KAN tapion si Kingsley sa abaga, pinunan na niyang basahon an Bibliya—inot niya ining asignasyon sa Teokratikong Paadalan sa Pagmiministro. Maingat niyang sinasayod an kada tataramon, na mayong nalalaktawan ni sarong silaba. Pero halat nguna! Taano ta dai siya nakahiling sa Bibliya niya?

Buta kaya si Kingsley, na taga Sri Lanka. Maluya man an saiyang pagdangog asin naka-wheelchair siya para makalibot-libot. Paano niya nanudan an manungod ki Jehova asin paano siya nakuwalipikar na mag-enrol sa Teokratikong Paadalan sa Pagmiministro? Tugutan nindo akong ipaliwanag kun paano.

Kan inot kong mamidbid si Kingsley, napahanga ako sa pagkadesidido niyang manudan an katotoohan sa Bibliya. Nagkapirang Saksi na an nag-Bible study sa saiya, asin luma nang marhay an Braille niyang kopya kan librong Kaaraman na Minagiya Pasiring sa Buhay na Daing Katapusan. * Inako niya an alok ko na idagos giraray an saiyang pag-adal, pero may duwa kaming problema.

Inot, nakaistar si Kingsley sa harong para sa mga may edad na asin may diperensiya sa pisikal. Huling maribok sa palibot asin maluya an pagdangog ni Kingsley, kaipuhan kong kusugan na marhay  an boses ko. An totoo, nadadangog kan gabos duman an pinag-aadalan mi!

Ikaduwa, limitado sana an kayang basahon asin masabutan ni Kingsley sa kada pag-adal mi. Kaya tanganing mas makinabang na marhay si Kingsley, mahigos siyang nag-aandam. Patiinot na niyang binabasa nin pirang beses an pag-aadalan, binubukasan an mga teksto sa saiyang Bibliyang Braille, asin iniisip na niya kun ano an simbag sa mga hapot. Nagin epektibong marhay iyan. Pag nag-aadal na kami, matukaw siya sa may alpombra, asin ugmahon na tinutubtob an salog mantang makusog na ipinapaliwanag an nanunudan niya. Dai nahaloy, duwang beses na kaming nag-aadal kada semana, asin inaabot iyan nin duwang oras!

Gustong-gusto ni Kingsley na mag-atender sa mga pagtiripon sa Kingdom Hall, pero bako ining madali. Kaipuhan siyang tabangan sa pagsakay sa wheelchair, sa paglaog saka pagluwas sa awto asin Kingdom Hall. Pero dakul na tugang an nagsusurusalida sa pagtabang sa saiya huli sa saindang pagkamuot. Sa panahon nin pagtiripon, igwa nin speaker si Kingsley na irinarani niya sa saiyang talinga, atentibo siyang nagdadangog, asin nagkokomento pa ngani!

Kan medyo haloy na siyang nag-aadal nin Bibliya, nagdesisyon si Kingsley na magpaenrol sa Teokratikong Paadalan sa Pagmiministro. Duwang semana bago kan inot na asignasyon niya sa pagbasa kan Bibliya, hinapot ko siya kun nagpraktis na siya. Sinabi niya, “Iyo, mga 30 beses.” Kinomendaran ko siya asin sinabi ko na gusto kong madangog an pagbasa niya. Binuksan niya an saiyang Bibliya, kinapa an Braille, asin nagpuon na magbasa. Pero narisa ko na dai niya pighihiro an mga muro niya na arog kan dati. Tinuom niya an babasahon niya sa Bibliya!

Napaluha ako. Dai ako makapaniwala kaya hinapot ko si Kingsley kun paano niya natuom idto mantang 30 beses man sana siyang nagpraktis. Sinabi niya: “Bako man 30 beses sana, 30 beses kada aldaw.” Labing sarong bulan palan siyang nagpraktis mantang nakatukaw sa may alpombra, na pauruutrong binabasa an mga teksto sagkod na matuom niya.

Dangan nag-abot na an aldaw kan asignasyon niya sa Kingdom Hall. Kan matapos ni Kingsley an pagbasa, grabe an paralakpakan kan mga tugang, asin dakul an napahibi huli sa determinasyon kan bagong estudyanteng ini. Sarong babaying parahayag na nagpundo nang mag-ako nin asignasyon huli sa nerbiyos an nagpaenrol giraray sa Teokratikong Paadalan sa Pagmiministro. Taano? Sinabi niya, “Kun kaya ni Kingsley, kaya ko man!”

Kan Setyembre 6, 2008, pakalihis nin tulong taon na pag-adal nin Bibliya, sinimbolisaran ni Kingsley an pagdusay niya ki Jehova paagi sa bawtismo. Nagin siyang maimbod na Saksi sagkod na magadan siya kan Mayo 13, 2014. Nagtitiwala si Kingsley na sa Paraiso, ipapadagos niya an saiyang maimbod na paglilingkod na may makusog asin perpektong salud. (Isa. 35:5, 6)—Isinaysay ni Paul McManus.