Бу ҝүн дүнја порнографија a селинә мәруз галыб. Порнографијаја һәр јердә — рекламларда, дәбдә, киноларда, мусигиләрдә, журнал вә телевизијада, видеоојунларда, смартфонларда, мобил ҹиһазларда, веб-сајтларда вә онлајн шәкил пајлашма хидмәтләриндә раст ҝәлмәк мүмкүндүр. Порнографија мүасир ҹәмијјәтдә бөјүк күтлә тәрәфиндән нормал гаршыланыр. Бу ҝүн тарихдә һеч вахт олмадығы гәдәр даһа чох инсан порнографијаја мараг ҝөстәрир. ( «Порнографија илә бағлы фактлар» адлы чәрчивәјә бахын.)

Порнографијанын мәзмуну да дәјишир. Профессор Гејл Дајнс јазыр: «Индики шәкилләр елә һәддә ҝәлиб чатыб ки, әввәлләр ајыб сајыланлар инди нормал гаршыланыр».

Сиз бу барәдә нә дүшүнүрсүнүз? Порнографија зәрәрсиз әјләнҹәдир, јохса зәрәрлидир? Иса демишди: «Һәр јахшы ағаҹ јахшы мејвә верир, чүрүк ағаҹ исә јарарсыз мејвә верир» (Мәтта 7:17). Порнографија һансы бәһрәләри ҝәтирир? Ҹавабы тапмаг үчүн ҝәлин порнографија илә бағлы бәзи ваҹиб суаллара диггәт јетирәк.

МҮТӘХӘССИСЛӘР НӘ ДЕЈИР? Порнографија наркотик кимидир, она алудә олмаг чох асандыр.

Интернет порнографијасына алудә олан Брајн b адлы бир нәфәр дејир: «Һеч нә мәни сахлаја билмирди. Өзүмү наркотик гәбул еләмиш адам кими һисс едирдим. Бејнимдә һәгиги мәнада сарсынты вә ағры кечирирдим. Нә гәдәр тәрҝитмәјә чалышсам да, илләрлә бу вәрдишимдән јаха гуртара билмәдим».

Порнографијаја алудә олан инсанлар бу вәрдишләрини башгаларындан ҝизләдирләр. Буна ҝөрә онлар һијләјә вә јалана да әл ата биләрләр. Порнографијаја баханларын чоху өзләрини тәнһа вә ҝәрҝин һисс едирләр, депрессијада олурлар, утанырлар, нараһатлыг кечирирләр. Бәзи һалларда бу инсанлар интиһар етмәк барәдә дә дүшүнүрләр. Серга адлы бир нәфәр демәк олар ки, һәр ҝүн телефонуна порнографија јүкләјирди. О дејир: «Өзүмү дәјәрсиз, ҝүнаһкар, тәнһа вә тәләдә һисс едирдим. Елә утанырдым ки, көмәк истәмәјә дә горхурдум».

Порнографија инсана чох бөјүк зәрәри вар, һәтта она өтәри бахса да. Порнографија үзрә арашдырмалар апаран Др. Ҹүдит Рејсман гејд етмишди ки, порнографик шәкилләр инсан бејнинә һәкк олур вә унутмаг чәтин олур. Сузан адлы 19 јашлы бир гызын интернетдә габағына анидән порнографик сајтлар чыхмышды. О дејир: «О шәкилләр елә бил јаддашыма јазылды. Бу шәкилләри јаддашымдан силиб ата билмирәм. Һәрдән онлар ҝөзүмүн габағына ҝәлир».

ХҮЛАСӘ: Порнографија инсаны көлә едир вә гурбаныны мәһв едир (2 Бутрус 2:19).

МҮТӘХӘССИСЛӘР НӘ ДЕЈИР? «Порнографија уҹбатындан ҹүтлүкләр ајрылыр, аиләләр дағылыр» («The Porn Trap», Wendy and Larry Maltz).

Порнографија никаһа вә аиләјә бу ҹүр тәсир едир:

• Әр-арвад арасында етибары, мәһрәм һиссләри вә мәһәббәти мәһв едир (Мәсәлләр 2:12—17).

• Инсанын худбин олмасына, һәјат јолдашындан сојумасына ҝәтириб чыхарыр, емосионал бошлуг јарадыр (Ефеслиләрә 5:28, 29).

• Инсанда дүзҝүн олмајан сексуал фантазијалар, истәкләр ојадыр (2 Бутрус 2:14).

• Инсан һәјат јолдашыны намүнасиб сексуал һәрәкәтләр етмәјә мәҹбур едир (Ефеслиләрә 5:3, 4).

• Инсаны һәм әглән, һәм дә ҹисмән хәјанәтә сүрүкләјир (Мәтта 5:28).

Мүгәддәс Китабда јазылыб ки, әрлә арвад бир-бириләринә хәјанәт етмәмәлидир (Мәлаки 2:16). Сәдагәтсизлик хәјанәтдир вә никаһы дағыда биләр. Әрлә арвадын ајрылмасына вә ја бошанмасына ҝәтириб чыхара биләр. Аиләдә ушаглар да бундан бөјүк зәрәр ҝөрүр.

