Ahu magodang di huta Alicante, di timur ni Spanyol. Ala sursar parngoluon ni natuatuangku, gabe jotjot ma ahu ndang di jabu. Karejo ma ahu di bengkel na jonok tu jabungku. Disi mardongan ma ahu dohot si José María sahalak parkarejo. Halak na burju do ibana, umjotjotan do ibana mamparrohahon ahu sian keluargangku. Mansai solhot do hami nang pe 20 taon umtua ibana sian ahu.

Marsiajar Bibel do si José María dohot Sitindangi Ni Jahowa. Lomo hian do rohana manjaha Bibel, jala jotjot do na diparsiajarina i disaritohon tu ahu. Sai hutangihon do ibana nang pe ndang hea masuk tu rohangku. Ala sahalak na poso dope ahu, godang do na huulahon. Alai, muba ma sudena i.

Ndang pola lomo rohangku paboahon aha na hea masa tu ahu. Ai sada haotoon do huhilala i. Holan di sadari i, muba ma sude parngoluonku. Sian sahalak na poso na gogo, gabe pampang jala peak di rumah sakit. Maol do rohangku manjalo aha na masa on. Sai sungkunsungkun ma rohangku, ’Ai adong dope lapatanna ahu mangolu?’

Ro ma si José María mangida ahu, jala ditogihon ibana ma angka Sitindangi Ni Jahowa asa ro tu rumah sakit. Las ma rohangku di haroro ni nasida. Marsiajar Bibel ma ahu dung ruar sian Ruang Gawat Darurat. Gabe huboto ma boasa susa jolma, boasa mate, jala boasa dipaloas Debata hasusaon i masa. Marsiajar ma ahu taringot janji ni Debata tu ari na naeng ro, gohan ni jolma na tipak ma tano on jala ndang adong be na marsak ”ala ni parsahiton.” (Jesaya 33:24, Bibel Siganup ari) On ma mambahen ahu gabe marpangkirimon.

Dung mulak ahu sian rumah sakit, lam ringgas ma ahu marsiajar Bibel. Ro ma ahu tu parpunguan ni Sitindangi Ni Jahowa jala dohot ma ahu marbarita na uli mamangke kursi roda. Tanggal 5 November 1988, tardidi ma ahu gabe Sitindangi Ni Jahowa. Di tingki i, marumur ma ahu 20 taon. Diurupi Debata Jahowa do ahu asa marpingkiran na denggan tu ngolungku.  Alai, songon dia do ahu patuduhon holongku tu Jahowa?

Ndang hupaloas hahurangankon mangambati ahu manomba Jahowa. Alai, hupatudu do na marsihohot ahu tu Debata. (1 Timoteus 4:15) Mulana, ndang mura huulahon i, ala ndang lomo roha ni keluargangku gabe sahalak Sitindangi ahu. Alai, adong do angka dongan sahaporseaon na sai mandongani ahu. Nasida mangurupi ahu asa ro tu parpunguan jala manogihon ahu marbarita na uli.

Dung lam leleng, ringkot do huhilala sai adong na mamparrohahon ahu sian tingki tu tingki alani sahithon. Adong ma sada inganan tu angka na martihas di huta Valencia, hirahira 160 km di utara ni Alicante. Gabe di son ma ahu maringanan.

Nang pe holan na peak ahu di podoman, alai tongtong do husomba Jahowa. Hupangke ma hepeng na dilehon tu na martihas laho manuhor komputer jala hubahen ma i jonok sian podomanku. Hutuhor ma muse handphone. Saonari, ganup manogot dipangolu perawat ma komputer dohot handphoneku. Osangosangku ma hubahen laho paerethon kursor ni komputer. Jala hupangke ma hauhau na gelleng na huhut huharat laho mangetik di komputer dohot tu handphone.

Songon dia do angka alat on boi mangurupi ahu? Boi ma hubungka situs web jw.org dohot PERPUSTAKAAN ONLINE Menara Pengawal. Huhilala do pangurupion sian angka alat on. Jotjot do ahu leleng marsiajar huhut manulingkit sian angka buku, gabe lam hutanda ma Debata dohot angka parangeNa. Jala, tingki marmetmet ni roha ahu sai adong do na mangapul rohangku sian situs web jw.org.

Komputer on, mangurupi ahu asa boi parsidohot di ulaon parpunguan. Boi ma hulehon alus, mambahen tangiang, marjamita, jala manjaha majalah Joujou Paboahon. Nang pe ndang boi be ahu ro tu parpunguan, alai huhilala godang do na boi huulahon tu huria.

Nang pe ndang boi ahu marbarita na uli sian jabu tu jabu, alai hupangke do handphone dohot komputer laho marbarita. Las do rohangku mamangke alat on laho mangkatai tu angka jolma. Jala boi do alat sisongon on mangurupi angka donganta na asing, na so boi marbarita sian jabu tu jabu.

 Alai, ndang holan na mangasahon komputer dohot handphone ahu. Ganup ari adong do angka donganku na mangida ahu. Diboan nasida ma angka keluarga dohot angka halak na olo manjangkon barita na uli tu ingananku. Jotjot do dipangido nasida asa dohot ahu rap dohot nasida marsiajar Bibel. Adong do muse na manogihon ahu tu panombaon na sasaripe ni nasida. Na umlomo rohangku tingki sahalak dakdanak paboahon boasa holong rohana tu Jahowa.

Las do rohangku ala diparrohahon nasida ahu. Tongtong do ribur di kamarhu ala sai ro do donganku sian luat na dao manang na jonok. Holong ni nasida on, mambahen longang roha ni angka perawat. Ganup ari mandok mauliate ma ahu tu Jahowa, ala dipaloas ahu mangkilala paralealeon na sumurung on.

Molo adong na manungkun baritangku hualusi ma: ”Hiras do ahu, jala marsitutu do ahu asa boi marsihohot!” Huboto do ndang holan ahu na ingkon marsitutu asa boi marsihohot. Alai, sude do halak Kristen ingkon marsiadu—”di bagasan haporseaon na sintong.” (1 Timoteus 6:12, Bibel Siganup ari) Aha do na mangurupi ahu mangadopi hasusaan on? Martangiang ma ahu tu Jahowa jala hudok ma mauliate ala marlaba ngolungku. Godang do na boi huulahon laho manomba Jahowa jala sai marpangkirimon ma ahu tu ari na naeng ro.

Jotjot do ahu tarpingkir boi marlojong di tano na imbaru. Sipata margait do ahu dohot si José María, rap marlojong ma hami—ala ibana pe—marsahit polio. Husungkun ma ibana: ”Ise do hita na monang?” Dialusi Ibana ma: ”Ndang porlu ise na monang. Na rumingkot songon dia ma asa boi hita sahat di Paradeiso.”

Ndang mura huadopi sude hahurangankon. Huboto do alani haotoonku do umbahen na songon on ahu. Alai, mansai las do rohangku ala ndang ditadingkon Jahowa ahu. Dilehon Ibana do tu ahu—angka dongan sahaporseaon, pingkiran na denggan di parngoluonkon, boi muse mangurupi na asing jala dilehon pangkirimon tu ari na naeng ro. Boi ma hudok nunga dilehon Jahowa tu ahu lobi sian na huhirim.