Kan padaguson an duwang payunir sa sarong harong sa Kenya, nabigla sinda kan mahiling ninda an sarong sadit na lalaki na nakahigda sa katre. Saditon an hawak niya asin haralipot an takyag. Kan sabihon ninda an panuga nin Diyos na ‘an pilay malukso na garo usa,’ napangirit nanggad an lalaki.—Isa. 35:6.

Naaraman ninda na si Onesmus, na ngunyan ma-40 anyos na, namundag na matapo an mga tulang, sarong hilang na inaapod na osteogenesis imperfecta. Matapuon an mga tulang niya kaya nababari iyan dawa dikiton sanang duon. Huling daing bulong o epektibong pagbulong diyan, inaasahan niya na siya makakamati nin kulog sa bilog na buhay asin pirmi na sanang nasa wheelchair.

Nag-ako si Onesmus nin pag-adal sa Bibliya. Minsan siring, habo kan saiyang ina na mag-atender siya sa Kristiyanong mga pagtiripon ta tibaad madanyaran siya asin urog pang makulgan. Kaya pigrerekord kan mga brother an mga pagtiripon, tapos pighihinanyog niya iyan sa harong. Pakalihis nin limang bulan na pag-adal, nagdesisyon siyang mag-atender sa ibong nin mga peligro.

Urog daw na nakulgan si Onesmus huli sa pag-atender sa mga pagtiripon? Kabaliktaran an epekto kaiyan. “Pag nasa pagtiripon, garo baga naiinaan an kulog na pirmi kong namamatian,” an paggirumdom niya. Para sa saiya, medyo nagrahay an saiyang pagmati huli sa bagong paglaom niya. Naobserbaran kan ina ni Onesmus an pagbabago sa disposisyon kan saiyang aki asin naugma siyang marhay kaya nag-uyon man siyang mag-adal sa Bibliya. “An paglilingkod sa Diyos iyo an bulong kan sakong aki,” an sabi niya.

Dai nahaloy, si Onesmus nagin dai pa bawtisadong parahayag. Pag-abot nin panahon, siya nabawtismuhan asin saro nang ministeryal na lingkod ngunyan. Minsan ngani dai niya magamit an saiyang mga bitis asin sarong kamot, mawot niyang gibuhon an bilog na makakaya sa paglilingkod ki Jehova. Gusto niyang mag-auxiliary payunir, pero nag-aalangan siyang mag-aplay. Taano? Huling aram niya na kaipuhan niyang biyong magdepende sa sarong tawo tanganing magbusol kan saiyang wheelchair. Kan sabihon niya sa saiyang mga kapwa Kristiyano an ikinakahadit niya, nangako sindang susuportaran siya. Iyo, tinabangan siya nindang makapag-auxiliary payunir.

Arog man kaiyan an ikinahadit ni Onesmus kan mawuton niyang magregular payunir. Minsan siring, may pagkakataon kaidto na paagi sa pang-aroaldaw na teksto natawan siya nin pamparigon na kaipuhan niya. An tekstong iyan iyo an Salmo 34:8: ‘Namitan nindo asin hilinga nindo ta marahayon si Jehova.’ Pakahurop-hurop kaiyan, nagdesisyon na siyang magregular payunir. Naghuhulit na siya nin apat na aldaw kada semana asin may nagkapirang tinutukduan sa Bibliya na nag-uuswag nanggad sa espirituwal. Kan 2010, nag-adal siya sa Pioneer Service School. Ugmahon siya ta nagin instruktor niya an saro sa duwang brother na inot na nakapagpatotoo sa saiya!

Gadan na an mga magurang ni Onesmus, pero inaasikaso kan mga tugang sa kongregasyon an saiyang pangangaipo sa aroaldaw. Nagpapasalamat siya sa gabos na bendisyon na nakakamtan niya ngunyan, asin hinahalat niya an aldaw na ‘daing nag-iirok na magsasabi, “Naghihilang ako.”’—Isa. 33:24.