Fluwa klikli nga Piɛli klɛli’n 3:1-22
3 I kunngba’n, bla mun, maan amun lo amun wun man amun wun mun.+ I liɛ’n, sɛ wie’m be faman Ɲanmiɛn ndɛ’n su’n, kannzɛ amun a ukeman amun nuan’n, sanngɛ amun nzuɛn kpa’n ti’n, bé fá su.+
2 Bé yó sɔ afin be wunnin kɛ amun nzuɛn’n ti kpa+ naan amun ti aɲinyiɛfuɛ kpa.
3 Nán maan ninnge nga amun fa yo amun wun klanman’n, mɔ i wie yɛle be ti yolɛ nin sika ɔkwlɛ wlalɛ+ annzɛ tralɛ kpakpa’m be wlalɛ’n, yɛ be yo amun cinnjin-ɔn.
4 Sanngɛ maan amun klanman’n i ɲin fite wafa nga amun fa ti amun klun lɔ’n nun. Yɛle kɛ amun tran diin yɛ amun yo wɛtɛɛfuɛ+ naan amun klanman’n i ɲin fite. Ɲanmiɛn ɲrun’n, ninnge sɔ mun yɛ be ti cinnjin-ɔn, yɛ be saciman le.
5 Afin i sɔ yɛ laa bla nga be sro Ɲanmiɛn’n be yoli naan be klanman’n i ɲin w’a fite-ɔ. Ɔ maan be loli be wun mannin be wun mun.
6 I sɔ yɛ Sara yoli-ɔ. I ɲin yili Abraamun ti’n, ɔ flɛli i kɛ i min.+ Ɔ maan sɛ amun kusu amun yo sa kpa titi naan srɛ kunman amun’n, amún yó i wa wie.+
7 I kunngba’n, yasua mun, maan amun si amun yi’m be kpa naan amun nin be tran klanman.* Amun yo be cɛcɛ+ kɛ sɛ mɔ i bolɛ yoman ya’n sa. Afin nguan mɔ Ɲanmiɛn i aklunye dan’n ti’n i waan ɔ́ mán amun’n, ɔ́ mán be wie.+ Sanngɛ sɛ amun a yoman sɔ’n, Ɲanmiɛn su siemɛn i su tieman amun srɛlɛ’n.
8 Maan amun kwlaa amun akunndan’n yo kun.*+ Maan amun wiengu ndɛ lo amun. An klo amun wun kɛ sran kun nin i niaan sa. An si amun wiengu aunnvɔɛ,+ yɛ amun kan amun wun ase.+
9 Sɛ sran yo amun sa’n, nán amun yo i wie.+ Sɛ be kpɛ amun nzowa’n, nán amun kpɛ be wie.+ Sanngɛ amun yra sran’m be nguan,+ afin i sɔ’n ti yɛ be flɛli amun-ɔn. I liɛ’n, Ɲanmiɛn yrá amun su.
10 Afin “sran ng’ɔ klo kpa kɛ ɔ́ cɛ́ nguan nun naan ɔ́ dí aklunjɔɛ’n, ɔ fata kɛ ɔ niɛn i wun su naan w’a kanman ndɛ tɛ,+ yɛ nán maan ɔ laka sran.
11 Maan sran sɔ’n yaci sa tɛ’n i yolɛ,+ yɛ ɔ yo sa kpa.+ Maan ɔ miɛn i ɲin naan ɔ nin i wiengu’m be di anuansɛ titi.+
12 Afin Zoova* fɛ i ɲin sie sran kpa’m be su. Yɛ kɛ be kpan flɛ i’n, ɔ ti.+ Sanngɛ Zoova* nin be nga be yo sa tɛ’n be le i.”+
13 ?Sɛ amun tu amun klun yo sa kpa’n, wan yɛ ɔ́ yó amun tɛ-ɔ?+
14 Kannzɛ sa kpa yolɛ’n ti’n sran’m be kle amun yalɛ’n, amun liɛ su ti ye.+ Nán amun sro like ng’ɔ kun sran’m be srɛ’n.* Asa kusu’n, nán amun akunndan’n sanngan.+
15 Sanngɛ an bu amun klun lɔ kɛ Klisi’n ti amun Min. Sɛ sran wie se amun kɛ amun kan like nga amun fa amun wla gua su’n i ndɛ kle i’n, nán amun sisi amun bo, amun yiyi nun kle i. Sanngɛ amun yo i wɛtɛɛ su,+ yɛ amun yo i amanniɛn su.+
16 Maan amun mian amun ɲin titi naan amun akunndan’n w’a buman amun fɔ.+ I liɛ’n, kɛ be nga be kan amun wun ndɛ tɛtɛ’n bé wún kɛ amun nzuɛn’n ti kpa Klisi i sɔnnzɔnfuɛ mɔ amun ti’n ti’n,+ bé wún ɲannzuɛn.+
17 Sɛ sa kpa nga amun yo’n ti’n, Ɲanmiɛn kplin su kɛ amun wun ɲrɛnnɛn’n, ɔ ti kpa.+ I sɔ’n flunman tra kɛ amun a yo sa tɛ naan i ti’n, amun su fɛ’n.+
18 Afin klɔ sran’m be sa tɛ’m be ti yɛ Klisi wuli-ɔ. Ɔ yoli sɔ kpɛ kunngba cɛ.+ I m’ɔ ti sran kpa’n, ɔ wuli be nga be timan kpa’n be ti.+ Ɔ yoli sɔ naan ɔ́ fá amun kɔ́ Ɲanmiɛn wun lɔ.+ Kɛ bé kún i’n, ɔ ti klɔ sran.+ Sanngɛ kɛ be cɛnnin i’n, ɔ yoli aolia nun sran.+
19 Kɛ ɔ yoli sɔ’n, ɔ ɔli ko kannin ndɛ kleli anzi nga be o bisua’n. Ɔ ko kannin jɔlɛ nga bé wá dí be’n i ndɛ kleli be.+
20 Anzi sɔ mun yɛ be ɲin w’a yiman Ɲanmiɛn Nowe blɛ su’n+ niɔn. Blɛ sɔ’n nun’n, Ɲanmiɛn trɛli i awlɛn sran’m be wun. Blɛ kunngba sɔ’n nun’n, nn be su bobo mmeli’n.+ Be nga be wluli mmeli sɔ’n nun’n, b’a sɔnman, be ti sran mɔcuɛ cɛ. Be yɛ be trannin nzue’n i ɲin su lele be ɲannin be ti’n niɔn.+
21 Batɛmun yolɛ m’ɔ ti sa sɔ’n i nzɔliɛ’n, ɔ de amun wie andɛ, Zezi Klisi m’ɔ cɛnnin nguan’n ti. Batɛmun yolɛ’n timan be wun fiɛn’n i kplolɛ, sanngɛ ɔ ti Ɲanmiɛn i srɛlɛ naan e akunndan’n w’a buman e fɔ.+
22 Klisi ɔli ɲanmiɛn su lɔ. Kɛ é sé yɛ’n, ɔ o Ɲanmiɛn i sa fama su.+ Ɔ maan ɔ sie anzi mun nin be nga be le kwlalɛ’n, ɔ nin be nga be le tinmin’n be kwlaa.+
Ja ngua lɔ ndɛ mun
^ Annzɛ “maan amun bu be sran.”
^ Annzɛ “Maan amun nuan sɛ.”
^ Be kwla se ekun kɛ “Nán maan wlanwlanlɛ nga be wlanwlan amun’n, ɔ kun amun srɛ.”
