Уорвик комплексинин бүтүн биналары артыг истифадәјә верилиб. Сентјабр ајында бурада артыг 500-ә јахын адам јашајырды. Онларын арасында тикинти лајиһәләриндә чалышан көнүллүләр вә Бруклиндән бура көчән тамвахтлы хидмәтчиләр вар иди.

Рәссам «Јеһованын адыны дашыјан халг» адлы сәрҝинин ҝириш диварлары үзәриндәки ҝүзҝү плитәләрин сәтһини јохлајыр. Сәрҝи тарихи мөвзуја һәср олундуғундан плитәләрә гәдими ҝөрүнүш верилмишдир.

Јеһованын Шаһидләринин Рәһбәрлик Шурасынын үзвү Стивен Летт Уорвикдән јајымланан илк сәһәр ибадәти програмына сәдрлик едир. Һәмин ҝүн Стивен Летт гардаш бу биналарын иншасында иштирак едән 27 миндән чох көнүллү вә лајиһәни мүхтәлиф ҹүр дәстәкләјән бир чох инсана миннәтдарлыг мәктубуну охуду.

Бурада үч сәрҝи нүмајиш олунаҹаг. Харрат «Јеһованын адыны дашыјан халг» адлы сәрҝинин ҝиришиндә гојулаҹаг лөвһәнин үзәринә һәрфләри дүзүр. Сәрҝи Јеһованын Шаһидләринин 1870-ҹи илдән бу ҝүнә гәдәр олан тарихини әкс етдирир.

Јазы комитәси өз көмәкчиләри вә Јазы шөбәсинин үзвләри илә ҝөрүш кечирир. Бөјүк мониторларда ҝәләҹәк нәшрләр үчүн нәзәрдә тутулан шәкилләр нүмајиш олунур. Бундан әлавә, мониторлар башга биналарда олан шөбәләрин бу ҝөрүшләр заманы комитә илә видеоконфранс јаратмасына имкан јарадыр. Бир нечә ил бундан әввәл тәшкилата һәдијјә едилмиш маса Бруклиндән Уорвикә ҝәтирилмишдир.

Координаторлар комитәси өз әмәкдашлары илә бирҝә Филиппиндә бир ҝүн өнҹә баш вермиш «Һаијан» тајфунундан зәрәрчәкәнләрә көмәк етмәјин јолларыны мүзакирә едир. Баш идарәдәки шөбәләр тәҹили мәсәләләр јарананда видеоконфранс васитәсилә бүтүн дүнјадакы филиалларла әлагә јарада билирләр.

Шәкилдә тәсвир олунан хүсуси ҝөл тәмир сехи илә әсас ҝириш јолун арасындадыр. Уорвикдәки бу вә диҝәр ҝөлләр тәбии јолла јағыш суларыны топлајыб тәмизләјир. Әҝәр дренаж системи гурашдырылсајды, 50 фаиз артыг вәсаит сәрф олунаҹагды. Үстәлик, чајлара ахан тәмизләнмиш су флора вә фауна үчүн ҝөзәл мүһит јарадыр.

Бир груп ишчи әшјалары јүк машынына јүкләјир. Бруклиндән Уорвикә көчәнләрә тәхминән 80 көнүллү көмәк етмишдир.

Чөрәкчиләр хәмирјоғуран аваданлығындакы бөјүк хәмир күтләсини дәзҝаһын үстүнә бошалдыр. Хәмирин чәкиси бәзән 45 килограмдан артыг олдуғундан ашағы-јухары һәрәкәт едә билән бу аваданлыг иши асанлашдырыр вә тәһлүкәсиз едир. Бурада һәмчинин температуру вә рүтубәти тәнзимләјән хүсуси гурғу вар. Онун сајәсиндә гыҹгырма просесини ја сүрәтләндирмәк, ја да зәифләтмәк мүмкүндүр. Бу гурғу һәр һәфтә јүзләрлә чөрәк биширмәк ишини хејли јүнҝүлләшдирир.

Ишчиләр тәмир сехиндән зибилләри чыхарырлар. Бруклиндәки биналарымыздан фәргли олараг, Уорвикдәки биналарын әксәријјәти бир-бири илә бағлы инша едилиб. Белә ки, зир-зибили атмаг вә тәкрар емал олунасы материаллары бинадан чыхармаг үчүн даһа аз ишчи вә нәглијјат васитәси тәләб олунур.

Көјнәји хүсуси аваданлыгда үтүләмәздән өнҹә гырышларыны ачмаг үчүн она су пүскүрдүлүр. Уорвик ҹамашырханасында һәр һәфтә орта һесабла 5000-дән чох килограм палтар вә ја јатаг дәсти јујулур. Һәр палтара баркод јапышдырылыр. Ишин дүзҝүн иҹра олундуғуну јохламаг вә јујулан пал-палтары дүзҝүн үнвана чатдырмаг үчүн бу баркодлар ҹамашырханада скан едилир.

Механик електрик стансијасында истифадә олунан краны јохлајыб тәмир едир. Вахташыры едилән бу ишин сајәсиндә аваданлыг узунөмүрлү вә тәһлүкәсиз олур.

Техник «Әмәлдә ҝөрүнән иман» адлы сәрҝинин илк ҝөрүнтүсүнү ҝөстәрән компүтер програмыны јохлајыр.

