Sran’m be buman be wiengu sran kun. Dɔɔtrɔ’m be nun’n, kɛ sran’m be kɔ be wun ayre yolɛ’n, be kpankpan dɔɔtrɔfuɛ’m be su. Aliɛ diwlɛ’m be nun’n, be nga be kɔ like dilɛ’n be kpankpan be nga be man be aliɛ’n be su. Be nga be fa aviɔn be kɔ lika’n, be nun wie’m be kpankpan be nga be di junman aviɔn nun’n be su. Suklu’m be nun’n, ba kanngan wie’m be to be like klefuɛ’m be mma, be wla be ɲin nglonglo yɛ ɔ ju wie’n be yo be like yaya. Politikifuɛ wie’m be yo sa kainkain mun. Wie’m be kusu be tɔn be wun suɛn kɛ be nzuɛn’n ti kpa.

 Kɛ be se kɛ be bu be wiengu sran’n, Biblu’n uka e naan y’a wun i wlɛ. Asa’n, ɔ uka e naan y’a si sa nga ti yɛ sran’m be buman be wiengu sran kun’n.

 Mɛn wunmuan’n nun’n, sa nga sran’m be yo be’n kle kɛ be buman be wiengu sran kun.

•   Be seli Etazinin lɔfuɛ wie mun kɛ be kan wafa nga sran’m be nzuɛn’n w’a kaci be nvle’n nun’n, i ndɛ. Be tɛli su kɛ andɛ’n, sran’m be nzuɛn’n w’a yo tɛ dan. Afuɛ 22 nga be sinnin lɛ’n be nun’n, sran’m be nzuɛn’n nin-a yoman tɛ sɔ le.

•   Be seli sran 32.000 mɔ be o nvle 28 nun kɛ be kan wafa nga sran’m be nzuɛn’n w’a kaci’n i ndɛ. Be nun sran 20.800 be seli kɛ andɛ sran’m be siman like nga be flɛ i sran’n i sran bulɛ kun.

 Biblu’n kannin wafa nga andɛ sran’m be nzuɛn’n wá yó’n i ndɛ i osu w’a cɛ kpa.

•   ‘Mɛn’n i awieliɛ blɛ nun’n, lika’n wá yó kekle kpa. Afin sran’m bé bú be bɔbɔ be wun akunndan, bé yó sika klofuɛ, bé dí be nuan, bé tú be wun, be ɲin su yiman be si nin be nin mun, be su siman ye, be su kloman be wiengu, [kpɛkun] bé yó wlɛ.’—2 Timote 3:1-3.

 Sɛ a kunndɛ kɛ á sí wafa nga Ɲanmiɛn i nuan ndɛ sɔ’n kpɛn su andɛ’n, kanngan ndɛ nga nun: “La Bible a-t-elle prédit la mentalité et la conduite des gens de notre époque ?”

 Kannzɛ bɔbɔ sran’m be nzuɛn w’a yo tɛ kpa’n, sanngɛ sran kpanngban be wunnin kɛ afɔtuɛ nga be o Biblu’n nun’n be ukali be naan be nzuɛn’n w’a yo kpa. Afin afɔtuɛ nga be o nun’n, e “kwla lafi be su blɛ kwlaa nun.” (Jue Mun 111:8) Be nun wie mun yɛ:

•   Ndɛ nga Biblu’n kan’n: “Like kwlaa nga amun klo kɛ sran’m be yo be man amun’n, amun kusu amun yo man be wie.”—Matie 7:12.

   I bo yɛle kɛ: E kunndɛ kɛ sran’m be yo e ye yɛ be bu e sran. Ɔ fata kɛ e yo like kunngba’n e man be wie.

•   Ndɛ nga Biblu’n kan’n: “Siɛn mɔ amun a yaci ato bualɛ’n, amun di nanwlɛ kle amun wiengu.”—Efɛzifuɛ Mun 4:25.

   I bo yɛle kɛ: Ɔ fata kɛ ndɛ nga e kan’n nin ninnge nga e yo be’n, be kle kɛ e ti nanwlɛfuɛ.

 Sɛ a kunndɛ kɛ á sí nun ekun’n, a kwla kanngan

•   Sasafuɛ Tranwlɛ’n ng’ɔ suan “?É yó sɛ naan y’a si sa ng’ɔ ti tɛ’n nin ng’ɔ ti kpa’n?”

•   Ɔ nin ndɛ nga be flɛ i kɛ “?Wafa sɛ yɛ Biblu’n kwla uka e naan y’a bu sran ngba sran-ɔn?” be nun.