Nakamtan ni Hulda an Pigmamawot Niya
KUN nakaduman ka na sa sadit na isla nin Sangir Besar sa Indonesia pirang taon na an nakaagi, posibleng nahiling mo an tulo sa satong mga sister sa may gilid nin dagat. Midbid sinda sa isla sa saindang pagmiministeryo—sa pagtabang sa mga tawo na masabutan an Bibliya. Pero sa pagkakataon na iyan na yaon sinda sa gilid nin dagat, ibang trabaho an ginigibo ninda.
An isla nin Sangir Besar sa norteng parte kan Indonesia
Inot, nagkukua sinda nin mga gapo sa hababaw na parte kan dagat dangan pigdadara ninda iyan sa gilid. An ibang mga gapo kasingdakula kan bola nin soccer. Dangan, an mga babaying iyan matukaw sa sadit na bangko na kahoy asin gamit an martilyo pinaparasa ninda an mga gapo sagkod na magin mas sadit iyan sa sugok nin manok. Pagkatapos, ilinalaag ninda an saradit na gapo sa plastik na balde dangan bibitbiton iyan pasakat sa hagyan papuli sa saindang harong. Pagkatapos, ilinalaag ninda an mga gapo sa mga sako na ikakarga sa mga trak, dangan puwede nang gamiton an mga gapong iyan sa ginigibong mga tinampo.
Si Hulda, na nangungua nin mga gapo sa gilid nin dagat
An saro sa mga sister na ini iyo si Hulda. Huli sa saiyang kamugtakan, mas dakul an panahon niya para sa trabahong iyan kisa sa iba. Sa parati, an kuwartang ibinabayad sa saiya ginagamit niya para sa pang-aroaldaw na pangangaipo kan pamilya niya. Pero ngunyan, igwa pa siyang ibang pigtatagamahan. Gusto niyang magkaigwa nin tablet para makagamit siya kan JW Library® app. Aram ni Hulda na an mga video saka iba pang nasa app makakatabang sa ministeryo niya saka sa pag-adal niya kan Bibliya.
Nagtrabaho si Hulda nin duwang oras kada aga sa laog nin saro may kabangang bulan, na nagpupulpog nin mga gapo para magkaparasa iyan asin makapano nin sadit na trak. Sa katapos-tapusi, nakatipon man giraray siya nin igong kuwarta na pambakal nin tablet.
Si Hulda kapot an tablet niya
“Dawa pagalon ako saka makukulog an hawak sa kakapulpog nin mga gapo,” an sabi ni Hulda, “nawara iyan tulos sa isip ko kan nagamit ko na an bagong tablet na ini na makakatabang sako na magin mas epektibo sa ministeryo saka mas mapadali an pagpreparar ko para sa mga pagtiripon.” Sinabi niya man na nakatabang saiya an tablet kan nagkaigwa nin pandemya, dahil an gabos na aktibidad kan kongregasyon ginibo sa virtual na paagi. Nakikiugma nanggad kita ki Hulda na nakamtan niya an saiyang pigmamawot.
