Si Marta, na saro sa mga Saksi ni Jehova sa Guatemala, nag-aadal nin lengguwaheng Kekchi para maipaabot an mensahe kan Bibliya sa mga tawo na nagtataram kan lengguwaheng iyan. Sarong aldaw, nahiling niya an sarong lalaki na paluwas sa ospital. Base sa itsura kaini, inisip ni Marta na hali ini sa sarong baryo na Kekchi an lengguwahe—sa sarong mabukid na lugar kun sain bihirang mahulitan kan mga Saksi ni Jehova. Dinulok niya ini saka kinaulay sa lengguwaheng Kekchi, dawa dai pa siya gayong tatao.

 Inalukan ni Marta an lalaki nin pag-adal sa Bibliya. Maugmang inako kaini an alok niya pero sinabi kaini na mayo siyang kuwartang ibabayad. Ipinaliwanag ni Marta na mayong bayad an pag-adal nin Bibliya sa mga Saksi ni Jehova. Sinabi niya pa sa lalaki na puwede sindang mag-adal paagi sa cellphone saka puwedeng umiba an bilog na pamilya kaini. Nag-uyon an lalaki. Dahil tataong magtaram saka magbasa nin Spanish an lalaki, tinawan ini ni Marta nin kopya kan New World Translation of the Holy Scriptures sa lengguwaheng Spanish. Tinawan niya man ini nin kopya kan pantabang sa pag-adal nin Bibliya na Ano Man Nanggad an Itinotokdo kan Biblia? sa lengguwaheng Kekchi. Kan suminunod na semana, an lalaki, an saiyang agom, saka an duwa nindang aki nagpuon na makipag-adal nin Bibliya ki Marta paagi sa cellphone. Duwang beses sa sarong semana sindang nag-aadal. “Dahil bako pa akong matibay mag-Kekchi,” an sabi ni Marta, “nag-aadal kami sa lengguwaheng Spanish, tapos pig-i-interpret niya iyan sa saiyang agom. An mga aki ninda nakakasabot nin Spanish.”

 An lalaking idto sarong pastor sa saindang simbahan. Pinunan niyang itukdo sa mga miyembro kan simbahan an nanunudan niya sa saiyang pag-adal sa Bibliya. Nagustuhan ninda an nadangog ninda asin hinapot siya kun sain niya nanudan an bagong mga katukduan na iyan. Kan sabihon niya sainda an manungod sa pag-adal niya sa Bibliya, pasaro-saro na uminiba na man sinda sa pag-adal. Dai nahaloy, mga 15 katawo na sindang nagtitiripon kada semana para makipag-adal ki Marta gamit an cellphone. Nagbubugtak sinda nin mikropono kataid kan cellphone para madangog iyan kan gabos.

 Kan iistorya ni Marta sa mga elder sa saindang kongregasyon an manungod sa mga Bible study niyang ini, saro sa mga elder an nagbisita sa baryo kun sain nakaistar an mga study. Inimbitaran niya sinda na mag-atender sa pampublikong pahayag kan paraataman nin sirkito a na gigibuhon sa ibang baryo. Para makaabot duman, kaipuhan nindang magbiyahe nin sarong oras sakay nin awto, tapos duwang oras pa sindang malakaw. Nag-uyon an mga study, asin 17 sa sainda an nakaatender.

 Pakalihis nin pirang semana, an paraataman nin sirkito saka an nagkapirang Saksi nakidagos nin apat na aldaw sa mga study. Pag aga, naghihiling sinda nin basado sa Bibliya na mga video sa jw.org sa lengguwaheng Kekchi, tapos pag-aadalan ninda an brosyur na Siisay an Naggigibo kan Kabotan ni Jehova Ngonyan? Pag hapon, naghihiling sinda nin nagkapirang porsiyon kan JW Broadcasting. Naggibo man nin areglo an paraataman nin sirkito na an kada study magkaigwa nin personal na matukdo sa Bibliya.

 Sa apat na aldaw na idto, naghulit man an mga Saksi sa kataraid na baryo na Kekchi an lengguwahe asin inimbitaran an mga tawo para sa sarong espesyal na pagtiripon. Sa pagtiripon na iyan, inimbitaran kan mga tugang an 47 nag-atender na magpa-Bible study man. Onseng pamilya an nag-ako nin Bible study.

 Pakalihis nin pirang bulan, nag-areglo an mga elder na magkaigwa nin pagtiripon kada weekend duman sa baryo kan lalaki. Ngunyan, mga 40 an regular na nag-aatender sa mga pagtiripon. Asin kan gibuhon duman kan mga tugang an Memoryal kan kagadanan ni Jesus, ugmahon sinda ta 91 an nag-atender.

 Kan ginirumdom ni Marta kun paano iyan nangyari, sinabi niya: “Nagpapasalamat ako ki Jehova. Kun minsan, pagmati ko, mayo akong gayong nagigibo. Pero mga kasangkapan kita sa kamot nin Diyos. Aram niya kun ano an nasa puso kan mga taga baryong idto, asin irinani niya sinda sa saiyang banwaan. Namumutan sinda ni Jehova.”