Sɛ i sɔ sa wie o ɔ su’n, ndɛ nga bé wá yíyí nun yɛ’n, kwla uka-ɔ.

•  ?Ngue ti yɛ i sɔ liɛ’n ju-ɔ?

•  ?Ngue ti yɛ ɔ ti cinnjin-ɔn?

•  ?Ngue like yɛ a kwla yo-ɔ?

•  Ndɛ nga ɔ wiengu’m be kan’n

•   Junman dilɛ dan’n. Be flɛ talua kun kɛ Zuli. Ɔ seli kɛ: “Ninnge kwlaa nga é yó be’n, be se e blɛ kwlaa nun kɛ e di junman tratra su. Kpɛkun be wla e fanngan kɛ e mian e ɲin titi e yo i kpa e wɔ e ɲrun. Asa’n be se e kɛ e bu ninnge uflɛ wie’m be yolɛ i akunndan naan y’a kwla ɲan sasu kpa ekun. Nanwlɛ, i sɔ yolɛ’n tinman pɔpɔ!”

•   Ajulisu mannzin mun. Telefɔnun, tablɛti ɔ nin ajulisu mannzin uflɛ wie’m be su junman dilɛ’n yo maan cɛn kwlaa nin blɛ kwlaa nun’n be kwla flɛ e. I kwlaa sɔ’n ti’n, e wla guaman ase. Kpɛkun kɛ ɔ́ kɔ́ i ɲrun’n, junman’n kwla tin e su dan.

•   Kɛ e lafiman kpa’n. Be flɛ talua kun kɛ Miranda. Ɔ seli kɛ: “Suklu kɔlɛ’n, junman dilɛ’n ɔ nin be ɲin su yiyilɛ’n be yo maan gbanflɛn nin talua kpanngban be jaso ndɛ kpa yɛ be laman ndɛ. I kwlaa sɔ’n ti’n, afɛ’n tin be su dan.”

 Biblu yi be nga be ti wakawaka’n be ayɛ. (Nyanndra Mun 6:​6-8; Rɔmunfuɛ Mun 12:11) Sanngɛ i sɔ’n kleman kɛ ɔ fata kɛ e di junman tratra su naan e ɲin kpa ninnge cinnjin wie’m be su. I wie yɛle e wun lika nianlɛ’n.

 Be flɛ talua kun kɛ Asile. Ɔ seli kɛ: “Cɛn kun’n min wla fili like dilɛ su afin n le junman kaka n di. M’an wunnin i wlɛ kɛ i sɔ’n timan kpa naan ɔ timan cinnjin kɛ n sɔ junman kwlaa nga be fa man min’n i nun, naan kusu ɔ fata kɛ n nian min wun lika.”

 I sɔ’n ti’n, Biblu’n se kɛ: “Alua nga i nyin tɛ o su’n, i kpa tra asɔmɔli i fuɛn’n lele.” (Akunndanfuɛ’n 9:5) Kɛ a di junman dan’n, a kwla bu i kɛ a le wunmiɛn kɛ asɔmɔli sa. Sanngɛ i sɔ’n ti blɛ kpe kan liɛ. Nanwlɛ, sɛ junman dan dilɛ ti’n a fɛ dan’n, i sɔ’n kwla yo tɛ kpa man wɔ.

•   Nán kplin like ngba su. Biblu’n se kɛ: ‘Akunndan’n ti wun ase kanfuɛ’m be liɛ.’ (Nyanndra Mun 11:2) Sran ng’ɔ kɛn i wun ase’n, ɔ si kɛ ɔ kwlá yoman like ngba. Ɔ maan nán junman kwlaa yɛ ɔ sɔ nun-ɔn.

   Be flɛ gbanflɛn kun kɛ Zɔɔdanin. Ɔ seli kɛ: “Sran ng’ɔ sɔ junman kwlaa nga be fa mɛn i’n nun’n, i sɔ sran liɛ’n, ɔ timan wun ase kanfuɛ yɛ ɔ cɛman naan afɛ’n w’a tin i su dan.”

•   Lo wunmiɛn kpa. Biblu’n se kɛ: “Sɛ sran kun nyɛn i like liɛ kan naan ndɛ nun-man su’n, ɔ flunman tra kɛ w’a nyan like kpanngban sanngɛ ndɛnngan wo su’n. Afin junman dilɛ nga lɛ’n kwlaa ti afɛ ngbɛn.” (Akunndanfuɛ’n 4:6) Fluwa sifuɛ’m be waan sran ng’ɔ lo wunmiɛn kpa’n, nn ɔ ti kɛ “ɔ su mɛn i ti’n nun miɛn’n i aliɛ sa.” Yɛ be kan gua su kɛ ɔ fata kɛ klɔ sran kun lafi lele dɔ mɔcuɛ annzɛ blu. Sanngɛ gbanflɛn nin talua sunman be kwlá yomɛn i sɔ.

   Be flɛ talua kun kɛ Bluklinin. Ɔ seli kɛ: “Laa’n ninnge ng’ɔ fata kɛ n yo be lemɔcuɛ’n kun nun’n be sɔnnin kpa. I sɔ’n ti’n n kwlá lafiman. Sanngɛ kɛ n ko lafi dɔ kun’n, ɔ uka min kpa. Afin i sɔ’n yo maan n kwla di junman kpa ekun yɛ n di aklunjuɛ.”

•   Siesie ɔ wun. Biblu’n se kɛ: “Sran ng’ɔ́ yó like-ɔ ɔ sunnzun i klun nan ɔ’a yo’n, ɔ́ dí alaje.” (Nyanndra Mun 21:5) Sɛ dɔ nga su’n, e siesie e wun ka naan y’a yo like kun’n, i sɔ’n úka e tititi.

   Be flɛ talua kun kɛ Vanesa. Ɔ seli kɛ: “Sɛ e waan nán afɛ’n ɔ tin e su dan’n, ɔ fata kɛ e siesie e blɛ’n. I liɛ’n, sɛ ɔ ju wie naan ɔ fata kɛ e kaci e sa’n, é wún i wlɛ. Kɛ e yo sɔ’n junman’n su tinman e su dan.