Boi do Ujungna Dituhor si Hulda Tablet
DI INDONESIA adong sada pulo na gelleng na margoar Sangir Besar. Adong tolu donganta borua na tinggal disi. Piga-piga taon naung salpu, rap karejo do nasida di pantai. Ditanda akka halak na disi do nasida parbarita na uli, na jotjot mangurupi halak marsiajar Bibel. Alai di tikki i, adong dope na asing na dikarejohon nasida.
Pulo Sangir Besar di sabola utara ni Indonesia
Parjolo-jolo turun ma nasida tu pantai jala masuk ma nasida tu aek lao mangalului batu na balga. Dung i diboan nasida ma i tu pinggir ni pantai. Piga-piga balga ni batu i adong do nasa balga ni bola. Dung i hundul ma nasida di kursi hau na gelleng jala diputtari nasida ma batu i mamakke tokkok. Diputtari nasida ma i asa gelleng, unggelleng sian tolor ni manuk. Dukkon i dipamasuk nasida ma akka batu i tu ember palastik jala ditarui nasida ma i nakkok sian pantai tu jabu ni nasida. Dipamasuk nasida ma muse akka batu i tu karung asa boi dipamasuk tu truk. Jala dipakke ma akka batu i lao mambahen dalan.
Si Hulda papunguhon batu di pantai
Sada sian tolu donganta borua i, margoar si Hulda. Alani situasi, gabe boi ma unggodang tikkina papunguhon batu. Biasana lao manuhor kebutuhan ni keluargana do dipakke ibana hasil penjualan ni batu i. Alai saonari, disippan ibana ma deba hasil penjualan i ala adong naeng dituhor ibana. Lomo rohana naeng manuhor tablet asa boi mambuka aplikasi JW Library®. Alana diboto si Hulda, boi do akka video dohot akka publikasi na sian aplikasi i mangurupi ibana tikki marbarita jala mangurupi ibana lam mangattusi isi ni Bibel.
Jadi karejo ma si Hulda dua jom ganup pagi saleleng sada satonga bulan. Ditokkoki ibana ma akka batu i sappe boi gok sada truk na gelleng. Ujungna boi ma dituhor ibana tablet.
Si Hulda maniop tabletna
Didok si Hulda, “Loja do daging jala haccit do tangan mamuttari batu i. Alai dung boi hutuhor tablet i, mago ma sude halojaonki. Alana gabe boi ma hupakke tablet i tikki marbarita dohot mambahen persiapan lao marpungu.” Didok si Hulda muse, maruttung do ibana ala nungnga dituhor ibana tablet i khususna tikki baru-baru masa pandemi. Alana sian sambungan internet nama huria marpungu dohot marbarita saleleng pandemi. Las hian do rohatta ala boi do ujungna donganta on manuhor tabletna i.