Ишчиләр «Јеһованын адыны дашыјан халг» адлы сәрҝи үчүн 1903-ҹү илдә истеһсал олунмуш велосипеди һазырлајыр. Тәшкилата һәдијјә едилмиш бу велосипед Уорвикдәки ишчиләр тәрәфиндән бәрпа едилиб. Велосипед Мүгәддәс Китаб хәбәрини чатдырмаг үчүн бу кими нәглијјат васитәләриндән истифадә едән Мүгәддәс Китаб Тәдгигатчыларынын (Јеһованын Шаһидләрини әввәлки ады) нә гәдәр ҹан гојдуғуну ҝөстәрмәк мәгсәдилә нүмајиш олунаҹаг.

Ишчиләр Мүгәддәс Китаба әсасланмыш «Јарадылыш фотодрамы»нын експонатларыны горумаг үчүн шүшәләр гурашдырырлар. Слајд вә анимасијалардан ибарәт олан бу фотодрамын премјерасы 1914-ҹү илдә олмушду вә һәмин ил ону тәхминән 9 милјон инсан изләмишди.

График дизајнер вә архивчиләр «Мүгәддәс Китаб вә Аллаһын ады» сәрҝиси үчүн 1544-ҹү илдә Сүрихдә латын дилиндә нәшр олунан Мүгәддәс Китабы һазырлајырлар. Өн планда олан Мүгәддәс Китабдакы гырмызы ох Јеһова Аллаһын адына ишарә едир. Архивчиләр Мүгәддәс Китабын көврәк әлјазмаларыны горумаг үчүн бир сыра тәдбирләр ҝөрүрләр. Мисал үчүн, онлар назик полиефир лентләри илә сәһифәләри јеринә бәркидирләр. Бундан әлавә, галерејада рүтубәт вә температур тәнзимләнир вә зәриф сәһифәләрин зәдәләнмәсинин гаршысыны алмаг үчүн сәрҝидә гурашдырылан оптик-лифли ишыгландырмаја ҹидди нәзарәт едилир.

Гонаглар бәләдчинин мүшајиәтилә 23 метрлик гүлләдән Уорвик комплексинә ачылан мөһтәшәм мәнзәрәни сејр едирләр. 2017-ҹи ил апрелин 3-дән етибарән Уорвикдәки биналары вә сәрҝиләри зијарәт етмәк мүмкүндүр. Екскурсијаја өнҹәдән јазылмаг лазымдыр. Бунун үчүн рәсми сајтымызда ҺАГГЫМЫЗДА > ФИЛИАЛЛАР ВӘ ЕКСКУРСИЈА бөлмәсинә дахил олуб онлајн гејдијјатдан кечә биләрсиниз.

Архивчи 1611-ҹи илдә ишыг үзү ҝөрмүш надир бир китабы — «Крал Јаковун Мүгәддәс Китабы»нын илк нәшрини витринә јерләшдирир. Сәрҝи витринләри хүсуси олараг Уорвик мүһәндисләри тәрәфиндән һазырланыб.

График дизајнер һүндүр шлјапаны витринә јерләшдирир. Бу шлјапа Јеһованын Шаһидләринин фәалијјәтинә бир әср бундан өнҹә рәһбәрлик едән Ҹозеф Рутерфорда мәхсусдур. «Јеһованын адыны дашыјан халг» сәрҝисинин бу ҝушәсиндә Јеһованын Шаһидләринин һәмин дөврдә хош хәбәри неҹә бәјан етдикләри нүмајиш олунур.

Аудиојазы һејәтинин көмәјилә охуҹу «Мүгәддәс Китаб вә Аллаһын ады» сәрҝиси үчүн һазырланан материалы сәсләндирир. Бруклиндәки сәсјазма студијасы сөкүлүб Уорвикә көчүрүләндән ҹәми бир һәфтә сонра фәалијјәтини бәрпа етди. Бу студијада (әсас сәсјазма студијалары Патерсондакы Ҝөзәтчи Гүлләсинин Тәлим Мәркәзиндә јерләшир) һәмчинин Мүгәддәс Китабын «Јени Дүнја Тәрҹүмәси», «Ҝөзәтчи гүлләси» вә «Ојанын!» журналлары, о ҹүмләдән jw.org сајтында чыхан мәгаләләр вә диҝәр нәшрләр сәсләндирилир.

Харрат көмәкчиси үчөлчүлү фотосәрҝинин кәнарларыны бојајыр. «Јеһованын адыны дашыјан халг» сәрҝисинин бу ҝушәсиндә 19-ҹу әсрин сонларында јашамыш Мүгәддәс Китаб Тәдгигатчыларынын шәкилләри сәрҝиләнир.

Рәссам «Јеһованын досту ол» адлы ҹизҝи филминин баш гәһраманынын — Еминин моделини рәнҝләјир. Бу модел Јеһованын Шаһидләринин ушаглар үчүн һазырладығы вәсаитләрин әкс олундуғу ҝушәдә јерләшдириләҹәк.

Харрат «Јеһованын адыны дашыјан халг» адлы сәрҝи үчүн шәкил вә плакатлары кәсир. Үч сәрҝи үзәриндә 250-дән чох көнүллүнүн әмәји кечмишдир. Онларын арасында дүлҝәрләр, компүтер програмчылары, дизајнерләр, електрикләр, кафел-метлах усталары, видеографчылар, јазычылар вә диҝәр мүтәхәссисләр олуб.