An empatiya iyo “an kakayahan na mamatian an namamati o pinag-aagihan kan iba paagi sa pagbugtak kan sadiri niya sa sitwasyon ninda.” Uyon ki Dr. Rick Hanson, sarong eksperto sa mental-health, “ipinangaki na kita na igwa nin kakayahan na magpahiling nin empatiya.”

PAG-ISIPAN: Taano ta may kakayahan kita na magpahiling nin empatiya, sarong kuwalidad na mayo sa ibang linalang? Ipinapaliwanag kan Bibliya na linalang nin Diyos an mga tawo uyon sa saiyang ladawan. (Genesis 1:26) Huli kaiyan, may kakayahan kitang ipahiling an saiyang personalidad pati na an saiyang marahayon na mga kuwalidad. Kaya, pag napapahiro an mga tawo na tabangan an iba huli sa empatiya, inaarog ninda an empatiya kan saindang mahihirakon na Kaglalang, an Diyos na Jehova.—Talinhaga 14:31.

May empatiya sa sato an Diyos asin habo niyang nahihiling kitang nagsasakit. Mapadapit sa mga Israelita kaidto na nagtios nin maringis na pang-uuripon sa Ehipto na sinundan nin 40 taon na masakit na pamumuhay sa kaawagan, an Bibliya nagsasabi: “Sa panahon kan gabos nindang kasakitan, siya nasasakitan man.” (Isaias 63:9) Mangnuhon na dai lang basta aram nin Diyos an saindang pagsakit. Namamatian niya an saindang kulog. “Aram kong marhay kun gurano kakulog kan pig-aagihan ninda,” an sabi niya. (Exodo 3:7) “An siisay man na nagdudutdot sa saindo,” an sabi nin Diyos, “nagdudutdot sa alinawnaw kan sakong mata.” (Zacarias 2:8) Pag kinukulgan kita kan iba, nakukulgan man siya.

Sinisigurado sa sato kan Bibliya na dawa pagmati ta kinokondenar kita kan satong sadiri asin na dai kita maninigo sa empatiya nin Diyos, “an Diyos mas urog kisa sa satuyang puso asin nakakaaram kan gabos na bagay.” (1 Juan 3:19, 20) Mas midbid kita nin Diyos kisa kan satong sadiri. Aram niyang marhay kun ano an kamugtakan ta, iniisip ta, asin namamatian. May empatiya siya sa sato.

 Sinisigurado sa sato kan Kasuratan

• “Maapod ka, asin masimbag si Jehova; mahagad ka nin tabang, asin sasabihon niya, ‘Uya ako!’”—ISAIAS 58:9.

• “‘Huli ta aram kong marhay kun ano an gusto kong gibuhon para sa saindo,’ an sabi ni Jehova, ‘an tawan kamo nin katuninungan, asin bakong kapahamakan, tanganing magkaigwa kamo nin magayon na puturo asin paglaom. Asin maapod kamo sa sako asin madurulok saka mamimibi sa sako, asin dadangugon ko kamo.’”—JEREMIAS 29:11, 12.

• “Tipunon mo an sakong mga luha sa saimong lalagan na anit. Bako daw na nakasurat an mga iyan sa saimong libro?”—SALMO 56:8.

An pakaaram daw na may empatiya sa sato an Diyos makakatabang sa sato na makayanan an mga kasakitan? Pag-isipan an eksperyensiya ni Maria:

“Kan magadan an 18 anyos kong aking lalaki pakatapos nin duwang taon na pakikipaglaban sa kanser, grabeng kulog an namatian ko asin naisip ko na bakong patas an buhay. Naanggot ako ki Jehova ta dai niya tinabangan asin pinarahay an aki ko!

“Pakalihis nin anom na taon, sarong mamumuton saka mapagmalasakit na amigo sa kongregasyon an nagdangog sako mantang iniistorya ko saiya an namamati ko na dai ako namumutan ni Jehova. Nagdangog lang talaga siya sako sa laog nin pirang oras, dangan napaisip ako sa sinabi niyang mga bersikulo, an 1 Juan 3:19, 20, na nagsasabi: ‘An Diyos mas urog kisa sa satuyang puso asin nakakaaram kan gabos na bagay.’ Ipinaliwanag niya na nasasabutan ni Jehova an satong mga kasakitan.

“Sa ibong kaiyan, dai pa man giraray mahali sa sako an pagkaanggot! Dangan binasa ko an Salmo 94:19 na nagsasabi: ‘Kan magparadakul an ikinakahadit ko, rinanga asin pinaginhawa mo ako.’ Namati ko na para sako isinurat an bersikulong iyan! Pag-abot nin panahon, narealisar ko na talagang naggigian an buot ko pag sinasabi ko ki Jehova an sakong mga kasakitan, huling aram ko na nagdadangog siya saka nasasabutan niya ako.”

Nakakaranga nanggad na maaraman na nasasabutan kita nin Diyos asin na aram niya an namamatian ta! Pero, taano ta grabe pa man giraray an pagsakit? Padusa daw iyan nin Diyos sa mga pagkakasala ta? May gigibuhon daw an Diyos para tapuson an gabos na pagsakit? Sisimbagon an mga ini sa masunod na mga artikulo.