Le nɲɔn’n nun’n, sran’m be wunman ngbaciɛ ng’ɔ o nanwlɛ’n nin ato’n be afiɛn’n i wlɛ kpa kun. ?W’a sie i sɔ liɛ’n i nzɔliɛ wie? Siɛn’n, wafa nga sran’m be wun fa yo be’n ɔ nin ndɛ nga be lafi su’n be su yɛ be jran be se kɛ ndɛ kun ti nanwlɛ annzɛ ɔ ti ato-ɔ. Nán sa ng’ɔ juli sakpasakpa’n i su yɛ be jran-ɔn. I wie yɛle kɛ sran kpanngban be bumɛn i kɛ like nga be flɛ i kɛ nanwlɛ’n, ɔ o lɛ sakpasakpa. Kɛ sran’m be bu i sɔ asiɛ wunmuan’n su-ɔ.

 Laa’n, sran wie’m be buli i sɔ. I afuɛ kɔe akpi nɲɔn (2.000) yɛ, Rɔmunfuɛ’m be siefuɛ nga be flɛ i Pɔnsu Pilati’n ɔ usali Zezi kɛ: “?Ngue yɛle nanwlɛ’n?” (Zan 18:38) Pilati w’a minndɛman kɛ Zezi tɛ su. Sanngɛ kosan nga Pilati usali’n ɔ ti cinnjin kpa. Biblu’n tɛ kosan sɔ’n su. Yɛ ndɛ ng’ɔ kan’n, ɔ kwla yo ɔ fɛ. Ɔ́ wá úka ɔ, ɔ maan a su yoman kɛ andɛ sran mun mɔ be wunman ngbaciɛ ng’ɔ o nanwlɛ nin ato’n be afiɛn’n be sa.

?Nanwlɛ’n wo lɛ sakpa?

 Ɛɛn-ɛn. Biblu’n nun’n kɛ be kan nanwlɛ’n i ndɛ’n, be fa kan sa kun mɔ be kwlá siman su akplowa’n i ndɛ. Be fa kan sa nga i yolɛ’n ti kpa’n i ndɛ wie. Biblu’n kle kɛ nanwlɛ’n ɔ fin Zoova. a Ɔ kɛn i ndɛ se kɛ ɔ ti “Ɲanmiɛn m’ɔ di nanwlɛ’n.” (Jue Mun 31:5) Ndɛ nanwlɛ ng’ɔ fin Ɲanmiɛn’n ɔ o Biblu’n nun. Biblu’n se kɛ ndɛ nanwlɛ’n ti kɛ kannin sa. Afin ɔ kwla kle e atin mɛn sukusuku nga e o nun yɛ’n nun.—Jue Mun 43:3; Zan 17:17.

?Ngue yɛ á yó naan w’a si ndɛ nanwlɛ’n niɔn?

 Ɲanmiɛn kunndɛman kɛ e fa ndɛ nanwlɛ ng’ɔ o Biblu’n nun’n su e ti ble nun. Yɛ ɔ kunndɛman kɛ e jran wafa nga e wun yo e’n su naan y’a fa su. Sanngɛ ɔ kunndɛ kɛ, kɛ é kánngan nun’n e fa ngwlɛlɛ nga e si i’n e di junman. (Rɔmunfuɛ Mun 12:1) Asa ekun’n, ɔ kunndɛ kɛ e fa e “akunndan’n kwlaa” e fa suɛn i su like naan e klo i. Asa kusu’n, ɔ wla e fanngan kɛ e bu Biblu’n i nun ndɛ’n i su akunndan kpa naan e wun i wlɛ kɛ ɔ ti nanwlɛ.—Matie 22:37, 38; Sa Nga Be Yoli’n 17:11.

?Ato’n fin wan?

 Biblu’n waan Suɛn Tɔnfuɛ Satan m’ɔ ti Ɲanmiɛn i kpɔfuɛ’n yɛ ɔ boli ato bualɛ’n i bo-ɔ. Biblu’n nun’n, be flɛ i kɛ “ato buafuɛ’m be si.” (Zan 8:44) Ɔ buali Ɲanmiɛn i su ato kleli klɔ sran klikli mun. (Bo Bolɛ 3:1-6, 13, 17-19; 5:5) Kɛ ɔ fɛ i lɛ’n, ɔ fa ato ndɛ mun tru. Kpɛkun ɔ fa Ɲanmiɛn i su ndɛ nanwlɛ’n fia.—Sa Nglo Yilɛ 12:9.

