Namundag ako sa Uganda sa distrito nin Gomba. Kadaklan kan mga tawong nakaistar diyan tios na marhay. Mayong kuryente sa banwaan mi, kaya sa banggi naggagamit kami nin gasera.

 Mga parauma an mga magurang ko, asin hali sa Rwanda naglipat sinda sa Uganda. Nagtatanom sinda nin kape saka batag, asin naggigibo sinda nin sarong popular na klase nin arak na hali sa batag na an apod waragi. Nag-aataman man sinda nin mga manok, kanding, urig, asin baka. Huli sa sakong kultura saka dinakulaan, nagtutubod ako na an agom na babayi dapat na magin masinunod sa saiyang agom sa gabos na oras asin dai dapat magpahayag kan saiyang opinyon.

 Kan 23 anyos ako, naglipat ako sa Rwanda, na diyan parati akong nagduduman sa mga diskohan kaiba kan mga kaedad ko. May saro nganing diskohan na pirmi kong pigdudumanan, kaya an namamahala kaiyan tinawan ako nin card na magagamit ko para makalaog ako nin libre. Mahilig man akong maghiling nin mga pelikula na nagtatampok nin ralaban saka kadahasan. Huli sa sakong mga nakakaibanan saka libangan, nagin akong bayolente, imoral, saka buratsero.

 Kan 2000, nakipag live-in ako sa sarong hoben na babayi na si Skolastique Kabagwira, asin nagkaigwa kami nin tulong aki. Arog kan tinutubod ko kan hoben pa ako, inaasahan ko na maluhod siya sa atubangan ko bilang pagtaong galang o kun may hahagadon siya sa sako. Iniisip ko man na gabos na pagsasadiri kan pamilya mi pagsasadiri ko, kaya puwede kong gibuhon diyan ano man na gusto ko. Pirmi akong naghahali pag banggi asin mga alas tres na kinaagahan ako nagpupuli, na sa parati burat. Matuktok ako sa pinto, asin pag dai tulos iyan binubukasan ni Skolastique, binubugbog ko siya.

 Kan mga panahon na iyan, nagtatrabaho ako bilang superbisor sa sarong pribadong security company, asin halangkaw an sakong suweldo. Sa harong, pigpaparakumbinsir ako ni Skolastique na mag-iba saiya sa relihiyon niyang Pentecostal, ta siguradong iniisip niya na makakapabago ini sako. Pero dai ako interesado. Imbes, nakipagrelasyon ako sa ibang babayi. Huli sa kaisugan ko saka imoral na paggawi, naghali si Skolastique kaiba kan tulo ming aki asin nakiistar sa mga magurang niya.

 Kinaulay ako kan sarong may edad nang amigo mi manungod sa paagi ko nin pamumuhay. Dinagka niya ako na makipagbalikan na ki Skolastique. Sinabi niya na dapat kaibanan kan mga aki an saindang ama. Kaya kan 2005, nagpundo na ako sa pag-inom, binayaan ko su panduwang karelasyon ko, asin nagbalik ako ki Skolastique. Kan 2006 nagpakasal kami. Pero, bayolente pa man giraray ako saka pigkukulgan ko an sakong agom.

 Kan 2008, sarong Saksi ni Jehova na an pangaran Joël an nagduman sa harong mi, asin nagdangog ako sa mensahe niya. Sa laog nin pirang bulan, regular niya akong pigbibisita kaiba kan saro pang Saksi, si Bonaventure, asin nagin mainit an diskusyon mi manungod sa Bibliya. Dakulon akong hapot, lalo na sa libro nin Kapahayagan. An totoo gusto kong patunayan na sala an mga Saksi. Halimbawa, hinapot ko sinda kun paano ninda nasabing maistar sa daga an “dakulang kadaklan” na sinambit sa Kapahayagan 7:9, mantang sinasabi sa bersikulo na sinda “nakatindog sa atubangan kan trono [nin Diyos] asin sa atubangan kan Kordero,” si Jesu-Cristo. Mapasensiyang sinimbag ni Joël an mga hapot ko. Halimbawa, ipinahiling niya sako an Isaias 66:1, na diyan sinabi nin Diyos na an daga iyo an saiyang “tungtungan.” Kaya an dakulang kadaklan talagang nakatindog sa daga sa atubangan kan trono nin Diyos. Asin binasa ko an Salmo 37:29, na nagsasabi na an mga matanos maistar sa daga nin daing sagkod.

 Dai nahaloy, nagtugot na akong magpa-Bible study. Si Bonaventure an nag-Bible study samo ni Skolastique. Mantang nag-aadal kami nin Bibliya, namotibar akong gumibo nin mga pagbabago sa buhay ko. Nanudan kong tratuhon an sakong agom nin may paggalang. Habo ko nang nagluluhod siya sa atubangan ko bilang pagtaong galang o kun may hinahagad siya, asin dai ko na man iniisip na gabos na pagsasadiri kan pamilya mi pagsasadiri ko. Nagpundo na man akong maghiling nin madadahas na pelikula. Masakit gibuhon an mga pagbabagong ini, kaya kaipuhan ko nanggad an pagpupugol sa sadiri asin kapakumbabaan.

 Mga pirang taon bago kaini, dinara ko sa Uganda an panganay ming si Christian para duman mag-istar sa mga kapamilya mi. Pero kan mabasa ko an Deuteronomio 6:4-7, narealisar ko na samo ni agom itinao nin Diyos an paninimbagan na atamanon an samong mga aki, kaiba na an pagtukdo sainda kan mga prinsipyo nin Diyos. Ugmahon kami saka an samong aki kan ipuli mi na siya sa harong!

 Nanudan ko na si Jehova sarong mahihirakon na Diyos, asin nagtutubod ako na napatawad na niya ako sa nagin ugali asin paggawi ko kaidto. Ugmahon ako ta nag-iba sako si Skolastique sa pag-adal nin Bibliya. Idinusay mi an samong buhay ki Jehova asin sabay kaming nabawtismuhan kan Disyembre 4, 2010. Ngunyan may tiwala na kami sa kada saro, asin maugmang isinasabuhay kan samong pamilya an mga prinsipyo sa Bibliya. Ugmahon si agom ta pagkahali sa trabaho, diretso na akong nagpupuli sa harong. Ugmahon man siya ta pigtatrato ko na siya nin may dignidad saka paggalang, ta nagpundo na ako sa pag-inom nin arak, asin bako na akong maisog. Kan 2015, nanombrahan ako bilang elder para magtabang sa pagpastor sa samong kongregasyon. Sa lima ming aki, tulo an bawtisado na.

 Kan magpuon akong mag-adal nin Bibliya sa mga Saksi ni Jehova, dai ko basta sana inaako an mga itinutukdo ninda sagkod na dai ko iyan napapatunayan. Naghanga ako ta ginamit ninda an Bibliya sa pagsimbag sa mga hapot ko. Nasabutan mi ni Skolastique na an mga nagsasabing naglilingkod sa tunay na Diyos dapat na mamuhay kauyon kan saiyang mga pamantayan, na dai lang pipilion kun arin an susunudon ninda. Nagpapasalamat akong marhay ta irinani ako ni Jehova sa saiya asin na kabilang na ako ngunyan sa saiyang pamilya. Pag ginigirumdom ko an buhay ko kaidto, kumbinsido ako na paagi sa tabang nin Diyos, magigibo kan siisay man na sinserong tawo na magbago para mapaugma siya.