Kan mamundag ako, may sadit na uma kami sa sarong banwaan nin Galicia, sa amihanan-sulnupan na parte kan España. Ikaapat ako sa walong magturugang. Maugma an pamilya mi. Ordinaryo na sana kaidto sa sarong pamilya sa España na may kisiyera sarong aki an maglaog sa seminaryo o kumbento. Tulo kami sa pamilya na naggibo kaini.

Sa edad na 13, naglaog ako sa sarong kumbento sa Madrid na yaon man duman si Manay. Pormalidad sana an mga ginigibo sa kumbento. Daing aramigahan​—anas susundon, pamibi, asin kahigpitan. Nagtitiripon kami sa kapilya nin amay na aga para maghurop-hurop, maski ngani sa parati blangko an isip ko. Pagkatapos, nagkakaranta kami nin relihiyosong mga awit asin nagdadangog nin Misa, na gabos sa Latin. Wara akong naintindihan asin pagmati ko garo baga harayuon an Diyos. Tuninungon sanang minalihis an aldaw. Pag nagkakasabatan kami ni Manay, an sinasabi mi sana, “Hail purest Mary.” Tinutugutan sana kami kan mga madre na makipag-ulay nin kabangang oras pagkakakan. Ibahon nanggad kumpara sa maugmang pamilya mi! Pagmati ko solo sana ako asin pirmi akong naghihibi.

Nungka kong namatian na harani ako sa Diyos, pero ginibo ko an panata ko asin nagin madre sa edad na 17. An totoo, ginibo ko sana kun ano an inaasahan sa sako, pero dai nahaloy nagduduwa-duwa na ako kun talagang misyon ini nin Diyos para sa sako. Pirming sinasabi kaidto kan mga madre na an mga may arog kaiyan na pagduwa-duwa mapapaduman sa nagkakalayong impiyerno! Pero, dai nawara an pagduwa-duwa ko. Aram ko na dai isinuway ni Jesu-Cristo an saiyang sadiri; imbes, nagin sibot siya sa pagtutukdo asin pagtabang sa iba. (Mateo 4:23-25) Kan 20 anyos na ako, napag-isip-isip ko na mayo na akong dahilan para magdanay pa bilang madre. Nasurpresa ako ta sinabi sa sako kan madre superyora na kun nagduduwa-duwa ako, mas marahay kun maghali na tulos ako. Sa hiling ko natakot siya na tibaad maimpluwensiyahan ko an iba. Kaya nagluwas ako sa kumbento.

 Pagpuli ko sa harong, nasabutan akong marhay kan mga magurang ko. Pero dahil mayong trabaho sa lugar mi, buminalyo ako sa Alemania, kun sain nakaistar an saro sa mga tugang kong lalaki. Miyembro siya nin sarong aktibong grupo nin Komunista na dayong mga Español. Pamugtak an buot ko sa mga tawong ipinapakipaglaban an deretso nin mga trabahador asin pagkapantay-pantay para sa kababayihan. Kaya nagin Komunista ako asin kan huri nagin agom nin sarong miyembro kan grupo. Pagmati ko may pakinabang an ginigibo ko dahil nananao ako nin mga babasahon manungod sa Komunismo asin nag-iiba sa mga protesta.

Pero pag-abot nin panahon, nadisganar giraray ako. Narisa ko na dai man pirming ginigibo kan mga Komunista an itinutukdo ninda. Mas lalo akong nadisganar kan 1971 kan suluon nin mga hoben na miyembro kan grupo mi an Konsulado nin España sa Frankfurt. Ginibo ninda iyan para iprotesta an inhustisya kan diktatoryal na España. Pero aram kong salang paagi ini nin pagpahayag nin kaanggutan.

Kan mamundag an matua kong aki, sinabi ko sa mister ko na dai na ako maatender sa mga miting kan Komunista. Mamunduon ako ta dai man lamang kami kan aki ko binibisita kan dati kong mga amigo. Inisip-isip ko kun ano an katuyuhan nin buhay. Sulit daw talaga an paghihinguwang mapakarhay an sosyedad?

Kan 1976, duwang Saksing Español an nagduman sa samo dangan nag-alok nin literatura sa Bibliya, asin inako ko iyan. Pagbalik ninda, pinauranan ko sinda nin hapot manungod sa pagsakit, kawaran nin pagkapantay-pantay, asin inhustisya. Napangalas ako kan ginamit ninda an Bibliya sa pagsimbag sa kada hapot! Inako ko tulos an pag-adal sa Bibliya.

Kan primero, gusto ko sanang makakua nin impormasyon. Pero nabago iyan kan magpuon na kami kan agom ko na mag-atender sa mga pagtiripon sa Kingdom Hall kan Mga Saksi ni Jehova. Kan panahon na idto, duwa na an aki mi. Hinahapit kami kan mga Saksi asin tinatabangan sa pagbantay kan mga aki mi pag may pagtiripon. Naparani an buot ko sa sainda.

Dawa siring, may mga pagduda pa man giraray ako sa relihiyon. Nagdesisyon akong bisitahon an pamilya ko sa España. Dinisganar ako kan tiyo kong padi sa pag-adal kan Bibliya. Pero tinabangan akong marhay kan mga Saksi duman. Sinimbag ninda an mga hapot ko gamit an Bibliya, arog kan ginibo kan mga Saksi sa Alemania. Nagdesisyon akong ipadagos an pag-adal ko sa Bibliya kan nagbalik ako sa Alemania. Maski ngani nagpundo sa pag-adal nin Bibliya an agom ko, nagpadagos pa man giraray ako. Kan 1978, nabawtismuhan ako bilang saro sa Mga Saksi ni Jehova.

Nagkaigwa nin malinaw na katuyuhan asin direksiyon an buhay ko huli sa tamang kaaraman kan katotoohan sa Bibliya. Halimbawa, sa 1 Pedro 3:1-4 dinadagka an mga agom na babayi na “magpasakop” sa saindang mga agom na lalaki “na may pagkatakot” o hararom na paggalang asin magkaigwa nin ‘mabuot na espiritu, na iyan dakula an halaga sa atubang nin Diyos.’ An siring na mga prinsipyo nakatabang sa sako na magin marahay na agom asin ina.

Mga 35 taon na akong Saksi. Maugma akong naglilingkod sa Diyos kaiba kan mga kapwa ko Saksi sa bilog na kinaban, asin ugmahon ako ta naglilingkod man sa Diyos an apat sa lima kong aki.