Pɔlu nin i yi’n be le ba nɲɔn. Ɔ seli kɛ: “Kɛ lika’n yoli kekle e nvle’n nun’n, be ɲanman like naan b’a to. Ninnge nga be kwla to naan b’a di’n, be kwlaa be gua’n yoli dan. E jran e lɔngɔ su yɛ e to like ɔ. Sanngɛ lele nin i kɛ ɔ́ tó wɔ’n, nn w’a wie. Sran kwlakwla yoli koklo. Wie’m be glɔli bɔbɔ. Ninnge’n kwlaa be gua’n yoli dan tratrali su. Sika nga e di su e nvle’n nun bɔbɔ’n, w’a ɲanman ɲrun kun. Sika nga n guɛli i banki’n nin o, min asiransi’n nin o, kalɛ nga be tua min’n nin o, m’an kwlá faman be kun.”

Pɔlu wunnin i wlɛ kɛ ɔ fata kɛ ɔ yo ‘ngwlɛlɛfuɛ’ naan ɔ nin i awlobo’n b’a fite nun. (Nyanndra Mun 3:21) I waan: “N di kolan su junman. Sanngɛ, m m’an dili junman kwlaa nga n sa tɔli su’n. N dili junman nga be ɲanman nun sika kpa bɔbɔ’n. Like diwa annzɛ like kpa uflɛ yɛ sran wie’m be fa tua min kalɛ ɔ. Sɛ sanmlan kpo nnan yɛ be fa tua min kalɛ’n, n yo nɲɔn atɛ. I blɛ sɔ’n nun’n, n ɲannin akɔ wa 40. Kɛ be yoli dan’n, n yoli be atɛ. Yɛ n toli akɔ wa 300 tra su uflɛ n fa sieli be osu. Cɛn kun’n, m mannin sran kun i akɔ 50, naan i kusu w’a man min able sanmlɛn kilo 50. E nin min awlobo’n nin awlobo wie mun e dili able sanmlɛn sɔ’n cɛli kpa.”

Pɔlu si ekun kɛ like cinnjin kpa m’ɔ fata kɛ sran kwlakwla yo’n, yɛle Ɲanmiɛn sulafilɛ’n. Sran ng’ɔ nanti Ɲanmiɛn i mmla’n su’n, Ɲanmiɛn suɛn i bo. I sɔ’n ti, Zezi seli kɛ: “Nán an sanngan amun wun akunndan. [...] Amun Si si kɛ amun sa mian ninnge sɔ’m be wun.”​—Lik 12:29-31.

Satan m’ɔ ti Ɲanmiɛn i kpɔfuɛ dan’n, ɔ laka sran sunman. Ɔ maan, be wunnɛn’n i ngunmin i akunndan yɛ be bu ɔ. Sran’m be koko ninnge nga be leman be’n be ti dan. Wie liɛ bɔbɔ’n, be sa mianman ninnge sɔ’m be wun. Sanngɛ, be kplin be ɲin be kunndɛ. Wie’m be usa afɛ. Ɔ maan, be wun kɛ ndɛ nga ti nanwlɛ. Yɛle kɛ “sran ng’ɔ fa  like sran sa nun’n, ɔ kaci kɛ sran sɔ i akua sa.”​—Nyanndra Mun 22:7.

Sran wie mun ekun be fa ajalɛ tɛ. Pɔlu waan: “E mantanfuɛ sunman be yaci be awlobo’n be ɔli nvle uflɛ nun. Wie’m bé kɔ́’n, b’a kunndɛman nvle sɔ’m be nun tranlɛ fluwa naan b’a kwla ɲan lɔ junman. Ɔ maan, be fiafia polisie’m be ɲrun cɛn kwlakwla. Be la gua su, ɔ nin akpɔ’m be nuan. Be faman be wun wlaman Ɲanmiɛn sa nun naan ɔ nian be lika. Sanngɛ e nin min awlobo’n e liɛ’n, e tali nda kɛ é fá e wun wlá Ɲanmiɛn sa nun naan kannzɛ e leman sika’n, ɔ suan e bo.”

