Boasa Adong Pangattusion ni Saksi Jahowa na Muba?
Marsitutu do Saksi Jahowa asa mangihutton Bibel. Alani i, adong ma piga-piga na muba sian pangattusionnami dung lam takkas diattusi hami ayat ni Bibel. a
Songon na didok di Poda 4:18, “Alai anggo lapang ni halak partigor tudos tu buha siang ari, lam tu tiurna do, sahat ro di hos ni ari.” Songon parbinsar ni mata ni ari na lam leleng lam tiur, songon i ma nang pangattusion na dilehon Debata, lam dipatakkas dung juppang tikkina. (1 Petrus 1:10-12) Songon na disurirangkon di Bibel, lam godang ma pangattusion na dilehon Debata di ari parpudi on.—Daniel 12:4.
Dang songgot jala dang ganggu rohanami ala muba pangattusionnami. Sisomba ni Debata najolo pe, hea do sala mangalapati manang makkirim. Alani i, porlu do pangattusion nasida dipatikkos.
Dirimpu si Musa do dirina sipalua halak Israel, 40 taon andorang so disuru Debata dope ibana.—Ulaon ni Apostel 7:23-25, 30, 35.
Sala do pangattusion ni akka apostel tu surirang taringot andigan Mesias mate jala hehe.—Jesaya 53:8-12; Mateus 16:21-23.
Sala do pangattusion ni halak Kristen na parjolo taringot andigan ro “ari ni Tuhan i”.—2 Tessalonik 2:1, 2.
Diurupi Debata do nasida asa marpangattusion na sittong. Suang songon i, dipangido hami do asa diurupi Debata hami saonari.—Jakobus 1:5.
a Dang olo hami manabunihon molo adong na muba di pangattusionnami. Disurat do i jala dipaboa do tu na asing. Ida ma di bagian “Pengertian yang Diperjelas” di referensi online publikasinami.