Tɔn dabina ku ra maa Kirisigibun mɛnnɔsu de, yèn sɔ̃ su ku ra be tãsisie ben bɔrɔnu ka Gusunɔn swaa sɔɔ ǹ kun mɛ ba ku ra gɔ̃ru yɛmiabu nɔɔ bà n si da. Mban sɔ̃na n sere weenɛ a mɛnnɔ si Yehofan Seeda Dio ba ra ko da? Mba kaa wa migun?

Kaa n nuku dobu mɔ tɔn be ba kĩru mɔɔsinɛn suunu sɔɔ. Wɔ̃ɔ wunɔbu gbiika bɛsɛn waati sɔɔ, Kirisigiba ra raa mɛnnɛ yigbɛnu sɔɔ kpa bu mɛnnɔsu ko bu ka Gusunɔ sã, bu ka Win Garin keu ko, kpa bu ka dam kɛ̃ɛna. (Heberu 10:24, 25) Ba ra mɛnnɛ yam mi kĩra wãa, ba ra tubu ma ba wãa bɔrɔ geobun suunu sɔɔ, bɔrɔ be ba sãa ben kĩnasibu Gusunɔn sãaru sɔɔ. (2 Tɛsalonika 1:3; 3 Yohanu 14) Ben yira sa swĩi, bɛsɛn tii, sa maa nuku doo bi waamɔ gisɔ.

Kaa arufaani wa à n ka Bibelin gee kpɛɛkpɛɛkugii sɔmburu mɔ̀. Nge mɛ ya raa sãa sanam mɛ ba Bibeli yorumɔ, tɔn durɔ, tɔn kurɔ ka bibu ba ra mɛnnɛ sannu bu ka Gusunɔ sã. Keu sɔ̃ɔsio be ba ye, ba ra Bibeli loo ko bu ka sun somi su ka tubu mɛ sa ko ka Bibelin gee kpɛɛkpɛɛkugii sɔmburu ko bɛsɛn baadomman wãaru sɔɔ. (Sɔ̃ɔsiru 31:12; Nɛɛmi 8:8) Baawure u koo kpĩ u win naanɛ dokebu ka win yĩiyɔ tusia, wesianɔ ka womusu sɔɔ, mɛnnɔ si sɔɔ.—Heberu 10:23.

Kaa domaru wa ma wunɛn naanɛ dokebu Gusunɔ sɔɔ bu dam sosimɔ. Gɔro Pɔlu u yigbɛru garu sɔ̃ɔwa win waati sɔɔ, u nɛɛ: “Na gɔ̃ru doke gem gem n bɛɛ wa . . . kpa sa n dam kɛ̃ɛnamɔ bɛsɛn naanɛ dokebu sɔɔ nɛ ka bɛɛ.” (Romu 1:11, 12) Yèn sɔ̃ sa ra n waanamɔ kiri kiri mɛnnɔsu sɔɔ ka bɛsɛn naanɛ dokeosibu, ya ra bɛsɛn naanɛ dokebu dam kɛ̃, kpa bɛsɛn wãasina nge Kirisigii yu sirera.

A sokuru wuro kpa a bɛsɛn mɛnnɔsu na, kpa a ka tii arufaani yìn gari sa mɔ̀ dɛnda. À n na, sa ko nun dam koosia ka kĩi te ta dam mɔ, sɔ̃ke sɔ̃ke maa sari.

• Beràn yira sa swĩi bɛsɛn mɛnnɔsu sɔɔ?

• Amɔsunwa sa ko ko su ka arufaani wa sà n mɛnnɔ si da?