Tikki didok istilah “hata ni Debata” di Bibel biasana lapatanna disi, i ma hata na dipasahat ni Debata. (Lukas 11:28) Alai tikki didok di piga-piga ayat “Hata ni Debata” manang “Hata i”, boi do i tong maksudna gelar na dilehon tu Jesus.​—Pangungkapon 19:13; Johannes 1:​14.

 Hata na dipasahat Debata. Jotjot do akka panurirang mandok molo hata na dipaboa ni nasida, i ma hata ni Jahowa. Contohna, hea do didok di Bibel molo si Jehu dohot si Elia pasahatton “hata ni Jahowa”. (1 Raja-Raja 16:12; 2 Raja-Raja 9:36) Jala tikki dipasingot Panurirang Jesaya halak Israel na jahat, didok ibana do tu nasida, “Tangihon hamu ma hata ni Jahowa, hamu ale siginjang roha, hamu ale akka pamimpin ni bangso on na di Jerusalem.”​—Jesaya 28:14.

 Gelar ni Jesus. Di Bibel, dipakke do tong istilah “Hata i” lao mandok gelar ni Jesus Kristus tikki di surgo ibana nang tikki di tano on. Taida ma piga-piga alasanna boasa boi tadok songon i:

•   Nungnga adong Hata i sebelum ditoppa dope akka na asing. Didok do di Bibel, “Sian mulana nungnga adong Hata i. . . . Sian mulana, rap do ibana dohot Debata.” (Johannes 1:​1, 2) Jesus do “na parjolo ditoppa sian saluhutna . . . Nungnga adong ibana andorang so adong na asing”.​—Kolosse 1:​13-​15, 17.

•   Ro do Hata i tu tano on gabe jolma. Didok di Bibel, “Gabe jolma ma Hata i jala maringanan di tonga-tongatta.” (Johannes 1:​14) Hape didok do di ayat na asing, “Ditadikkon [Jesus] do sude na di ibana, gabe songon hatoban do ibana jala gabe jolma.”​—Pilippi 2:​5-7.

•   Anak ni Debata do Hata i. Dung didok si Johannes “gabe jolma ma Hata i”, didok ibana do muse songon on, “Nungnga taida hasangaponna, i ma hasangapon songon na dijalo anak sasada sian amana.” (Johannes 1:​14) Di ayat na asing, dipaboa si Johannes do molo “Jesus i Anak ni Debata”.​—1 Johannes 4:​15.

•   Sarupa do sifat ni Hata i tu sifat ni Debata. Hea do didok di Bibel, “debata do Hata i” manang “songon debata” do Hata i. (Johannes 1:1, surat na di toru) Di ayat na asing didok do, “Marhite [Jesus] tarida do hasangapon ni Debata jala ibana do na suman situtu tu Debata.”​—Heber 1:​2, 3.

•   Gabe Raja do hata i. Didok di Bibel, “godang do mahkota” na dilehon tu ulu ni Hata i. (Pangungkapon 19:12, 13) Didok do muse Hata i “Raja ni akka raja dohot Tuan ni akka tuan”. (Pangungkapon 19:16) Hape sian ayat na asing taboto ma molo Jesus pe mandapot gelar na sarupa do.​—1 Timoteus 6:​14, 15.

•   Juru bicara ni Debata do Hata i. Jotjot do gelar “Hata i” dipakke di Bibel lao patuduhon halak na dipillit Debata pasahatton hatana manang parettana. Jala diakkui Jesus do molo ibana juru bicara ni Debata. Hea do didok ibana, “Ama na manuru au i do na mangalehon paretta tu au taringot tu aha na lao hatahonokku dohot na lao ajarhonokku. . . . Alani i, manang aha na dipaboa Ama i tu au, i do na huhatahon.”​—Johannes 12:49, 50.