PELAJARAN 02

Janji taringot Masa Depan

PANGOLU

Sude do halak di portibi on adong masalahna. Olo do ra gabe lungun rohatta alani i, gabe marsak jala susa. Hea do dihilala hamu songon i? Marsak do ra hamu ala marsahit manang ala mate keluargamuna manang donganmuna. Gabe sukkun-sukkun do ra rohamuna, ‘Holan songon-songon on nama na mangolu on?’ Adong do alus ni i di Bibel.

1. Songon dia do ngolutta haduan didok Bibel?

Dipaboa Bibel do boasa godang masalah di portibi on. Alai dang holan i. Dipaboa Bibel do tong dang adong be masalah i satokkin nai. Didok Bibel, “Na lao denggan do ngolumuna di ari na naeng ro.” (Jaha Jeremia 29:11, 12.) Molo pos rohatta tu janji on, gabe margogo ma hita tikki adong masalahta. Boi ma toktong las rohatta nang pe adong masalah i. Jala pos ma rohatta sonang do ngolutta di ari na naeng ro.

2. Aha ma na lao masa haduan?

Bibel mandok, “Dang adong be hamatean nang arsak ni roha, nang angguk-angguk, nang na haccit, dang disi be.” (Jaha Pangungkapon 21:4.) Godang do saonari masalah na mambahen hita susa, contohna hapogoson, hajahaton, sahit, dohot hamatean. Alai dang adong be i satokkin nai. Bibel mandok, sonang nama ngolutta haduan saleleng ni lelengna di Paradeiso di tano on.

3. Boha do carana asa pos rohatta tu janji na adong di Bibel?

Godang do halak na lomo rohana lam denggan ma nian ngoluna haduan. Alai dang pos roha ni nasida na pasti terjadi do i. Dang songon i akka janji na adong di Bibel. Molo ‘tapareso Surat na Badia i’, gabe lam pos ma rohatta pasti terjadi do akka janji na adong disi. (Ulaon ni Apostel 17:11) Jadi molo olo hamu torus martukkar pikkiran taringot Bibel, boi ma diida hamu akka bukti na patuduhon pasti terjadi do akka janji i.

ASA LAM TAATTUSI

Jaha jala parsiajari ma akka janji na adong di Bibel taringot ngolutta haduan. Jala aha ma gunana tu hita saonari molo pos rohatta tu akka janji i.

4. Didok Bibel boi do hita mangolu saleleng ni lelengna jala dang adong be masalahta

Ida ma tabel na di toru on na marisi akka janji na tarsurat di Bibel. Janji na dia ma na paling dipaima-ima hamu? Boasa i na dipaima-ima hamu?

Jaha ma akka ayat na adong di tabel i, dung i bahas ma sukkun-sukkun on:

Boha do perasaanmuna tikki manjaha akka ayat i? Boi do akka ayat i mambahen las roha ni keluarga dohot donganmuna?

Bayakkon ma

DANG ADONG BE . . .	NA LAO MASA . . .
lungun ni roha, na matua, manang na mate.—Jesaya 25:8.	dipahehe ma halak na mate lao mangolu muse di tano on.—Johannes 5:28, 29.
na marsahit manang na cacat.—Jesaya 33:24; 35:5, 6.	sehat ma sude jolma jala mulak muse gogona songon di tikki poso.—Job 33:25.
na so adil.—Jesaya 32:16, 17.	godang sipanganon, sude halak marjabu, jala marhasil sude na takarejohon.—Psalmen 72:16; Jesaya 65:21, 22.
porang.—Psalmen 46:9.	dame ma saluhut tano on.—Psalmen 37:11.
na marsak manang na trauma.—Jesaya 65:17.	sude halak marlas ni roha saleleng ni lelengna.—Psalmen 37:29.

5. Boi do lam denggan ngolutta dung mamboto janji na adong di Bibel

Godang do halak na gabe kecewa manang muruk ala godang masalah na diida nasida saonari on. Alani i, adong do deba sian nasida na berjuang mambahen asa lam denggan keadaan. Alai ida ma aha manfaatna dung diboto nasida janji na adong di Bibel. Putar ma VIDEO, dung i bahas ma sukkun-sukkun on:

VIDEO: Ndang Lomo Rohangku Paimbar-imbarhon Halak (4:07)

Aha do na dialami si Rafika mulai sian dakdanak ibana?
Aha do manfaatna dung marsiajar Bibel ibana?

Molo pos rohatta tu janji na dipaboa di Bibel, gabe dang kecewa be hita. Jala boi ma toktong las rohatta nang pe godang masalah. Jaha Poda 17:22 dohot Rom 12:12, dung i bahas ma sukkun-sukkun on:

Molo menurut hamu, aha do manfaatna dung diboto hamu janji na adong di Bibel? Boasa boi songon i?

ADONG DO NA MANDOK: “Hira na so mungkin do terjadi janji na dipaboa di Bibel i.”

Menurut hamu, boasa porlu talului bukti na patuduhon pasti terjadi do janji na dipaboa di Bibel?

KESIMPULAN

Dipaboa do di Bibel akka janji taringot masa depan. On boi mambahen las rohatta nang pe godang masalahta. Jala boi mambahen lam denggan ngolutta saonari.