Molo tarseat tanganta manang adong luka di pamatangta, boi do malum sandiri. Jala songon i do na didok angka ilmuwan. Umpamana, didok do, “adong proses pamalumhon luka di pamatangta on”. (Johns Hopkins Medicine) Asing ni i, molo adong na pendarahan di pamatangta, boi do i so sandiri. Boasa boi songon i? Ala Debata do na manompa pamatangta.

RIMANGI MA: Debata do na mambahen adong proses pamalumhon luka manang pendarahan di pamatangta on. Alai boha do molo lungun rohanta jala susa tahilala alani sitaononta? Didok di Bibel, “Diapuli do angka na mandele, jala diubati do lukanasida.” (Psalmen 147:3, Bibel siganup ari) Jadi molo tongtong dope susa pangkilalaan dohot pingkiranmuna, boha do asa pos rohamu na tutu do olo Debata mangurupi hamu?

Marjanji do Debata tu hita, “Unang ho mabiar, ai ahu do donganmu! Unang biahaton ho, ai ahu do Debatam: Ahu margogoihon ho huhut mangurupi ho.” (Jesaya 41:10) Molo pos do roha ni sasahalak na dihaholongi Debata ibana, tontu boi do dame pingkiran dohot pangkilalaanna. Gabe togu ma ibana mangadopi angka sitaononna. Taringot hadameon sisongon i, si Paulus mandok, i do “hadameon na so boi diantusi jolma” na ro sian Debata. Didok ibana muse, “Margogo do ahu di sude na masa, ala dilehon Debata do huaso tu ahu.”​—Pilippi 4:4-7, 9, 13.

Angka ayat di Bibel mangurupi hita patoguhon haporseaon tu janji ni Jahowa di ari na naeng ro. Umpamana, di Pangungkapon 21:4, 5, dipaboa do aha na laho bahenon ni Debata jala boasa boi pos rohanta tu janjina:

• “Apusan ni Debata ma nasa ilu-ilu.” Salpuhonon ni Debata ma sude hasusaan dohot arsak ni rohanta.

• Jahowa do na “hundul di habangsa” i. Marhite huasona, boi do salpuhononna hasusaan jala diurupi do hita sude.

• Didok Jahowa do, “sintong jala boi do dihaporseai” angka janjina i. Lapatanna, sai na saut do sude janji ni Debata. On patuduhon, holan Ibana do Debata na sintong.

“Apusan ni Debata ma nasa ilu-ilu sian mata ni nasida. Ndang adong be hamatean nang arsak ni roha, nang angguk-angguk, nang na hansit, ndang disi be. Ai nunga salpu na parjolo i. Dung i didok Ibana na hundul di habangsa i ma, ‘Ida ma! Hupaimbaru do saluhutna.’ Didok Ibana muse, ‘Surathon ma on, ai sintong jala boi do dihaporseai angka hata on.’”​—Pangungkapon 21:4, 5.

Boi do taboto taringot parange ni Debata marhite marsiajar Bibel dohot mamparrohahon angka na ditompa Debata. Ditogihon Debata do hita asa gabe ale-alena. Alana didok di Bibel, “Pajonok hamu ma tu Debata, dung i pajonohonna ma tu hamu.” (Jakobus 4:8) Didok muse di Ulaon ni Apostel 17:27, “Ndang dao Ibana sian ganup hita on.”

Molo marsitutu hamu mananda Debata, lam pos ma rohamu, ‘disarihon Debata do hamu’. (1 Petrus 5:7) Adong do labana molo pos rohanta tu Jahowa?

Parrohahon ma pengalaman ni si Toru sian Jepang. Kristen do omakna. Alai dung magodang, diihuthon si Toru ma kelompok yakuza, i ma Kelompok Parjahat di Jepang. Didok ibana, “Diuhum Debata do ahu. Mate do angka na huhaholongi. Masa pe songon i ala sogo do roha ni Debata mangida ahu.” Ala songon i do dihilala si Toru, gabe “garang ma ibana jala ndang parduli tu na asing”. Didok si Toru muse, “Marsangkap do ahu naeng mambunu sasahalak na umjago sian ahu. Molo mate pe ahu, nga las rohangku ala diingot halak na hubahen i.”

 Alai dung marsiajar Bibel si Toru dohot istrina, si Hannah, gabe burju ma si Toru. Didok si Hannah, “Nunga marhamubaon be ibana.” On ma na didok si Toru, “Adong do Debata jala diparrohahon do hita. Ndang lomo rohana mangida jolma mate. Lomo do rohana manalpuhon hasalaan ni manang ise pe na marhamubaon. Sipata olo do ra ndang olo hita paboahon na di rohanta tu halak na asing. Alai, olo do Jahowa manangihon i jala diantusi Ibana do i. Satongkin nai, salpuhonon ni Jahowa ma sude hasusaan dohot sitaonon. Alai saonari pe, rade do Ibana mangurupi hita ala holong rohana tu hita.”​—Psalmen 136:23.

Songon si Toru, nunga taboto na laho salpuhonon ni Debata do sude hasusaan dohot sitaonon. Gabe marpangkirimon ma hita jala ndang olo be hita mangulahon angka ulaon na parohon jea tu hita dohot tu na asing. Jadi nang pe gok hasusaan, boi do dame pangkilalaanta ala taboto holong do roha ni Debata tu hita.