Порнографија ушаглара да бирбаша тәсир едир. Јухарыда ады чәкилән Брајн дејир: «Һарадаса 10 јашым оланда ҝизлән-гач ојнајан вахт тәсадүфән атамын порнографик журналларыны тапдым. Бу журналлара ҝизли-ҝизли бахмаға башладым. Өзүм дә билмирдим ки, һәмин шәкилләрә бахмаға мәни нә ҹәлб едир. Нәтиҹәдә јеткинлик јашыма кими бу пис вәрдишимдән гуртула билмәдим». Арашдырмалар ҝөстәрир ки, порнографија јенијетмәләрин ҝәнҹ јашларында ҹинси активлијини артырыр. Белә ҝәнҹләр даһа чох инсанла ҹинси әлагәдә олур, ҹинси зоракылыға мејилли, емосионал вә психоложи ҹәһәтдән гејри-стабил олурлар.

ХҮЛАСӘ: Порнографија ҝөзәл мүнасибәтләри зәһәрләјир, инсана үрәкағрысы, әзаб верир (Мәсәлләр 6:27).

АЛЛАҺЫН КӘЛАМЫНДА ЈАЗЫЛЫБ: «Јердәки бәдәнинизин үзвләриндә олан мејилләри — әхлагсызлыға, натәмизлијә, шәһвәтә, нәфсә вә бүтпәрәстлик олан тамаһкарлыға мејилләри өлдүрүн» (Колослулара 3:5).

Гыса десәк, Јеһова c порнографијаја нифрәт едир. Бу о демәк дејил ки, О, ҹинси мүнасибәтләрә пис јанашыр. Јеһова бизи ҹинси габилијјәтләрлә јарадыб. Мәгсәди исә о олуб ки, әр-арвад бир-бириләрини мәмнун еләсин, емосионал ҹәһәтдән бир-бириләринә јахынлашсын вә ушаг дүнјаја ҝәтирсинләр (Јагуб 1:17).

Бәс онда нә үчүн дејирик ки, Јеһова порнографијаја нифрәт едир? Ҝәлин бир нечә сәбәбә бахаг.

• О билир ки, порнографија инсанын һәјатыны мәһв едир (Ефеслиләрә 4:17—19).

• Аллаһ бизи севир вә истәмир ки, бизә зијан дәјсин (Әшија 48:17, 18).

• Јеһова истәјир ки, бизим никаһымыз вә аиләмиз дағылмасын (Мәтта 19:4—6).

• О истәјир ки, әхлагымыз тәмиз олсун вә башгаларынын һүгугларына һөрмәт едәк (1 Салоникилиләрә 4:3—6).

• О истәјир ки, биз нәсил артырма габилијјәтимизә һөрмәт едәк вә ондан дүзҝүн истифадә едәк (Ибраниләрә 13:4).

• Јеһова билир ки, порнографија ҹинси мүнасибәт һагда јанлыш, худбин вә шејтани бахыш ашылајыр (Јарадылыш 6:2; Јәһуда 6, 7).

ХҮЛАСӘ: Порнографија инсанын Аллаһла достлуғуна зәрәр вурур (Ромалылара 1:24).

Амма Јеһова порнографијадан гуртулмаг истәјән инсанлара гаршы чох мәрһәмәтлидир. Мүгәддәс Китабда дејилир: «Јеһова мәрһәмәт, шәфгәт саһибидир, сәбирлидир, мәһәббәти болдур. Чүнки неҹә јарандығымызы јахшы билир, торпаг олдуғумузу унутмур» (Зәбур 103:8, 14). О, тәвазөкар инсанлары дара дүшәндә Ондан мәрһәмәт вә лүтф ҝөрмәјә сәсләјир (Ибраниләрә 4:16;  «Порнографија тәләсиндән азад олмаг» адлы чәрчивәјә бахын).

Сајсыз-һесабсыз инсан Аллаһын көмәјини гәбул едиб. Бәс бу көмәјин бир фајдасы олуб? Ҝөрүн Мүгәддәс Китабда пис вәрдишини тәрҝидәнләр һагда нә дејилир: «Сиз Аллаһымызын руһу илә вә Ағамыз Иса Мәсиһин ады илә јујулуб тәмизләндиниз, мүгәддәс едилдиниз, салеһ сајылдыныз» (1 Коринфлиләрә 6:11). Һәвари Булус кими, бу ҹүр инсанлар да дејир: «Мәнә гүввәт верәнин сајәсиндә һәр шејә ҝүҹүм чатыр» (Филиппилиләрә 4:13).

Порнографија асылылығындан гуртулан Сузан дејир: «Бу тәләдән гуртулмағыныза јалныз Јеһова көмәк едә биләр. Әҝәр Ондан көмәк истәсәниз, сизә јол ҝөстәрмәсини диләсәниз, Онун өнүндә јенидән тәмиз бир бәндә кими дура биләрсиниз. О сизи әсла јары јолда гојмаз».