Сираттағы терактан һуң һеҙ былай тип уйларға мөмкин: «Алла ҡайҙа ҡарай? Нишләп шундай нәмәләр була? Терроризм a берәй ҡасан бөтөрмө? Гел ҡурҡып нисек йәшәргә?» Изге Яҙма был һорауҙарға тулы яуап бирә.

 Алла йәбер-золом һәм терроризмды күрә алмай (Зәбур 11:5; Ғибрәтле һүҙҙәр 6:16, 17). Ғайса пәйғәмбәр, көс ҡулланған өсөн шәкерттәрен шелтәләгән саҡта, Алланың ҡарашын белдергән (Матфей 26:50—52). Ҡайһы берәүҙәр Алла хаҡына көс ҡулланабыҙ тиһәләр ҙә, Алла уларға шулай эшләргә бер ниндәй ҙә хоҡуҡ бирмәгән. Ысынында ул ундай кешеләрҙең доғаһын да тыңламай (Ишағыя 1:15).

 Алла ғазап сиккән кешеләрҙең барыһын да, шул иҫәптән теракт ҡорбандарын да йәлләй (Зәбур 31:7; 1 Петр 5:7). Изге Яҙмала, ул йәбер-золомдо бөтөрәсәк, тип әйтелә (Ишағыя 60:18).

 Изге Яҙмала терроризмдың төп сәбәбе күрһәтелә. Унда: «Кешенең башҡа кеше өҫтөнән хакимлыҡ итеүе зыян ғына килтерә», — тип әйтелә (Вәғәзсе 8:9). Тарих дауамында хакимлыҡ итеүселәр башҡаларҙы йәберләр өсөн террор тактикаһын ҡулланған. Шундай баҫымға ҡаршылыҡ күрһәтеп, ҡайһы берәүҙәр терроризм менән яуап бирә (Вәғәзсе 7:7).

 Аллаһы Тәғәлә, йәбер-золом һәм ҡурҡыуҙы бөтөрөп, бөтә ер йөҙөндә тыныслыҡ булдырырға вәғәҙә бирә (Ишағыя 32:18; Миҡай 4:3, 4).

•   Терроризмдың төп сәбәбе юҡ ителәсәк. Алла кеше хөкүмәттәрен үҙенең бөтә донъя хөкүмәте менән алмаштырасаҡ. Был хөкүмәттең башлығы Ғайса Мәсих бөтә кешеләр менән ғәҙел мөғәмәлә итәсәк һәм йәбер-золом менән көс ҡулланыуҙы туҡтатасаҡ (Зәбур 72:2, 14). Ул саҡта берәү ҙә террор ҡулланмаҫ. Кешеләр «сикһеҙ тыныслыҡтан ҙур рәхәтлек табасаҡ» (Зәбур 37:10, 11).

•   Терроризмдың бөтә эҙемтәләре юҡ ителәсәк. Алла кешеләрҙе терроризмдың эҙемтәләренән, шул иҫәптән физик һәм эмоциональ яраларҙан арындырасаҡ (Ишағыя 65:17; Асылыш 21:3, 4) Ул хатта үлгәндәрҙе терелтәсәк, һәм улар ерҙә тыныслыҡта йәшәйәсәк (Яхъя 5:28, 29).

 Изге Яҙмала Алланың тиҙҙән эш итә башларына төплө дәлилдәр бар. Әммә һеҙ: «Ни өсөн Алла һаман да терроризмды юҡ итмәгән?» — тип һорарһығыҙ. Яуапты һеҙ «Ни өсөн Алла ғазаптарға юл ҡуя?» тигән видеояҙманан белә алаһығыҙ.