“Molo dipangido hamu manang aha tu Ama i, lehononna do i tu hamu di bagasan goarhu.”​—Johannes 16:23.

Takkas do sian hata ni Jesus i, lomo roha ni Jahowa asa martangiang hita tu Ibana di bagasan goar ni Jesus. Dang marhite akka patung sisombaon, akka santo, akka suru-suruan, manang marhite akka omputta naung mate. Molo martangiang hita tu Debata di bagasan goar ni Jesus, patuduhon na taargai do naung dibahen Jesus tu hita. Jesus mandok, “Ndang adong na boi ro tu Ama i molo so marhite ahu.”​—Johannes 14:6.

“Usehon hamu ma rohamuna tu jolona, Debata do haposanta.”​—Psalmen 62:9.

Tikki martangiang hita tu Jahowa, tabahen ma Ibana gabe songon bapakta. Unang ma songon na manjaha bukku manang taapil-apil akka hata na lao tadok. Alai sian nasa rohatta ma hita martangiang tu Ibana jala sangap ma hita tikki makkatai tu Ibana.

“Manang aha na tapangido hombar tu lomo ni rohana, tangihononna do hita.”​—1 Johannes 5:14.

Dipaboa Debata Jahowa do di Bibel, aha na lao bahehonna tu hita jala aha na ikkon bahenotta. Asa dijalo Debata tangiangta, ikkon “hombar tu lomo ni rohana” do tangiangta i. Asa boi hita mangulahon i, porlu hita marsiajar Bibel asa boi tatanda Ibana. Molo taulahon i, dijalo Ibana ma tangiangta.

Manangiakkon na tahaporluhon. Boi do tatangiakkon tu Debata na tahaporluhon siganup ari songon sipanganon, pakkean manang inganatta tinggal. Boi do muse hita martangiang asa marbisuk hita tikki mambahen keputusan jala asa margogo hita tikki adong sitaonon. Boi do muse tatangiakkon asa togu haporseaotta, asa disesa dosatta, jala asa diurupi Debata hita.​—Lukas 11:3, 4, 13; Jakobus 1:5, 17.

Manangiakkon na asing. Lomo do roha ni natua-tua molo masihaholongan gellengna. Dos songon i ma Jahowa, lomo rohana molo akka gellengna na di tano on parduli tu na asing. Denggan do molo tatangiakkon istritta, suamitta, gellengta, keluargatta, dohot akka donganta na asing. Songon na didok Bibel, denggan do molo hita “masitangiangan”.​—Jakobus 5:16.

Mandok mauliate tu Ibana. Didok Bibel, dibahen Debata do “angka ulaonna na denggan. Dilehon do tu hamu udan sian langit dohot musim panen. Dilehon do tu hamu gok sipanganon dohot las ni roha”. (Ulaon ni Apostel 14:17) Molo tapikkiri sude na dibahen Debata tu hita, gabe olo ma hita mandok mauliate tu Ibana. Jala molo taoloi hatana, patuduhon na mandok mauliate do hita tu Debata.​—Kolosse 3:15.

Sipata, olo do lungun rohatta molo dang dialusi tangiangta. Alai, boi do pittor tadok na so parduli Debata tu hita? Dang songon i! Taida ma akka pengalaman na patuduhon rikkot ni toktong martangiang.

Didok si Steve na dipaboa nakkin, “Molo dang alani tangiang, nga mandele au piga-piga taon naung salpu.” Aha ma na mangurupi ibana? Mulai ma ibana marsiajar Bibel jala diparsiajari ibana ma boasa porlu toktong martangiang. Didok si Steve muse, “Martangiang ma au tu Debata, mandok mauliate ma au tu Ibana ala dilehon akka dongan na sai mangurupi au. Balga hian las ni rohakku saonari.”

Si Jenny na hea makkilala dang mararga dirina mandok, “Tikki mandele au, martangiang ma au tu Debata. Hupangido ma asa diurupi au mangattusi boasa songon i pakkilalaanku.” Aha ma hasilna? Didok ibana muse, “Tikki martangiang au tu Debata, gabe boi ma denggan carakku marpikkir. Gabe boi ma huboto, nang pe hira na so mararga dirikku huhilala, alai arga do au di Ibana. On boi mangurupi au asa unang mandele. Ala toktong au martangiang, gabe boi ma huhilala holong ni Jahowa. Gabe Bapakku, Ale-alekku jala Debata na manarihon au ma Ibana. Sai rade do Ibana mangurupi au tikki marsitutu au mangulahon lomo ni rohana.”

Taida ma muse pengalaman ni si Isabel. Tikki hamil ibana, didok dokter cacat do anak na lao ditubuhon ibana. Gabe marsak ma ibana. Piga-piga donganna mandok asa digugurhon i. Didok ibana ma, “Gabe naeng mate ma huhilala alani arsak ni rohakki.” Aha ma na diulahon ibana? Didok ibana, “Martangiang ma au tu Debata jala hupangido ma asa diurupi au.” Tikki tubu anakna si Gerard, cacat do memang anakna i. Jadi gabe didok si Isabel do, na so dialusi Debata tangiangna? Didok ibana, “Saonari nungnga marumur 14 taon anakki. Sai toktong do marlas ni roha ibana huida nang pe cacat ibana. Huboto ma, dialusi Debata do tangiakku. Gabe sada pasu-pasu do huhilala anakki di au.”

Akka pengalaman on patuduhon na tutu do hata ni panurat psalmen na mandok, “Ditangihon Ho, ale Jahowa, pinangido ni angka na dangol i, dipatogu Ho do rohanasida, dipatinggil Ho do pinggolmu.” (Psalmen 10:17) On ma na mambahen boasa porlu hita toktong martangiang!

Godang do tangiang ni Jesus na disurat di Bibel. Sada tangiangna na takkas taboto, i ma na diajarhon ibana tu akka siseanna. Aha ma na boi taparsiajari sian tangiangna i?