An Namamahalang Grupo sarong sadit na grupo nin maygurang na mga Kristiyano na nagtatao nin paggiya sa Mga Saksi ni Jehova sa bilog na kinaban. Nababanga sa duwa an trabaho ninda:

•   Pinapangatamanan ninda an pagpreparar nin mga instruksiyon na basado sa Bibliya na itinatao paagi sa mga publikasyon, pagtiripon, asin mga paadalan kan Mga Saksi ni Jehova.​—Lucas 12:42.

•   Pinapangatamanan ninda an pambilog na kinaban na gibuhon kan Mga Saksi ni Jehova paagi sa pagdirehir sa samong pampublikong ministeryo asin paagi sa pangangataman sa paggamit kan mga donasyon.

 Sinusunod kan Namamahalang Grupo an arugan na itinao kan “mga apostol asin kamagurangan sa Jerusalem” kan inot na siglo na iyo an naggigibo kaidto nin mahalagang mga desisyon sa kapakanan kan bilog na Kristiyanong kongregasyon. (Gibo 15:2) Arog kan maimbod na mga lalaking idto, an mga miyembro kan Namamahalang Grupo bako mga lider kan samong organisasyon. Sa Bibliya sinda nag-aasa para sa paggiya, asin minimidbid na si Jesu-Cristo an ninombrahan kan Diyos na Jehova bilang Payo kan kongregasyon.​—1 Corinto 11:3; Efeso 5:23.

 An mga miyembro kan Namamahalang Grupo iyo si Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, asin Jeffrey Winder. Naglilingkod sinda sa samong world headquarters sa Warwick, New York, U.S.A.

 Nag-establisar an Namamahalang Grupo nin anom na komite na nangangataman sa manlain-lain na aspekto kan samong gibuhon, asin an lambang miyembro naglilingkod sa saro o labi pang komite.

•   Coordinators’ Committee: Nag-aasikaso sa legal na mga isyu asin sa pagtabang pag may kalamidad, pag pinepersegir an mga Saksi ni Jehova huli sa saindang mga paniniwala, asin pag may mga bagay na nakakaapektar sa mga Saksi ni Jehova na kaipuhan aksiyunan tulos.

•   Personnel Committee: Nag-aasikaso sa pangangaipo kan mga miyembro kan pamilyang Bethel.

•   Publishing Committee: Nag-aasikaso sa pag-imprenta asin pagpaktura (shipping) kan mga literaturang basado sa Bibliya asin sa pagtugdok nin mga lugar nin pagsamba, translation office, asin mga pasilidad kan sangang opisina.

•   Service Committee: Nangangataman sa samong gibuhon na paghuhulit kan ‘maugmang bareta kan Kahadian.’​—Mateo 24:14.

•   Teaching Committee: Nangangataman sa pagpreparar nin espirituwal na pagtutukdo na itinatao paagi sa mga pagtiripon, paadalan, saka mga audio asin video program.

•   Writing Committee: Nangangataman sa pagpreparar nin espirituwal na instruksiyon na itinatao paagi sa imprentadong format asin sa samong website. Pinapangatamanan man kaini an pagtradusir.

 Apuwera sa mga trabaho ninda sa mga komiteng ini, nagmimiting man an Namamahalang Grupo surusemana tanganing pag-ulayan an mga pangangaipo kan organisasyon. Sa mga miting na ini, tinutukar kan mga miyembro an sinasabi kan Kasuratan, asin nagpapagiya sinda sa banal na espiritu nin Diyos para makagibo nin nagkakasararong mga desisyon.​—Gibo 15:25.

 Mapagtitiwalaan sindang mga Kristiyano na nagtatabang sa mga komite kan Namamahalang Grupo. (1 Corinto 4:2) May kasanayan sinda asin eksperyensiya sa trabaho na pinapangatamanan kan komite kun sain sinda inasignar, asin kaiba sinda sa semanal na miting kaiyan. Dawa dai kaiba sa paggibo nin mga desisyon an mga paratabang, nagtatao sinda nin mahalagang mga suhestiyon asin impormasyon, iniimplementar an desisyon kan komite, asin minomonitor an mga resulta kaiyan. Puwede man sindang iasignar kan Namamahalang Grupo na dalawon an satong mga tugang sa manlain-lain na lugar sa kinaban o magpresentar nin mga kabtang sa mga okasyon arog kan taunan na mga miting o gradwasyon sa Gilead.