Diboto Hamu do?
Songon dia do batu bata na dapot di bekas ni Kota Babel najolo dohot cara ni batu bata i dibahen patuduhon na sittong do isi ni Bibel?
GODANG do batu bata na dapot ni akka arkeolog di bekas ni Kota Babel. Najolo dipakke do akka batu bata i lao mambangun Kota Babel. Menurut arkeolog Robert Koldewey, akka batu bata i dibahen di akka inganan panutungan na “di luar Kota Babel na denggan tano liatna jala godang soban lao manutung i”.
Dapot ni akka arkeolog ma bukti na patuduhon, dipakke akka pejabat ni Babel do inganan panutungan i lao mangulahon na jahat. Si Paul-Alain Beaulieu, sahalak profesor ahli sejarah dohot bahasa ni halak Asiria kuno sian Universitas Toronto mandok, “Catatan ni halak Babel paboahon . . . diparettahon raja do asa disappatton jala ditutung tu api akka halak na so mangoloi ibana jala na so pasangappon akka dewa.” Misalna adong do catatan sian jaman ni Raja Nebukadnesar na mandok, “Hancurhon nasida, tutung nasida, panggang nasida . . . di inganan panutungan . . . bahen ma asa nakkok timusna sian panutungan i. Pamate ma nasida mamakke api.”
On paingotton hita tu peristiwa na disurat di Daniel bindu 3. Menurut catatan sejarah i, dipajongjong Raja Nebukadnesar do sada patung na balga na sian mas, di Rura Dura di luar ni Kota Babel. Tikki dang olo tolu bawa halak Heber na margoar si Sadrak, si Mesak, dohot si Abednego marsomba tu patung i, gabe muruk situtu ma Raja Nebukadnesar. Diparettahon ibana ma asa dibahen api i “pitu hali ummohop sian na somal”, jala “asa disappatton nasida tu api na marnala-nala i”. Alai adong ma sada suru-suruan na gogo melindungi nasida.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Sada batu bata na marisi goar ni si Nebukadnesar
Sesuai do penemuan batu bata na di Babel i tu na disurat di Bibel. Godang do batu bata na marisi akka pujian lao pasangappon raja. Sada sian i mandok, “Nebukadnesar, raja ni Babel . . . Raja na sangap do au, na mambangun istana on . . . Anggiat ma akka pinopparhu boi marhuaso saleleng ni lelengna.” Catatan on mirip do tu na disurat di Daniel 4:30. Di ayat i, dibangga-banggahon si Nebukadnesar do dirina. Didok ibana, “Tung sangap situtu do Kota Babel on, na hupajongjong lao gabe istanakku. Hupajongjong do i marhite gogokku dohot huasokku lao patuduhon balga ni hasangapokku.”
Mungkin Lomo do Rohamuna Mamboto
ALUS NI BIBEL
Aha do na Didok Bibel taringot si Daniel?
Diurupi Debata do si Daniel lao mamboto aha na lao masa di jamanta saonari on.
