BƆNU 5
I n bɔri yɛndu naa swĩi ka bɛɛn dusibu
“Wee ye n weenɛ i sebe . . . tɔn geeru ka tii kawabu, ka daa duudwia ka suuru.”—Kolose 3:12
Be ba suana ba kua yɛnu kpɔɔgibu. Geema, kaa wunɛn mɔwɔbu kĩa kpa a be bɛɛrɛ wɛ̃ sere ka baadommaɔ, adama wee tɛ̃, wi a suewa u koo gɔsia wunɛn tɔn gbiiko tem mi. Yeni ya koo sɛ̃sia wunɛn dusi gabu bu ka ye wura. Adama, Bibelin gee kpɛɛkpɛɛkugii yi koo kpĩ yu nun somi a ka baawure wi win ayeru wɛ̃. Kaa n bɔri yɛndu mɔ ka wunɛn dusibu, sanam mɛ a hania mɔ̀ too a ka wunɛn yɛnu kpɔɔ bani wãasina gea sɔɔ.
1 A N WUNƐN DUSIBUN AYERU YƐ̃
YE BIBELI YA GERUMƆ: “A wunɛn tundo ka wunɛn mɛro bɛɛrɛ wɛ̃ɛyɔ.” (Efesu 6:2) Baa n wɔ̃ɔ nye n na a mɔ, n weenɛ a wunɛn mɔwɔbu girima ka bɛɛrɛ doke. A ku duari ma wi a suen tii u maa mɔwɔbu mɔ, n weenɛ u maa be win laakari wɛ̃. A ku de kĩi te ba mɔɔsinɛ tu nun wururasia, domi kĩi geeru ta ku ra n nisinu mɔ.—1 Korinti 13:4; Galati 5:26.
YE KAA KPĨ A KO:
-
A n kun da gari ni nin bweseru gere: “wunɛn dusiba ra baadomma man kam mɛɛrimɔwa” ǹ kun mɛ: “ye na mɔ̀ kpuro ya ku ra wunɛn mɛro wɛ̃re baa sɔ̃ɔ teeru”
-
A kasuo a gãanu mɛɛri nge mɛ wunɛn kĩnasi ni mɛɛra
2 A N KPEERE A KA GÃA BAANIRE YI NIN AYERƆ
YE BIBELI YA GERUMƆ: “Durɔ u koo win tundo ka win mɛro deri kpa wi ka win kurɔ ba n maninɛ, kpa be yiru kpuro bu ko wasi tee.” (Torubu 2:24) Baa ye a suanaa kua, sɔrɔkudo wunɛn mɔwɔbu ba ko ba n tamaa ba tie ba sãa wunɛn wirugibu kpa ba n kĩ bu nɔɔ doke wunɛn yɛnun wãaru sɔɔ.
Wunɛ ka wi a sue sanna i ko i mɛɛri mɛn nɔɔ i ko i wura bu gari ko bɛɛn yɛnun wãaru sɔɔ, kpa i be ye nɔɔsia ka kĩru. I ko i kpĩ i be sɔ̃ kpasasa ye i gɔ̃ru doke, adama, i n kun ka be bɔ. (Mɔnnu 15:1) Tii kawabu, daa duudwia ka suuru yi koo bɛɛ somi i ka wãasina damgia bani ka bεεn dusibu kpa i n bɔ “i n kĩru sɔ̃ɔsinamɔ.”—Efesu 4:2.
YE KAA KPĨ A KO:
-
À n waamɔ ma bɛɛn dusibu ba nɔɔ dokemɔ too bɛɛn yɛnun wãaru sɔɔ, a ka wi a sue yen gari koowo sanam mɛ bɔri yɛndu wãa
-
I nɔɔsinɔ mɛ i ko i ka gari yi ba n bweseru wunana