JI’TE 9
Toundye o fing ne re ŋwègne m ge ke?
1. Nweke a tcheng lômdye te ta’ toundye tchwe tchum ŋwègne?
Jéova, mo ye é gre mtchoung pepoung a, Si ŋwègne, bo tcheng ge mtoundye tchwe tchum ŋwègne. (1 Timotio 1:11) Yu né le tchu lômdye. A tcheng lômdye ye pou shan nwa’gne gôpna’ ne a te ta’ toundye tchwe tchum ŋwègne, dou ge a bômte pô pye wap dôm a ba po pap. Mkritè gô lwô’ mtcho’ ne lômdye mye a ne ye tsu’ ye é wap tchwe ne a.—Ké Loukasi 2:1, 4, 5.
Si sè ge ke ne lômdye? É tcheng ge a pe ta’ thamte tche-tche ta’ mbè pou ta’ mdjwi ne goung mtchwe awè. Jéova tcheng ge mbè pou djwi é ke fute mne map. (Ébraika 13:4) É bô ma ne hapgne lômdye. (Malachie 2:16) Da’ge é thak ge ta’ kritè hap lômdye bing dôm mou’, be ye dze é ke dwji é le ghe ghap a.—Ké Matio 19:3-6, 9.
2. Dze pou mdjwi gô pe le ya ma ne wim mne map?
Jéova le bem mbè pou mdjwi ge mfa’ ba ya mo le pe kwite ye mou’ mo tchum lômdye. (Genèse 2:18) Pa’ dze be fo dye a, yu ne gô pe ha tse ne nyapte pô toundye, neng ji’te wap ne jye Si. É gô pe tchente koung djwi é. Dze pou mdjwi gô pe koungne neng ghe mkou’ tchetche pou. Pa’ goung pe bè pou a pe djwi pap be pô mhô a, ne lagne ne tuôgne mhô be ywe ye a fing ne ghe ŋwègne pe tchum lômdye a.—Ké Éféso 4:31, 32; 5:22-25, 33; 1 Pètro 3:7.
3. A tak te po ging pepoung a be o gô tem lômdye a?
Lômdye yô tak te po ging pepoung, po le fa’ ne le ma koungne ne gim mne mô. (1 Korinto 13:4, 5) Ghôm Si te gôm ge ne tem lômdye be ta’ tchi ne nyapte mnwe mye a be tchum toundye a pe.—Ké 1 Korinto 7:10-13.
4. Pekhu, Si tcheng ge ke ne po?
Jéova tcheng ge po pe tchum ŋwègne. A be é ha mthôk pepoung bi po mye a gô kwite wô ne tchente dzu pé ne pa’ po be pomsem a. É tcheng ge po tchente dzu pé ne jyenwe mta pô, ba tse tsye wap le tam ne jye a. (Kolosai 3:20) Jéova bing bo tcheng ba ge po jye ŋwègne ye a them ne ne fa’ bi é, Yu Gè Pem wô, ba bi Mou é Yéso a.—Ké Ecclésiaste 11:9–12:1; Matio 19:13-15; 21:15, 16.
5. Mta po, po fing ne ghe ge po pô tchwe tchum ŋwègne m ge ke?
Po gô tchente fa’ te ne ha ywetsu, tsu’ tchwe ba dze khwakwa bi po pô. (1 Timotio 5:8) Da’ge po pô gô ne ghe ŋwègne be po lagne wap ne pe koung Si, neng pe tak ge é ji’te wap. (Éféso 6:4) Yô tchi ne koung Si fing ne tchente tcho’ mtum map. Tchwe ye ywe yé po ne dagne wap them m tchum Bible a, a fing ne tchente nyapte mkwègne map.—Ké Deutéronome 6:4-7; Proverbes 22:6.
Pekhu djou’ pepoung tchwe ye pou ha ghôm kaktuô bi pou neng bing go’te wap a. A bing tcheng ge pou pe tchôkte wap bing be thôk wap. Yeng tchi ne dagne wap gô pômte wap ne m ma mye a ke fing ne kô ge wap tchwe tchum ŋwègne a. (Proverbes 22:15) Da’ge pou te gô pe le gu’ ke bo le ne tchôkte wap pe.—Ké Kolosai 3:21.
Mkwithè Jéova thé medou ŋwa’gne mye a bo dé mta po ba pekhu a. Pou de pe Bible ne bve mŋwa’gne bô.—Ké Psaume 19:7, 11.