Pɔlu i wla kpɛnnin ndɛ nga Zezi kannin’n su. I waan: “Zezi seli kɛ: ‘Nán an koko ainman liɛ’n, afin ainman bɔbɔ yɛ ɔ́ kúnndɛ i wun like-ɔ. Cɛn ba kun nun afɛ’n ɔ ju cɛn sɔ’n nun.’ Ɔ maan, like nga n srɛli Ɲanmiɛn’n yɛle kɛ ɔ ‘man e aliɛ ng’ɔ ju e’n’ naan y’a wuman’n. Kɛ nga Zezi fa kannin’n sa’n, ɔ yoli sɔ sakpa. Y’a kpaman like nun. Kɛ e kɔ like tolɛ’n, e jran e lɔngɔ su. Yɛ ɔ to be, ɔ to be. Kɛ ɔ́ tó min’n, n wun kɛ nɔnnɔn yɛ ɔ ka ɔ. N kloman nɔnnɔn. Sanngɛ, ɔ kunman. E nɔn nɔnnɔn cɛn sɔ’n nun, e fa la. N la Ɲanmiɛn i ase titi. Afin blɛ kekle sɔ’n nun’n, e nin min awlobo’n y’a faman e klun awe y’a laman cɛn kun sa le.” a

“Lika’n timan e su kekle dan kɛ laa sa kun. Sanngɛ, e wunnin i wlɛ kɛ like nga sran kun kwla yo naan w’a kokoman dan’n, yɛle Ɲanmiɛn sulafilɛ. Sɛ e lafi Ɲanmiɛn Zoova b su naan e yo i klun sa’n, ɔ́ súan e bo titi. E wunnin kɛ ndɛ ng’ɔ o Jue Mun 34:9 nun’n, ɔ ti nanwlɛ. I waan: “Amun sie amun nyin ase be nian. Amún wá wún kɛ Anannganman ti kpa dan! Sran ng’ɔ fiɛ i nun’n, i liɛ su ti ye!” Siɛn’n, kannzɛ lika’n ti kekle sɛ’n, srɛ kunman e.”

“E wun i wlɛ kpa siɛn’n kɛ like ng’ɔ man sran nguan’n, nɛ́n i yɛle junman dilɛ’n annzɛ sika’n. Sanngɛ, yɛle aliɛ. Like nga Ɲanmiɛn seli kɛ ɔ́ yó mán sran mun’n, e ɲin wo i sin kpa. Ɔ seli kɛ cɛn wie lele ‘aliɛ’n bú mɛn’n nun.’ Sanngɛ lele nin i kɛ blɛ sɔ’n ju’n, ‘kɛ e ɲan like e di’n, yɛ kɛ e ɲan tannin e kla’n, ɔ ju e.’ E fa Biblu’n i nun ndɛ nga cici e wla kpa. I waan: ‘Like nga amún yó’n, nán an yo i sika klolɛ’n ti. Maan amun nyin yi like nga an lɛ i’n, afin Nyanmiɛn bɔbɔ seli kɛ: “N su yaci-man wɔ, n su kpɔci-man wɔ mlɔnmlɔn.”’” c

Sran ng’ɔ nin ‘Ɲanmiɛn be nuan sɛ’n,’ ɔ lafi Ɲanmiɛn su. I sɔ yɛ Pɔlu nin i awlobo’n be yo ɔ. (Bo Bolɛ 6:10) Sɛ lika’n ti kekle e su dɔ nga su o, annzɛ cɛn wie lele ɔ́ yó e su kekle o, maan e nian Pɔlu i ayeliɛ’n su. Yɛle kɛ, maan e lafi Ɲanmiɛn su yɛ e yo ngwlɛlɛfuɛ.

Wie liɛ’n, like nga ti yɛ e koko’n ɔ fin e awlobo’n nun. ?I lɛ’n nun’n, ngue yɛ é yó ɔ?