?Ngue ti yɛ ato bualɛ’n w’a kaci sran’m be nzuɛn-ɔn?

 Biblu’n waan “mɛn’n i awieliɛ blɛ” nga e o nun yɛ’n nun’n, Satan laka sran mun kpa. I wie yɛle kɛ sran’m be bua ato kle be wiengu yɛ be bu be lufle. (2 Timote 3:1, 13) Asa ekun’n, Ɲanmiɛn sulɛ wafa be sunman nun’n, be bua ato kle sran mun. I sɔ yɛ Biblu’n seli kɛ é wún i e blɛ liɛ nga nun-ɔn. Ɔ seli kɛ sran’m “bé kúnndɛ like klefuɛ mun naan be kan ndɛ ng’ɔ́ yó be su nun fɛ’n kle be.” Yɛ “be su kloman kɛ bé tí ndɛ nanwlɛ’n.”—2 Timote 4:3, 4.

?Ngue ti ndɛ nanwlɛ’n ti cinnjin-ɔn?

 Kɛ lika kun nun’n, sran’m be di nanwlɛ kle be wiengu’n, be lafi be wiengu su. Sanngɛ sɛ be bua ato kle be wiengu’n, be nin be wiengu’m be afiɛn kwlá mantanman naan se kɛ bé trá janvuɛ. Kɛ ɔ yo sɔ kusu’n, bo kun yolɛ nin anuansɛ’n kwlá tranman lɛ. Ɲanmiɛn kusu kunndɛ kɛ sulɛ nga e su i’n, ɔ taka nanwlɛ’n su. I sɔ yɛ Biblu’n kan-ɔn. Ɔ se kɛ: “Be nga be su [Ɲanmiɛn’n], ɔ fata kɛ be su i kɛ nga Ɲanmiɛn wawɛ’n kle be’n sa, yɛ be su i nanwlɛ nun.” (Zan 4:24) Ndɛ nanwlɛ ng’ɔ o Biblu’n nun’n kwla uka wɔ naan w’a wun ato ndɛ nga sran’m be kɛn i Ɲanmiɛn sulɛ wafa’m be nun’n i wlɛ naan w’a faman be su kun. I sɔ’n ti’n, é wlá ɔ fanngan kɛ a kanngan ndɛ nga nun: “?Ngue ti yɛ Ɲanmiɛn klolɛ’n ti kekle man sran wie mun-ɔn?”

?Ngue ti yɛ Ɲanmiɛn kunndɛ kɛ a si ndɛ nanwlɛ’n niɔn?

 Ɲanmiɛn kunndɛ kɛ a tran nguan nun tititi. Sanngɛ kɛ ɔ ko yo naan i sɔ liɛ’n w’a yo ye’n, ɔ fata kɛ a si i su ndɛ nanwlɛ’n. (1 Timote 2:4) Sɛ a suan like nga Zoova bu i kɛ ɔ ti kpa annzɛ ɔ ti tɛ’n i su like naan a nian su nanti’n, ɔ́ káci ɔ janvuɛ. (Jue Mun 15:1, 2) Ɲanmiɛn sunmannin Zezi asiɛ’n su wa naan ɔ uka sran mun naan be si ndɛ nanwlɛ’n. Ɔ maan Ɲanmiɛn kunndɛ kɛ e sie e su e tie ndɛ nga Zezi kan’n.—Matie 17:5; Zan 18:37.

?Cɛn wie lele’n ato’n su tranman lɛ kun?

 Ɛɛn-ɛn. Afin kɛ sran’m be bu be wiengu lufle’n, ɔ yo Ɲanmiɛn i tɛ kpa. I sɔ’n ti’n, ɔ seli kɛ be nga be fa ato bualɛ’n cici be ti’n, ɔ́ wá núnnún be kwlaa. (Jue Mun 5:6) Ɔ maan ɔ́ yía nda ng’ɔ tali’n i nuan. Yɛle kɛ: “Be nuan nun ndɛ ng’ɔ ti nanwlɛ’n, ɔ́ ká lɛ tititi.”—Ɲanndra Mun 12:19.