”NGA boi borhat motor on, alai pasombu ma tinggal na sahalak on!” On ma na dibege si Alexandra tingki di motor na naeng mangalewati perbatasan dua negara di Amerika Selatan. Turun ma ibana laho mangida na masa, diida ibana ma adong sahalak baoa na poso halak Cina na marpasirpasir mangkatai marbahasa Spanyol tu penjaga perbatasan. Ala si Alexandra sahalak Sitindangi Ni Jahowa na marpungu di huria marbahasa Cina, rade ma ibana manerjemahon na laho didok halak Cina i.

Didok baoa i ma sasintongna adong do suratsuratna, alai ditangko halak suratsurat i dohot hepengna. Mulana, ndang porsea penjaga perbatasan i jala gabe dirimpu do si Alexandra na manggadis jolma. Alai ujungna porsea ma ibana. Nang pe songon i, didenda ma baoa i ala ndang adong suratsuratna. Ala ndang adong hepengna, dipapinjamhon si Alexandra ma hepengna 20 dollar. Mandok mauliate situtu ma baoa i jala didok ibana laho gararonna do i lobi sian 20 dollar. Alai didok si Alexandra ma ndang pola digarar; las do rohana mangurupi. Dilehon ibana ma tu baoa i sijahaon jala dijujui ma ibana asa marsiajar Bibel dohot Sitindangi Ni Jahowa.

Las do roha mamboto adong halak na olo mangurupi halak na so ditanda jala godang do halak hea mangulahon on, na maragama manang ndang. Rade do hamu mamparrohahon jala mangurupi halak na asing? Ringkot do sungkunsungkun on, ala Jesus mandok, ”Martuaan do na mangalehon sian na manjalo!” (Ulaon ni Apostel 20:35) Jala na rumingkot, nunga diparsiajari angka panulingkit molo ringgas mangalehon, parohon laba do tu dirinta sandiri. Taida ma songon dia carana.

Sian na hea masa boi ma taida, mangkorhon do ringgas mangalehon tu las ni roha. Apostel Paulus manurat, ”Dihaholongi Debata do na las roha mangalehon.” Na didok si Paulus dison, i ma taringot halak Kristen na ringgas mangurupi dongan sahaporseaon na susa. (2 Korint 8:4; 9:7) Ndang didok si Paulus nasida mangalehon ala marlas ni roha. Alai sasintongna marlas ni roha nasida ala na mangalehon.

Sada penelitian mandok, mangalehon ”mambahen mangolu angka saraf di utohutok na mangkorhon tu las ni roha, marpos ni roha jala mambahen dame pangkilalaan”. Penelitian na asing mandok, ”Umbalga do las ni roha mangalehon hepeng tu sasahalak sian holan na mamangke hepeng tu diri sandiri.”

Hea do dihilala hamu hira na so adong na boi lehononmu? Nang pe ndang godang na talehon, alai boi do hita gabe halak ”na las roha mangalehon” molo sian ias ni roha hita mangalehon i. Sahalak Sitindangi Ni Jahowa mangalehon surat tu na mambahen majalah on, didok ibana, ”Saleleng martaontaon ndang adong na boi  hulehon asing ni mangalehon otik sumbangan di Bale Harajaon.” Didok ibana muse, ”Gumodang do na dilehon Jahowa tu ahu martimbangkon na hulehon i. . . . Mauliate ma, las do rohangku ala boi mangalehon sumbangan.”

Ndang holan hepeng na boi talehon. Na asing pe boi do.

Bibel mandok, ”Mambahen na denggan tu dirina do baoa na basa, alai pasusa sibukna sandiri do halak na garang roha.” (Poda 11:17) Halak na ringgas mangalehon, rade do mangalehon tingki, gogo, roha, pingkiran nang na asing. Godang na mangkilala, molo ringgas nasida mangalehon parohon na denggan do tu kesehatan.

Adong penelitian na patuduhon boi do lam moru sahit dohot stres molo mangurupi na asing. Lapatanna, lam denggan ma kesehatanna. Gariada, molo ringgas mangalehon boi do moru sahit na posi songon sahit tulang belakang manang HIV. On muse boi mangurupi parminum asa boi pasohon hasomalanna i jala asa unang manombo muse.

Alani i ma, godang halak na mandok, ”Boi do moru pingkiran na negatif molo tapatudu asi ni roha dohot haburjuon.” Molo ringgas mangalehon, boi do i muse mangorui holso ni roha dohot tekanan darah. Jala boi do moru lungun ni roha halak na mabalu molo rade mangurupi halak na asing.

