LEKSIYON 01
Paano Makakatabang Saimo an Bibliya?
Haros gabos kita may mga hapot manungod sa buhay, pagsakit, kagadanan, asin kun ano an mangyayari sa sato sa maabot. May mga ikinakahadit man kita aroaldaw, arog kan kun paano makakakua nin kuwarta, o kun paano magigin maugma an satong pamilya. Dakul na an natabangan kan Bibliya na makua an simbag sa importanteng mga hapot sa buhay saka nagtao man iyan sa sainda nin kapaki-pakinabang na giya sa pang-aroaldaw na buhay. Kaya ano sa hiling mo, makakatabang daw sa mga tawo an Bibliya?
1. Ano an pira sa mga hapot na sinisimbag kan Bibliya?
Sinisimbag kan Bibliya an importanteng mga hapot na ini: Paano nagpuon an buhay? Taano ta nabubuhay kita? Taano ta nagsasakit kita? Pag nagadan an sarong tawo, ano an nangyayari saiya? Gabos na tawo gusto nin katuninungan, pero taano ta kadakul nin giyera? Ano an mangyayari sa planetang Daga pag-abot nin panahon? Magayon kun hahanapon ta an simbag sa arog kaiyan na mga hapot, asin milyon-milyon an talagang naugma sa simbag diyan kan Bibliya.
2. Paano makakatabang sa sato an Bibliya na magin maugma?
Tinatawan kita kan Bibliya nin marahayon na mga giya. Halimbawa, tinutukduan kaiyan an mga pamilya kun paano magigin tunay na maugma. Tinatawan kita kaiyan nin giya kun paano makakayanan an stress asin kun paano magigin maugma sa satong trabaho. Manunudan mo an itinutukdo kan Bibliya manungod sa mga iyan asin sa dakul pang iba mantang pinag-uulayan ta an publikasyon na ini. Posibleng makumbinsir ka man na “an bilog na Kasuratan [an gabos na nasa Bibliya] . . . kapaki-pakinabang.”—2 Timoteo 3:16.
Dai sinasalidahan kan publikasyon na ini an Bibliya. Imbes, ginibo ini para siyasaton mo mismo an Bibliya. Kaya mas magayon na basahon mo sa Bibliya an mga teksto sa kada leksiyon asin ikumparar diyan an mga nanunudan mo.
ARAMON PA
Aramon kun paano nakatabang an Bibliya sa dakul na tawo, kun paano mo mai-enjoy an pagbasa kaiyan, asin kun taano ta marahay na magpatabang para masabutan iyan.
3. Magigiyahan kita kan Bibliya
An Bibliya garo sarong flashlight. Ipinapahiling kaiyan sa sato kun paano makakagibo nin marahay na mga desisyon asin kun ano an mga mangyayari sa maabot.
Basahon an Salmo 119:105, dangan pag-ulayan an mga hapot na ini:
-
Para sa kagsurat kan salmong ini, ano an Bibliya?
-
Para saimo, ano an Bibliya?
4. Masisimbag kan Bibliya an satong mga hapot
Nasimbag kan Bibliya an haloy nang ihinahapot nin sarong babayi. I-play an VIDEO, dangan pag-ulayan an mga hapot na ini:
-
Sa video, ano an mga kahaputan kan babayi?
-
Paano nakatabang saiya an pag-adal nin Bibliya?
Sinasabi kan Bibliya na marahay kun padagos kitang mahapot. Basahon an Mateo 7:7, dangan pag-ulayan an hapot na ini:
-
May mga hapot ka daw sa buhay na sa hiling mo puwedeng masimbag kan Bibliya?
5. Puwede mong ma-enjoy an pagbasa nin Bibliya
Dakul an nag-i-enjoy sa pagbasa nin Bibliya asin nakikinabang diyan. I-play an VIDEO, dangan pag-ulayan an mga hapot na ini:
-
Sa video, ano an sinasabi kan mga hoben manungod sa pagbasa?
-
Dawa dai ninda hilig magbasa, taano ta gusto nindang basahon an Bibliya?
Sinasabi kan Bibliya na an mababasa ta diyan makakapakusog sa sato asin makakatao nin paglaom. Basahon an Roma 15:4, dangan pag-ulayan an hapot na ini:
-
Gusto mo daw maaraman an maugmang pangako asin paglaom na sinasabi kan Bibliya?
6. Matatabangan kita kan iba na masabutan an Bibliya
Apuwera sa pagbasa kan sadiri nindang Bibliya, dakul an nakinabang kan may magtabang sainda na mas masabutan iyan. Basahon an Gibo 8:26-31, dangan pag-ulayan an hapot na ini:
-
Paano ta masasabutan an Bibliya?—Hilingon an bersikulo 30 saka 31.
Kaipuhan kan lalaking taga Etiopia nin tabang para masabutan an Kasuratan. Sa ngunyan, dakul man an nakikinabang na may nagtatabang sa sainda na mas masabutan an Bibliya
MAY MGA NAGSASABI: “Abala sana an pag-adal nin Bibliya.”
-
Ano an isisimbag mo? Taano?
SUMARYO
An Bibliya igwa nin mga giya na magagamit mo sa pang-aroaldaw na buhay. Sinisimbag kaiyan an importanteng mga hapot, asin nagtatao iyan nin pampakusog saka paglaom.
Rebyu
-
Anong mga giya an makukua ta sa Bibliya?
-
Ano an pira sa mga hapot na sinisimbag kan Bibliya?
-
Ano an gusto mong manudan sa Bibliya?
HILINGON MAN
Pag-isipan kun taano ta kapaki-pakinabang an giya kan Bibliya dawa ngunyan.
“Mga Katukduan sa Bibliya—Dai Nalulumang Kadunungan” (An Torrengbantayan Num. 1 2018)
Hilingon kun paano natabangan kan Bibliya an sarong lalaki na may negatibong mga emosyon puon kan aki pa siya.
Aramon an kapaki-pakinabang na giya kan Bibliya para sa pamilya.
“12 Sekreto ng Matagumpay na Pamilya” (Gumising! Blg. 2 2018)
Aramon an katotoohan na sinasabi kan Bibliya manungod sa hinuhuna kan mga tawo sa kun siisay talaga an namamahala sa kinaban.
Ta’no ta Kaipuhan Mag-adal nin Bibliya?—Bilog na Video (3:14)
Puwede Mo Man Magustuhan
PARATING MGA IHINAHAPOT
Ano an Pag-adal sa Bibliya na Iinaalok kan mga Saksi ni Jehova?
Sa interactive na programa nin pag-adal na iinaalok kan mga Saksi ni Jehova, puwede mong gamiton an arin man na traduksiyon nin Bibliya. Dai mag-alangan na imbitaran an saimong bilog na pamilya o an siisay man sa mga amigo mo na umiba saimo.
