa paaging iyan nagsasagibo kamo nin sagradong paglilingkod gamit an saindong kakayahan sa pangangatanusan.” (Roma 12:1) Gamiton an saimong “kakayahan sa pangangatanusan” para pag-isipan kun taano ta gusto mong magpatatu. Kun iyan dahil ta gusto mong makiuso o ipahiling na miyembro ka nin sarong partikular na grupo, tandaan na puwedeng magbago an isip mo pero an tatu permanente na. Kun pag-iisipan mo kun ano an motibo mo, matatabangan ka kaiyan na gumibo nin madunong na desisyon.—Talinhaga 4:7.

•   “An mga plano kan mahigos siguradong magigin mapanggana, pero an gabos na pabigla-bigla siguradong pasiring sa pagigin dukha.” (Talinhaga 21:5) An desisyon na magpatatu sa parati ginigibo nin pabigla-bigla, pero haloy an puwedeng magin epekto kaiyan sa relasyon mo sa iba asin sa trabaho, saka mahal asin makulog magpahali nin tatu. Ipinapahiling sa mga research—pati na sa nagdadakulang negosyo nin paghali nin tatu—na kadaklan sa mga nagpapatatu, pag-abot nin panahon, nagbasol na nagpatatu sinda.