Tangkas ma, parohon na denggan tu dirinta do molo ringgas hita mangelohon.

Jesus mandok tu angka siseanna, ”Lehon hamu ma, gabe lehononna ma di hamu! Parsuhatan na denggan, na nionjat, na hinuturhutur jala na pinasuksuk lehononna tu ampuanmuna, ai parsuhatan na sinuhathonmuna do suhathononna tu hamu.” (Lukas 6:38) Molo burju hita tu halak, mandok mauliate do nasida tu hita jala boi do gabe taronjar roha ni nasida laho maniru i. Haburjuon boi mangonjar angka halak asa masiurupan jala maraleale.

Sada penelitian na mamparsiajari taringot parsaoran ni jolma mamparrohahon ”halak na jotjot mangurupi, boi mangonjar roha ni na asing laho mangihuthon i”. Sasintongna, ”boi do gabe lam burju halak holan manjaha taringot haburjuon ni sasahalak”. Alani i, sada penelitian mandok, ”Mangkorhon do na diulahon pigapiga halak di bagasan punguan tu marpulu manang marratus halak nang pe ndang marsitandaan manang ndang hea jumpang.” Lapatanna, sada halak na ringgas mangalehon boi do mangonjar sude halak na di bagasan punguan asa gabe ringgas mangalehon. Lomo do rohamu tading di inganan sisongon i? Tutu, godang do laba na boi tadapot molo godang halak na rade mangurupi.

Sada pengalaman sian Florida, Amerika Serikat patuduhon  taringot i. Pigapiga halak Sitindangi Ni Jahowa di luat i mangalehon pangurupion tu angka dongannasida dung masa halisungsung. Huhut paimahon bahan bangunan laho paturehon jabu ni angka dongan, diida nasida ma sega pagar ni hombar jabu ni donganta jala dipature nasida ma. Pigapiga tingki dungkon i, disurat hombar jabu i ma tu Kantor Pusat ni Sitindangi Ni Jahowa songon on, ”Ndang tarhalupahon ahu burjumuna i, hamu ma halak na umburju na hea huida.” Alani i, mangalehon sumbangan ma ibana tu ulaon ni Sitindangi Ni Jahowa.

Angka panulingkit mandok, ”Nunga tarsuan di roha ni halak laho mangurupi halak na asing.” Didok nasida muse, ”Diboto dakdanak do laho mangulahon na burju tu na asing nang pe ndang diboto dope mangkatai.” Boasa? Didok Bibel do, ”Tumiru rupa ni Debata” do jolma ditompa. Alani i ma boi nasida patuduhon parange ni Debata.—1 Musa 1:27.

Sada sian sude parange na denggan sian Jahowa Sipanompa i ma basa ni roha manang ringgas mangalehon. Dilehon do tu hita hangoluan dohot na tahaporluhon asa marlas ni roha. (Ulaon ni Apostel 14:17; 17:26-28) Boi do hita mananda Debata jala mamboto sangkapNa tu hita marhite marsiajar Bibel. Dipaboa do muse disi taringot hangoluan na sonang sian Debata di ari na naeng ro. * (1 Johannes 4:9, 10) Ala sian Debata Jahowa do haroro ni haburjuon jala hita ditompa tumiru rupaNa, boi ma hita patuduhon haburjuon songon Ibana.—Heber 13:16.

Diingot hamu dope si Alexandra na dipaboa di mula ni artikel on? Songon dia do ujung ni ceritana? Didok halak na di motor i do ibana naung mambolongkon hepengna ala olo ibana mangurupi halak Cina i. Hape ditelepon halak Cina i ma donganna na tading di huta na laho dilewati motor i jala digarar ibana ma 20 dollar. Gariada, olo do ibana marsiajar Bibel songon na ditonahon si Alexandra. Dung tolu bulan, pajumpang ma nasida di kebaktian Sitindangi Ni Jahowa marbahasa Cina di Peru. Laho mambalos haburjuon ni si Alexandra, ditogihon ibana ma si Alexandra dohot angka donganna sapardalanan ro tu restoranna.

Parohon las ni roha do molo ringgas mangalehon dohot mangurupi. Jala pangurupion na dumenggan na boi talehon, i ma mangurupi angka halak mananda Silehon saluhut angka denggan, i ma Debata Jahowa! (Jakobus 1:17) Dihilala hamu do laba ni mangalehon na diulas nangkin?