Sa nga Akoto’m be yoli’n 11:1-30
11 Akoto mun nin aniaan nga be o Zide lɔ’n be tili i kɛ be nga be timan Zifu’n, be kusu be sɔli Ɲanmiɛn ndɛ’n nun klanman wie.
2 Ɔ maan kɛ Piɛli bali Zerizalɛmun’n, be nga be waan maan be wla sran’m be klɛn’n,+ be ijɔli i.*
3 Be seli kɛ: “A ɔli yasua nga b’a wlaman be klɛn’n be awlo lɔ, kpɛkun a nin be dili like.”
4 Kɛ Piɛli tili i sɔ’n, ɔ yiyili ndɛ’n i kwlaa nun kleli be. Ɔ seli be kɛ:
5 “N wo Zope lɔ ń srɛ́ Ɲanmiɛn. Kpɛkun n wunnin like kun aolia nun. Ɔ ti kɛ lɛn kondro dan wie sa, be trɛli i cɔnjɔ nnan’m be nun, ɔ fin ɲanmiɛn su lɔ ɔ su jra. Kpɛkun ɔ jrali min wun lɛ.+
6 Kɛ n niannin nun kpa’n, n wunnin nnɛn nga be ja ti nnan’n, ɔ nin blo nnɛn mun, ɔ nin nnɛn nga be cuɛn be wun ase’n, ɔ nin anunman nga be tu sin nglo lɔ’n.
7 Kpɛkun n tili sran kun nɛn. Ɔ seli min kɛ: ‘Piɛli, jaso, kun wie naan di!’
8 Sanngɛ n seli kɛ: ‘Cɛcɛ, min Min. Afin n nin-a diman like nga mmla’n manman atin kɛ be di’n i le. Kpɛkun n nin-a diman like nga mmla’n waan ɔ ti fiɛn’n i le.’
9 N tili sran’n i nɛn’n i kpɛ nɲɔn su. Ɔ fin ɲanmiɛn su lɔ, yɛ ɔ seli kɛ: ‘Like nga Ɲanmiɛn yoli i sanwun’n, nán se kɛ ɔ ti fiɛn kun.’
10 Kɛ ɔ yoli sɔ i kpɛ nsan su’n, be fa ɔli ɲanmiɛn su.
11 Kɛ ɔ́ yó sɔ’n, nn yasua nsan be o awlo nga e o nun’n i ɲrun lɛ. Be fin Sezare yɛ be ba-ɔ, yɛ be sunmannin be kɛ be wa yia min.+
12 Ɲanmiɛn wawɛ’n seli min kɛ nán min klun titi min kaan sa, naan e nin be e wɔ. Aniaan nsiɛn nga be o yɛ’n, be nin min ɔli wie. Kpɛkun e wluli bian’n i sua’n nun lɔ.
13 “Ɔ seli e kɛ ɔ wunnin kɛ anzi kun jin i sua’n nun. Kpɛkun anzi sɔ’n seli i kɛ: ‘Sunman sran Zope naan be ko yia Simɔn mɔ be flɛ i kɛ Piɛli’n,+
14 naan ɔ wa kan ninnge wie mɔ be ti’n, a nin ɔ awlofuɛ mun amún fíte nun’n, be ndɛ kle wɔ.’
15 Sanngɛ kɛ n boli ijɔlɛ bo cɛ’n, Ɲanmiɛn wawɛ’n jrali be su kɛ i klikli’n nun’n, ɔ fa jrali e su’n sa.+
16 Ɔ maan min wla kpɛnnin e Min’n i ndɛ’n su. Ɔ seli titi kɛ: ‘Nzue yɛ Zan fa yoli sran’m be batɛmun-ɔn.+ Sanngɛ amun liɛ’n, Ɲanmiɛn wawɛ’n yɛ bé fá yó amun batɛmun-ɔn.’+
17 Like kunngba nga Ɲanmiɛn fa cɛli e mɔ e lafi e Min Zezi Klisi su’n, ɔ fa mannin be wie. ?Ɔ maan n ti min liɛ sɛ ti yɛ ń tánndan Ɲanmiɛn i ɲrun-ɔn?”+
18 Kɛ be tili ndɛ sɔ’n, be yacili akplowa silɛ,* naan b’a manman Ɲanmiɛn b’a se kɛ: “Ɲanmiɛn w’a man be nga be timan Zifu’n be atin naan be kaci be akunndan’n, naan be ɲan nguan wie.”+
19 Kɛ be kleli Etiɛnin i ɲrɛnnɛn’n, be nga be bo sanndili’n,+ be ɔli lele be juli Fenisi nin Sipri, ɔ nin Antiɔsu. Be kannin Ɲanmiɛn ndɛ’n be kleli Zifu’m be ngunmin.+
20 Sanngɛ Sipri nin Sirɛnin lɔ yasua wie’m be ɔli Antiɔsu be ko boli e Min Zezi i jasin fɛ’n be kleli be nga be kan Glɛki’n.
21 Asa kusu’n, Zoova* i sa o be su wie. Ɔ maan sran kpanngban kpa be lafili Zezi su, kpɛkun be suli e Min’n su.+
22 Be su ndɛ’n tɔli asɔnun’n i nunfuɛ nga be o Zerizalɛmun lɔ’n, be su nun. Ɔ maan be sunmannin Baanabasi+ kɛ ɔ wɔ Antiɔsu.
23 Kɛ ɔ juli lɔ m’ɔ wunnin ye dan nga Ɲanmiɛn yoli be’n, ɔ yoli i fɛ. Kpɛkun ɔ wlali be kwlaa be fanngan kɛ be fua kpa kɛ bé sú e Min’n i su titi.+
24 Baanabasi ti sran kpa, Ɲanmiɛn wawɛ’n wo i su kpa, yɛ ɔ lafi Ɲanmiɛn su kpa. I kwlaa sɔ’n ti’n, sran kpanngban kpa be lafili e Min’n su.+
25 I sin’n, ɔ ɔli Tasi lɔ ko kunndɛli Sɔlu kpa.+
26 Kɛ ɔ wunnin i’n, ɔ fɛ i ɔli Antiɔsu. Be nin asɔnun’n i nunfuɛ’m be yiali titi afuɛ wunmuan kun, kpɛkun be kleli sran kpanngban be like. Antiɔsu lɔ yɛ Ɲanmiɛn maan be dun mmua flɛli Zezi i sɔnnzɔnfuɛ mun kɛ Klisifuɛ-ɔ.+
27 Blɛ sɔ’n nun’n, Ɲanmiɛn nuan ijɔfuɛ wie’m+ be fin Zerizalɛmun be bali Antiɔsu.
28 Be flɛ be nun kun kɛ Agabisi.+ Ɔ jaso jrannin, kpɛkun Ɲanmiɛn wawɛ’n maan ɔ kannin kɛ awe dan kpa wá kpɛ́n asiɛ wunmuan’n su.+ Awe sɔ’n kpɛnnin Klodu blɛ su.
29 Ɔ maan Zezi i sɔnnzɔnfuɛ’m be fali ajalɛ kɛ like nga sran kun kwla man’n,+ ɔ fa man naan be fa ko man aniaan nga be o Zide lɔ’n, naan be fa uka be sa su.+
30 Be yoli sɔ sakpa. Be fali ninnge nga be ɲannin be’n, be fa wlali Baanabasi nin Sɔlu be sa nun. Be kusu be fa ko mannin asɔnun kpɛnngbɛn mun.+
