Румынијанын ән бөјүк шәһәрләриндән бири олан Клуж-Напока «Ләл-ҹаваһират шәһәр»и кими таныныр. 2016-ҹы ил апрелин 20-синдән 24-үнәдәк бу шәһәрдә «Гаудеамус» китаб сәрҝиси кечирилди. Јеһованын Шаһидләри бу сәрҝидә диггәти Мүгәддәс Китабдакы әхлаги вә мәнәви дәјәрләрә јөнәлтмишдиләр. Онлар стендләр гурашдырды вә Мүгәддәс Китаба, она әсасланан нәшрләрә вә видеолара мараг ҝөстәрән минләрлә иштиракчыјла сөһбәт етди.

Сәрҝијә екскурсија едән бир нечә мәктәбин мүәллимләри вә шаҝирдләри Јеһованын Шаһидләринин стендинә дә јахынлашдылар. «Јеһованын досту ол» рубрикасындакы ҹизҝи филмләринә бахмаг шаҝирдләрин хүсусилә хошуна ҝәлди. Онларын әксәријјәти «Мүгәддәс Китаб һекајәләри» китабыны вә «Өвладларымызы өјрәдәк» брошүрүнүн нүсхәләрини ҝөтүрдү. Бу ҹизҝи филмләринә бахан бир бағча мүәллимәси өз һәмкарына демишди: «Ушаглара ҹизҝи филмләрин һамысыны ҝөстәрмәк үчүн ҝәрәк [www.pr418.com] вебсајт үнваныны гејд едәк».

Јухары синиф шаҝирдләри исә даһа чох «Бу ешгдир, јохса мәһәббәт?», «Сосиал шәбәкәләрдән истифадә едәркән еһтијатлы ол» вә «Әл-гол атмадан хулиганын ҹавабыны вер» адлы гәләм анимасијалы видеолары бәјәндиләр.

Бир православ кешиш һәјат јолдашы илә бирҝә стендә бир нечә дәфә јахынлашды. Онлар Мүгәддәс Китабын «Јени Дүнја Тәрҹүмәси»ни вә бәзи нәшрләр ҝөтүрдүләр. Кешишин сөзләринә ҝөрә, бу тәрҹүмәнин үстүн ҹәһәтләриндән олан «Сөзләр ҝөстәриҹиси» вә тәрҹүмәчиләрин етибарлы мәнбәләрдән истифадә етмәси она ҝөзәл тәәссүрат бағышлајыб. О, һәмчинин Шаһидләрә өз телефон нөмрәсини верди ки, Мүгәддәс Китаб барәдә сөһбәт етмәк үчүн онунла әлагә сахласынлар.

Кешишин арвады jw.org сајтындан ушаглар үчүн мәлуматы неҹә әлдә едә биләҹәјини сорушду. Шаһидләр ону сајтын «Ушаглар» бөлмәси илә таныш етдиләр. «Дүрүст ол» видеосу онун лап үрәјинҹә олду. Сајтын бөлмәләри илә таныш олдугдан сонра јолдашы бу сајты «Аллаһын инсанлара һәдијјәси» адландырды.